Bildiyimiz kimi, uzun illərdir Azərbaycanın işğal olunan ərazilərinə Ermənistan hökuməti qanunsuz köçürmə siyasəti həyata keçirir. Bu proses son bir neçə ildə daha da sürətlənsə də, beynəlxalq qurumlar bunu görməzdən gəlirlər. Məqsəd isə aydındır, Ermənistanın işğalçılıq və köçürmə siyasətinə dəstək vermək.
Ermənistan son bir neçə aydır Livanda yaşayan ermənilərin Azərbaycanın işğal altında olan ərazilərinə qanunsuz köçürülməsini daha da intensivləşdirib.
Azərbaycan Respublikası Prezidentinin köməkçisi, Prezident Administrasiyasının Xarici siyasət məsələləri şöbəsinin müdiri Hikmət Hacıyev bu məsələyə münasibət bildirərək deyib ki, Azərbaycanın işğal edilmiş ərazilərində qanunsuz məskunlaşdırma siyasəti aparan Ermənistan son günlər xüsusilə Livandan olan ermənilərin bu torpaqlara köçürülməsi siyasətini həyata keçirir. Sosial şəbəkələrdə Livandan olan ailənin Azərbaycan xalqı üçün böyük tarixi və mənəvi əhəmiyyətə malik olan Şuşa şəhərində yerləşdirilməsi haqda məlumatlar yayılıb.
Onun sözlərinə görə, Azərbaycan da daxil olmaqla, dünya ölkələri Livanda baş vermiş faciənin nəticələrinin aradan qaldırılması, Livana humanitar yardım göstərilməsi ilə məşğul olarkən, Ermənistan bu faciədən, insanların iztirablarından özünün çirkin məqsədləri naminə sui-istifadə edir. Bununla da Ermənistan onun üçün heç bir mənəvi dəyərlərin olmadığını nümayiş etdirir: "Xüsusilə vurğulamaq istərdim ki, işğal olunmuş ərazilərimizdə məskunlaşdırılmış əhali, faktiki olaraq, Ermənistanın məsuliyyətsiz, avantürist siyasətinin qurbanına çevrilir. Hamı bilməlidir ki, Azərbaycanın işğal olunmuş ərazilərində həyata keçirilən qeyri-qanuni məskunlaşdırma siyasətinin heç bir qüvvəsi yoxdur və Azərbaycan onun nəticələrini tamamilə rədd edir.
Ermənistan Suriya və Livandan işğal olunmuş ərazilərə köçürülmüş insanları silahlı muzdlular kimi də istifadə edir. Ermənistan qeyri-qanuni məskunlaşdırma siyasəti həyata keçirməklə işğal etdiyi Azərbaycan ərazilərində demoqrafik vəziyyəti dəyişdirməyə çalışır. Qanunsuz məskunlaşdırma siyasəti beynəlxalq humanitar hüququn, o cümlədən, 1949-cu il Cenevrə Konvensiyalarının kobud şəkildə pozulmasıdır. Müharibə dövründə mülki əhalinin qorunmasına dair 4-cü Cenevrə Konvensiyasına əsasən, işğalçı dövlət öz mülki əhalisini işğal etdiyi əraziyə köçürməməlidir”.
H.Hacıyev, həmçinin, bildirib ki, 1946-cı ildə əsas hərbi cinayətkarların məhkəmə işində Nürnberq Beynəlxalq Hərbi Tribunalı müttəhimlərin ikisinin işğal olunmuş ərazilərin etnik tərkibinin dəyişdirilməsinə görə təqsirli olduğu barədə qərar verib: "Beynəlxalq hüquqa əsasən, işğalçı dövlət tərəfindən işğal olunmuş ərazilərdə məskunlaşma siyasətinin aparılması müharibə cinayəti kimi tövsif edilməlidir. Bu baxımdan Ermənistanın Azərbaycanın işğal olunmuş ərazilərində apardığı qeyri-qanuni məskunlaşma müharibə cinayətidir. İstehzalı olsa da, Ermənistanın özünün qanunvericiliyinə görə, bu əməllər cinayət hesab olunur. Belə ki, Ermənistanın Cinayət Məcəlləsinin 390-cu maddəsində işğalçı dövlətin işğal olunmuş ərazilərdə əhalini çıxararaq öz əhalisini məskunlaşdırması beynəlxalq humanitar hüququn ciddi pozuntusu sayılır və 8-12 il cəza nəzərdə tutulur.
Bu ilin iyulunda iki ölkənin dövlət sərhədinin Tovuz istiqamətində Ermənistanın törətdiyi təcavüz aktı, təmas xəttindəki diversiya-sabotaj əməliyyatı cəhdi Ermənistanın növbəti təxribat və hərbi avantürizmə hazırlaşmasından xəbər verir.
Bundan əlavə, son günlər Ermənistan işğal edilmiş ərazilərimizdə yaratdığı qondarma rejimin dili ilə Azərbaycanın digər ərazilərini də işğal etmək niyyətini bir daha açıq şəkildə səsləndirməyə başlayıb və Gəncə şəhərini raket atəşinə tutmaqla hədələyib".
H.Hacıyev qeyd edib ki, Ermənistanın Baş nazirinin, Müdafiə nazirinin təxribatçı bəyanatları və hərəkətləri, eləcə də bu qəbildən olan digər addımlar bir daha sübut edir ki, tamamilə həyasızlaşmış Ermənistan rəhbərliyinin məqsədi danışıqlar prosesini tamamilə məhv etmək və işğal olunmuş Azərbaycan ərazilərinin ilhaqına nail olmaqdan ibarətdir: “Cəbhədə təxribatların törədilməsinə və vəziyyətin kəskinləşməsinə görə bütün məsuliyyət Ermənistanın siyasi-hərbi rəhbərliyinin üzərinə düşür. Ermənistan-Azərbaycan münaqişəsinin həll edilməsində irəliləyişə nail olmaq üçün Ermənistan qoşunları Azərbaycanın işğal olunmuş ərazilərindən çıxarılmalıdır. Münaqişə yalnız və yalnız Azərbaycanın ərazi bütövlüyü, suverenliyi və beynəlxalq səviyyədə tanınmış sərhədlərinin toxunulmazlığı çərçivəsində həll olunmalıdır”.
“Məqsəd onların qayğısına qalmaq, yaşamaqlarını təmin etmək deyil, onlardan muzdlu döyüşçülər kimi istifadə etməkdir”
Azərbaycan Milli Elmlər Akademiyasının (AMEA) Qafqazşünaslıq İnstitutunun ermənişünaslıq şöbəsinin müdiri, professor Qasım Hacıyev “Bakı-Xəbər”ə açıqlamasında bildirdi ki, Ermənistan işğal altında saxladığı Azərbaycan ərazilərinə Livandan ermənilərin kütləvi qanunsuz köçünü təşkil etməklə növbəti böyük tarixi cinayətə imza atır. Son dövrlər Paşinyan hökumətinin həyata keçirdiyi mənfur siyasətin arxasında çox dəhşətli fəlakətlər dayanır. Bu gün Ermənistanın əsas niyyəti Qafqazın Livana, Suriyaya çevrilməsinə nail olmaqdır. Q.Hacıyevin sözlərinə görə, Ermənistan hökuməti və xaricdəki erməni lobbisinin dəstəyilə işğal altında olan Azərbaycan ərazilərinə köçürülənlər arasında kifayət qədər Livanda fəaliyyətdə olan terrorçu qrupların üzvü var, onların əksəriyyəti də muzdlu döyüşmüşlərdir. “Ermənistanın son dövrlər apardığı mənfur siyasətə diqqətlə fikir verdikdə bir məsələni xatırlayıram ki, ermənilər Dağlıq Qarabağın Ermənistana birləşdirilməsi ilə bağlı siyasət yürütməyə başlayarkən, ilk növbədə, xarici ölkələrdə yuva quran erməni terrorçularından geniş şəkildə istifadə etdilər. Suriya ermənisi Levon Ter-Petrosyanı gətirib prezident seçdilər, sonra da ASALA-nın rəhbərliyilə Suriya və Livanda yetişdirilən terrorçuları gətirib Azərbaycan torpaqlarının işğalında onlardan istifadə etdilər. Son illər isə onları gətirib işğal olunmuş Azərbaycan ərazilərində yerləşdirdilər. Bütün bunlar isə beynəlxalq aləmin, dünyanın gözü qarşısında baş verir, amma təəssüflər olsun ki, bunun qarşısı alınmır”.
Q.Hacıyev qeyd etdi ki, pandemiyanın dünyada tüğyan etdiyi və Livanda vəziyyətin qarışdığı, Azərbaycan da daxil olmaqla, dünya ölkələrinin Livana humanitar yardımlar göstərdiyi bir dönəmdə Ermənistanın bundan sui-istifadə etməsi təsadüfi deyil. Müsahibimiz bildirdi ki, dünyanın başının qarışdığı bütün dövrlərdə ermənilər prosesdən öz xeyirlərinə istifadə etməyə çalışıblar. Livandan ermənilərin kütləvi surətdə Dağlıq Qarabağa, xüsusən də Şuşaya köçürülməsinin böyük cinayət olduğunu deyən Q.Hacıyevin sözlərinə görə, beynəlxalq təşkilatlar susmamalıdırlar. “Dünyanın bu dövründə də Ermənistan öz mənfur niyyətlərindən əl çəkmir, dünyanın gözü qarşısında Livandan, başqa yerlərdən erməniləri gətirib Azərbaycan torpaqlarında qanunsuz şəkildə yerləşdirir. Hikmət müəllim çox doğru deyib ki, Livandan ermənilərin işğal altında olan Azərbaycan torpaqlarına köçürülməsində məqsəd onların qayğısına qalmaq, yaşamaqlarını təmin etmək deyil, onlardan muzdlu döyüşçülər kimi istifadə etməkdir, bu da böyük təhlükədir. Çünki ermənilər özlərindən başqa heç kimi sevmədikləri kimi, xaricdə olan erməniləri də heç sevmirlər, sadəcə, onlardan istifadə edirlər. Bir məsələni qeyd etmək istəyirəm ki, beynəlxalq təşkilatlar öz nizamnamələrinin tələblərinə əməl edərək, Ermənistanın həyata keçirdiyi qanunsuz köçürmələrin qarşısını almalıdırlar. Reallıq budur ki, beynəlxalq təşkilatlar özlərini “sülh elçisi” kimi təqdim etsələr də, arxasında çox böyük məkrli planlar dayanan Ermənistanın bu qanunsuz köçürmə siyasətinə “dayan” demirlər. Ermənistanın niyyəti Qafqazı qan ocağına çevirməkdir. Belə olmasaydı, işğalçılıq niyyətindən əl çəkərdi, Azərbaycan torpaqlarına hücum etməzdi, Livandan, Suriyadan muzdlu adamlar gətirib işğal altında olan Azərbaycan torpaqlarında yerləşdirməzdi”.
Q.Hacıyev bildirdi ki, ermənilərin bu məkrli planlarına qarşı xalqımız mübarizə aparmalı və onların ifşa edilməsinə çalışmalıdır. Həmsöhbətimiz dedi ki, ermənilərin özbaşnalığına, irticaçılığına, məkrli planlarına son qoymaq üçün ölkə əhalisi milli ordunun yanında səfərbər olunmalı və torpaqlarımızı işğaldan azad etməli, Ermənistanın muzdlu ordusunu ərazilərimizdən qovub çıxarmalıyıq. “Bununla da ermənilərin bu siyasi oyunlarına bütün regionda son qoyular. Biz ermənilərin bütün əməllərini ifşa etməliyik”.
Q.Hacıyev xatırlatdı ki, Ermənistanda məlum böyük zəlzələ baş verərkən xarici ölkələrdən humanitar yardımların içində Ermənistana silah da daşınıb. “Dəqiq məlumatlar var ki, həmin dövrdə “humanitar yardım” adı ilə ermənilər xarici ölkələrdən Ermənistana silah və muzdlu döyüşçülər daşıyıblar. Həmin dövrdə zəlzələnin nəticələrinin aradan qaldırılmasından söhbət gedəndə ermənilər muzdlu döyüşçülərlə birgə İrəvanda nümayişlər təşkil edərək, Azərbaycan torpaqlarına qarşı çıxışlar edirdilər. Yəni o dövrdə də onların yanında muzdlu döyüşçülər vardı” - deyə Q.Hacıyev vurğuladı.
İradə SARIYEVA
