Xocalı qatilinin cəmdəyini İrəvanda qəbirdən çıxarıb gorbagor etdilər - erməni xalqı cinayətkar irsdən imtina edir?...

İsmayıl Tanrıverdi: “Bu fakt özü onu göstərir ki, demək, ermənilər arasında hələ beyni zəhərlənməmiş insanlar varmış”

img

Ermənistanda vəziyyət o qədər qarışıb, o qədər mürəkkəbləşib ki, nəticədə erməni cəmiyyətində qarşısıalınmaz böyük bir xaos yaranıb. Bir tərəfdən müharibəni uduzmaları, hökumətin kapitulyasiya müqaviləsi imzalaması, digər tərəfdən ölkədə hökm sürət faşizm üsul-idarəsi ermənilərin onsuz da gərgin olan mənəvi-ruhi, psixoloji vəziyyətini daha da gərginləşdirib.

Erməni cəmiyyəti uzun illərdir onları bu vəziyyətə salan separatçı, terrorçu, qatil insanların nəinki dirisinə, eləcə də ölüsünə qarşı amanız davranır. Artıq Ermənistan cəmiyyətində azərbaycanlılara qarşı soyqırım cinayətləri törədən, qətliamlar, terror hərəkətləri həyata keçirən şəxslərə qarşı ciddi bir nifrət kampaniyası başlayıb. Ermənilər keçmişdə hərbi cinayətlər törədən, dinc insanlara divan tutan canilərə qarşı barışmaz mövqe tuturlar. Bundan aydın olur ki, sadə ermənilər indiyə qədər onların beynini zəhərləyib dinc həyatlarını əlindən alan, onları separatizm, faşizm buxovunda zəncirləyən insanlara qarşı barışmaz mövqe tuturlar. Sadə ermənilər özlərinin qatil, soyqırım törədən keçmişindən sanki utanırlar, ondan imtina etməyə, xilas olmağa çalışırlar.

Ermənilər özləri vaxtilə dinc azərbaycanlılara qarşı qətliamlar, terrorlar, soyqırımlar törədən şəxslərə açıq nifrət edirlər. Bunun bariz nümunələrindən biri bu günlərdə Ermənistanda baş verib. Belə ki, bir neçə gün əvvəl gəbərən I Qarabağ müharibəsində azərbaycanlılara qarşı xüsusi qəddarlıqlar edən, Xocalı soyqırımının törədilməsində yaxından iştirak edən saxta erməni generalı, hərbi cinayətkar Manvel Qriqoryanın İrəvandakı məzarını dağıdıblar, onun meyitini qəbirdən çıxarıb çölə atıblar, iylənmiş cəsədinə qarşı layiq olduğu təhqiramiz hərəkətlər ediblər. Bir sözlə, erməni xalqı hərbi cani Manvel Qriqoryanı gorbagor etməklə İrəvanda ona məzar yerinin olmadığını ortaya qoyub.

Ekspertlər hesab edirlər ki, M.Qriqoryanın və digər erməni hərbi canilərinin azərbaycanlılara qarşı törətdiyi vəhşiliklər, soyqırım cinayətləri normal düşüncəli erməni əhalisi tərəfindən nifrətlə qarşılanır.

Ekspertlər qeyd edirlər ki, I Qarabağ müharibəsində  iştirak edən bu müharibə cinayətkarı 2018-ci ildə qanunsuz yolla silah-sursata sahib olmaqda təqsirlənərək həbs edilmişdi.

Erməni xalqının separatizmə, faşizmə və bir sıra anormal yollara sürüklənməsində Qriqoryan və digər onun kimi canilərin hətta öləndən sonra da cəzasını dinc ermənilərin verdiyini deyən ekspertlər hesab edirlər ki, bu canilərə görə artıq xalq özünü diskomfort hiss edir, bu səbəbdən onlardan imtina olunur. 

  • “Allah hərbi saxta general, hərbi cani Manvelin meyitini erməni xalqının əli ilə gorbagor edib cəzalandırıb”

BDU-nun Erməni Araşdırmaları Elmi-tədqiqat və Tədris Mərkəzinin böyük elmi işçisi İsmayıl Tanrıverdi “Bakı-Xəbər”ə şərhində bildirdi ki, az-çox düşünməyi və müharibə canilərinin cinayətkar mahiyyətini dərk edən ermənilər var, həmin ermənilərin də Qriqoryan kimilərinə münasibəti həmişə mənfi olub. Bu gün onların Qriqoryanın iylənmiş cəsədindən intiqam aldıqlarını deyən İ.Tanrıverdinin sözlərinə görə, Allah ermənilərin əli ilə M.Qriqoryanı öləndən sonra bu şəkildə cəzalandırıb. “Manvel Qriqoryan - ermənilərin bu saxta generalı yalnız azərbaycanlılara qarşı deyil, ermənilərə qarşı da tükürpədici cinayətlər törədib. Onun Birinci Qarabağ müharibəsinə getməsinin konkret səbəbi olub. Qriqoryan Birinci Qarabağ müharibəsindən əvvəl Ermənistanda saysız qadına qarşı seksual təcavüz edib, nə qədər adamı qətlə yetirib. Barəsində məhkəmə hökmü çıxarılıb, o, həbsdən canını qurtarmaq üçün qaçıb Qarabağa gedib. Birinci Qarabağ müharibəsində Füzulidə, digər rayonlarımızda azərbaycanlıları kütləvi şəkildə amansızlıqla qətlə yetirib, Xocalı soyqırımında iştirak edib, körpələrimizi, qadınlarımızı, qocalarımızı öldürüb. M.Qriqoryan o qədər insan öldürüb, əli o qədər insanın qanına batıb ki, heç onun etdiyi yırtıcılığı heyvan da etməyib. Müharibədən qayıdandan sonra öz cinayətkar hərəkətlərini davam etdirib. Təsəvvür edin ki, ona 2 min dollar borcu olan bir ermənini tutub döydürüb, həmin şəxsi uzun müddət evinin zirzəmisində zəncirdə saxlayıb. Hətta həmin şəxsin heyvan kimi zəncirləndiyinin, bu formada çölə çıxarılıb su içirdiyinin videosu da var. Kimin ona borcu olubsa, evini, eşiyini, torpaq sahəsini, var-yoxunu əlindən alıb, özünü də girov saxlayıb. Ermənistan hökuməti, hüquq-mühafizə orqanları onunla bacarmırdı. Serj Sarkisyan ondan dəhşətli dərəcədə qorxurdu. Qriqoryan bütün erməniləri, yüksək vəzifəli dövlət məmurlarını qorxu, təhdid altında saxlayırdı. Onun 40 illik yubileyinin videosu yayılıb, evində özünə yubiley keçirərkən Ermənistan parlamentində güllələnən Vazgen Sarkisyan cibindən general paqonunu çıxarıb onun çiyinlərinə vurub dedi ki, sən bu gündən generalsan. Yəni onun generallığı da rəsmi olmayıb, heç bir sənəddə bu əks edilməyib.

40 illik yubileyində özü deyirdi ki, süfrədə gördüyünüz hər şey Qarabağdan - azərbaycanlıların evlərindən gətirilib, hətta Azərbaycan meşələrindən ceyran ovlayıb onun ətini də sizə yedirdirəm. Bunun da videosu var.

Dediyim kimi, M.Qriqoryanın cinayətləri bitib tükənməzdir. O həbs ediləndə evində polis axtarış aparmışdı və evinin zirzəmisindən 19 dənə insan skeleti tapılmışdı. O, insanları girov saxlayırdı və döyə-döyə öldürürdü. Qriqoryanın evinin zirzəmisindən çıxan 19 skeletin təbii ki, çoxu azərbaycanlılara aid idi, bəziləri isə ermənilərə məxsus olub. Bu hərbi cani o qədər qəddar olub ki, onun qəddarlıqlarının sayı bitmir. İnsanları tutub girov saxlayıb, amansızlıqla döyüb, tələb etdiyi pulu əldə edə bilməyəndə isə onları öldürüb.      

Ermənilər M.Qriqoryana o qədər nifrət edirdilər ki, onun məzarına, iylənmiş cəsədinə qarşı bu cür hərəkət etdilər. Yəni ermənilər saxta general M.Qriqoryanın qəbrini dağıdaraq, iylənmiş cəsədini çıxarıb kənara atıblar və bununla da onun törətdiyi qətliamlara, soyqırımlara, cinayətlərə öz etirazlarını bildiriblər. Bu fakt özü onu göstərir ki, demək, ermənilər arasında hələ beyni zəhərlənməmiş insanlar varmış, onlar öz cinayətkar, cani keçmişlərindən imtina etmək istəyirlər. Onlar M.Qriqoryan kimi canilərin keçmiş əməllərindən utanırlar.  

Bir sözlə, axır ki, Birinci Qarabağ müharibəsində azərbaycanlılara qarşı xüsusi qəddarlığı ilə tanınan, 20-dən çox əsirimizi evinin zirzəmisində zəncirlərlə bağladıb işgəncələr verərək acından öldürən, öz xalqına və əsgərlərinə qarşı da törətdiyi cinayətkar əməllərinə görə erməni “general” M.Qriqoryanın iylənmiş leşini erməni xalqı cəzalandırdı”.

İ.Tanrıverdinin qeyd etdiyinə görə, caninin ölümünə səbəb vaxtilə rəhbərlik etdiyi terrorçu dəstələri ilə işğal etdiyi Füzuli rayonunun müzəffər ordumuz tərəfindən azad olunması və Qarabağda əldə etdiyimiz qələbə xəbəri olub: “O bizim zəfərimizlə bağlı xəbəri eşitdikdən az sonra gəbərib. O öləndə mən erməni mətbuatındakı şərhimdə yazmışdım: “Manvel insanlığa qarşı törətdiyi cinayətlərə görə Allah tərəfindən cəzalandırıldı”. İndi isə deyirəm, Allah hərbi saxta general, hərbi cani Manvelin meyitini erməni xalqının əli ilə gorbagor edib cəzalandırıb. Onun kimi caniyə yalnız gorbagorluq yaraşırdı, necə ki, baş verdi.

Erməni mətbuatında məlumat yayılıb ki, yaxınları və doğmaları gül-çiçək dəstələri ilə onun qəbrini ziyarət etməyə gedərkən rast gəldikləri “dəhşətli mənzərə”dən donub qalıblar. “General”ın məzarı tamamilə dağıdılmış və çürümüş cəsədi tabutdan çıxarılaraq məzarın kənarına atılmışdı. Bu hadisə o anlama gəlir ki, əgər insan qatili Manvelin əzablı ölümünün əsas səbəbkarı bəlli idisə, onun qəbrinin dağıdılması və üfunətli cəsədinin kənara atılması da vaxtilə zülm etdiyi öz erməni qardaşları tərəfindən törədilib”.

İradə SARIYEVA

Son xəbərlər