Prezident azad edilmiş rayonlarımızın statusunu həm də belə müəyyən etdi - “Yaşıl zona”...

img

...Mən artıq bəyan etmişəm ki, azad edilmiş ərazilər bütövlükdə yaşıl enerji zonası olmalıdır, buna imkan var. Bizim su resurslarımız kifayət qədər geniş həcmlidir. Eyni zamanda, günəş və külək enerjisi növlərinin yaradılması üçün imkanlar var. Xarici tərəfdaşları, investorları bu işlərə mütləq cəlb etmək, yerli şirkətlərə şərait yaratmaq lazımdır. Azad edilmiş torpaqlar yüksək texnoloji inkişaf ərazisi olmalıdır.

Yaşıl enerji zonası ilə bərabər, kənd təsərrüfatında ən müasir texnologiyalar tətbiq edilməlidir. Nəzərə alsaq ki, azad edilmiş ərazilərdə torpaqlar çox münbitdir, həm bitkiçilik, həm heyvandarlıq üçün çox böyük imkanlar var, çox böyük örüş sahələri var, orada kənd təsərrüfatının ən müasir texnologiyalar əsasında inkişafı mütləq təmin edilməlidir. Biz bu işi indidən planlaşdırmalıyıq ki, məhsuldarlıq yüksək olsun”. Bunu Prezident İlham Əliyev yanvarın 26-da Rəşad Nəbiyevi nəqliyyat, rabitə və yüksək texnologiyalar naziri təyin olunması ilə əlaqədar videoformatda qəbul edərkən deyib.

  • İlqar Orucov: “Bu o deməkdir ki, işğaldan azad edilən əraziləri yaşıl enerji zonasına çevirmək dövlətin əsas hədəflərindən, prioritet məsələlərdən biridir”

Azərbaycan Respublikasının Ekologiya və Təbii Sərvətlər Nazirliyi yanında İctimai Şuranın üzvü, Gənc Alim, Aspirant, Magistrlər Cəmiyyətinin sədri, fizika-riyaziyyat üzrə fəlsəfə doktoru İlqar Orucov “Bakı-Xəbər”ə bildirdi ki, Prezident İlham Əliyevin  yeni nazirə azad olunmuş zonalarda yaşıl enerji zonasının yaradılması barədə verdiyi tapşırıqların çox mühüm əhəmiyyəti var. İ.Orucovun fikrincə, yaşıl enerji zonasının yaradılması üçün azad edilmiş ərazilərimizin, rayon və kəndlərimizin seçilməsi təsadüfi deyil. 28-30 il düşmən işğalında olduğu dövrlərdə ərazilərimizdə ermənilərin böyük ekoloji terror törətdiyini qeyd edən İ.Orucovun sözlərinə görə, düşmən bizim ərazilərimizdə bütün infrastruktura, o cümlədən də yaşıllığa qarşı terror törədib, hər şeyi məhv edib: “Bilirsiniz ki, azad olunmuş ərazilərimizdə işğal dövründə ermənilər bütün mənalarda vandallıq aktları törədiblər. Orada təkcə yaşayış binaları, evlər dağıdılmayıb, həm də bütün infrastruktur məhv edilib. Ermənilər tərəfindən həmin ərazilərimizin ekologiyasına çox böyük zərbə vurulub, meşələr yandırılıb, qırılıb, bir sözlə, bütün ərazilərimiz, sözün həqiqi mənasında, xarabazarlığa çevrilib. Bu baxımdan, işğaldan azad edilmiş ərazilərimizin inkişaf etdirilməsi ilə bağlı Azərbaycan dövlətinin artıq kompleks tədbirlər planı hazırlanıb. Bu tədbirlər planının başlıca şərtlərindən biri odur ki, həmin ərazilərin ekologiyası bərpa olunsun. Cənab Prezidentin nəqliyyat, rabitə və yüksək texnologiyalar nazirini qəbul edərkən ona tövsiyələri, tapşırıqlarından biri  bundan ibarət oldu ki, azad edilmiş ərazilərdə, bütövlükdə, yaşıl enerji zonası yaradılmalıdır, həmin ərazilərin ekologiyasının bərpasında işlər görülməlidir. Xüsusilə də kəndlər, qəsəbələr, rayonlar, yaşayış məntəqələri yenidən qurularkən, bərpa edilərkən orada yaşıl texnologiyalardan istifadə edilməlidir. Yaşıl texnologiya nədir? Bölgənin enerji resursları günəş, külək enerjisindən istifadə etməklə təmin edilsin, bütövlükdə, işğaldan azad edilmiş ərazilərin yaşıllaşdırma məsələləri həll olunacaq. Burada söhbət ondan gedir ki, bərpa zamanı ekologiyaya zərər verə biləcək köhnə ənənəvi yanaşmalar ortaya qoyulmasın və xüsusən də ölkənin təbii resursları bizə imkan verir ki, həmin ərazilərdə biz külək, günəş və sair stansiyaları inşa edək, bu enerjilərdən bəhrələnə bilək. Əslində, cənab Prezidentin tapşırığı bu istiqamətdədir. Ümid edirəm ki, həmin ərazilər yenidən bərpa edilərkən, şəhərlər, kəndlər, yaşayış məntəqələri qurularkən müasir texnologiyalardan istifadə ediləcək. Fikir verdinizsə, cənab Prezident “ağıllı kənd”, “ağıllı şəhər” layihəsini və ondan istifadəni xüsusi vurğuladı. Bilirsiniz ki, dünyanın inkişaf etmiş ölkələrində, xüsusən də ekologiyanın qorunmasına önəm verən dövlətlərdə bu kimi yeni texnologiyalardan istifadə olunur. Bu texnologiyaların da tətbiqində başlıca məqsəd ondan ibarətdir ki, ekologiya daha az çirkləndirilsin, ekologiyanın qorunması məsələlərinə daha çox əməl edilsin. Bu baxımdan, ölkə başçısının da vurğuladığı kimi, işğaldan azad edilən ərazilərimizdə yeni texnologiyaların tətbiq edilməsi Azərbaycan dövlətinin əsas hədəflərindəndir. Əlbəttə, bütün bunlar alqışlanmalıdır və mən buna çox böyük önəm verirəm. Azad olunmuş ərazilərimiz bərpa edilərkən cənab Prezidentin verdiyi bu tapşırıqlar tam olaraq icra ediləcək və həmin ərazilərimizdə yaşıl enerji zolağı salınacaq. İşğaldan azad edilən Qarabağ zonası xüsusilə yaşıl texnologiyaların tətbiqi istiqamətində Azərbaycanda bir ilkin əsasını qoyacaq. Bu o deməkdir ki, işğaldan azad edilən əraziləri yaşıl enerji zonasına çevirmək dövlətin əsas hədəflərindən, prioritet məsələlərdən biridir. Azərbaycan dövləti mütləq mənada bu hədəfə də çatacaq”.

İ.Orucovun sözlərinə görə, yaşıl texnologiyanın tətbiqi ilə bağlı azad edilmiş rayonlarımızda daha çox imkanlar var. “Burada bütün şəhərlər, kəndlər dağıdılıb, binalar qalmayıb. Hətta biz qələbə qazanarkən bayraq asmaq üçün rayonlarımızda bir salamat bina belə tapa bilmirdik. Füzulini, Ağdamı düşmən tamamilə dağıdıb. İşğaldan azad edilən kəndlər, rayonlar yenidən sıfırdan qurulacaq və onlar yenidən qurulan zaman burada yeni infrastrukturun qurulması zamanı əlbəttə ki, mütləq mənada yeni texnologiyaları tətbiq etmək üçün xeyli imkan var. Yəni onu digər rayon və kəndlərdə etmək mümkün deyil, çünki orada qurulmuş infrastruktur buna imkan vermir. Ancaq  bərpa ediləcək, yenidən qurulacaq yaşayış məntəqlərində proses sıfırdan başlayacağı üçün artıq orada yaşıl texnologiyaların tətbiqi və bütövlükdə, ekologiyanın qorunması istiqamətində yeniliklər etmək mümkün olacaq. Bu baxımdan, hesab edirəm ki, biz işğaldan azad olunmuş ərazilərimizi, kəndlərimizi, şəhərlərimizi yaxın gələcəkdə tamamilə ən müasir, ən modern, dünyanın inkişaf etmiş ölkələrinin tətbiq etdiyi standartlar səviyyəsində görə biləcəyik. Cənab Prezidentin azad edilmiş rayonlarımıza yeni “Yaşıl enerji zonası” statusu verməsi çox mühüm məsələdir və biz tezliklə müasir texnologiyalardan istifadə edilməklə həmin ərazilərimizdə yaşıl enerji zonalarının qurulmasının şahidi olacağıq” - deyə İ.Orucov bildirdi.

İradə SARIYEVA 

Son xəbərlər