Ermənistanın Azərbaycana qarşı vaxtaşırı olaraq etnik qruplar amilindən istifadə etməyə çalışdığı yaxşı məlumdur. Azərbaycanda müxtəlif etnik qrupların, guya hüquqlarının pozulduğu, onların “assimilyasiyaya məruz qaldığı” barədə təbliğat erməni ideoloji xəttinin başlıca isiqamətlərindən biridir. Bu da təsadüfi seçilməyib, çünki dünya erməniliyi Dağlıq Qarabağdakı erməni separatizminə və daha sonra Azərbaycan ərazilərinin 20 faizinin işğal edilməsinə “ermənilərin hüquqlarının pozulması” bəhanəsi ilə haqq qazandırmağa çalışır. Bu məkrli ideologiyanın beynəlxalq ictimai rəyə yeridilməsi üçün Azərbaycanda təkcə etnik ermənilərin “hüquqlarının pozulması” bəs eləmirdi. Bu səbəbdən erməni təbliğatı vaxtaşırı olaraq digər etnik qrupları öz alətinə çevirməyə çalışıb. Ermənistan xüsusi xidmət orqanlarının və elmi dairələrinin Azərbaycanda talış separatizmini alovlandırmaq üçün hansı cəhdlər göstərdiyi yaxşı məlumdur. Indi isə ermənilər kürd kartından istifadə etməklə Azərbaycanın daxilində narazılıq yaratmağa cəhd edirlər.
Bugünlərdə Ermənistan KİV-lərindən biri “Azərbaycanda kürdlər” mövzusunda qondarma “dqr prezidentinin müşaviri”, özünü “tarix elmləri doktoru” kimi tanıdan Qarabağ ermənisi David Babayanın seriya “elmi məqalələrini” dərc edib. Bu məqalələrdə erməni separatçı ideoloqu Azərbaycanda kürdlərin tarixi barədə uzun-uzadı “araşdırma” aparır. Və indi işğal altında olan Laçın, Qubadlı, Zəngilan, Kəlbəcər, Cəbrayıl rayonlarını “kürd torpaqları” kimi qələmə verir, Azərbaycanda kürdlərin “tarixən sıxışdırıldığını və assimilyasiyaya məruz qaldığını” yazır. Azərbaycana qarşı bu və ya digər etnik qrupu sıxışdırmaq ittihamı ilə ideoloji təbliğat quran Ermənistan indi monoetnik dövlətdir. Kürdlər məsələsinə gəldikdə isə, indiki Ermənistanın yerləşdiyi qədim Azərbaycan torpaqlarında həqiqətən kürdlər də yaşayıb. Və Ermənistan bu torpaqlardan, azərbaycanlılarla yanaşı, kürdləri də qovub çıxarıb və onların məzarlıqlarını dağıdıb, irsini yer üzündən silib. Sosial şəbəkələrdə Ermənistanda - Ararat vilayətində, Vedibasarda kürd qəbiristanlığının necə vandalizmə məruz qaldığı barədə erməni insan haqları müdafiəçisi videogörüntülər yayıb.
"Qarabağın azadlığı uğrunda müharibədə kürdlər azərbaycanlılarla çiyin-çiyinə vuruşub"
Azərbaycandakı kürdlərin real vəziyyətini şərh etmək üçün ölkəmizdə kürd dilində çap olunan “Diplomat” qəzetinin baş redaktoru, kürd əsilli Tahir Süleymanla əlaqə saxladıq. O, “Bakı-Xəbər”ə açıqlamasında bildirdi ki, tarixən biz qoşa yaşayan xalqlarıq: “Minilliklərdir ki, biz qaynayıb-qarışmışıq. Bir-birimizə qız verib, qız almışıq. 1905-ci ildə Abasqulu bəyin dəstəsində çoxlu sayda kürd Vedibasarda ermənilərə qarşı vuruşub. 1988-ci ildə isə bizi tarixi ərazilərimizdən ermənilər didərgin saldı. Həmin hadisələr zamanı azərbaycanlılarla bizə heç bir fərq qoyulmadı. Qarabağın azadlığı uğrunda müharibədə kürdlər azərbaycanlılarla çiyin-çiyinə vuruşub. Bu gün də kürdlərlə azərbaycanlılar mehriban şəraitdə yaşayır. Azərbaycanda kürdlərə qarşı heç bir etnik ayrıseçkilik yoxdur, ola da bilməz. Təbiidir ki, bu bizim bir olan düşmənlərimizi narahat edir. Bu səbəbdən də ermənilər belə təxribatlara əl atırlar. Onlar kürdləri belə çox istəyirdilərsə, niyə Ermənistandan çıxarırdılar? Belə canları yanırdısa, elə Vedibasarı edərdilər kürd muxtariyyəti, biz də qalardıq orada. Onlar bu kartdan başqa istiqamətdə də istifadə edirlər. Suriyadan kürd dilini bilən kürdləri gətirib işğal altında olan Kəlbəcər, Laçın, Zəngilanda yerləşdirirlər. Onlara saxta pasportlar verirlər ki, güya tarixən həmin ərazilərdə yaşayıblar. Bu, əhalinin sayını süni şəkildə artırmağa hesablanıb. Ermənilər yezidi kürdlərlə Rusiyanın müxtəlif əyalətlərində təbliğat aparırlar ki, güya onlar kürdlərə muxtariyyat verib. Bunu deyəndə işğal altındakı əraziləri nəzərdə tuturlar. Qazaxıstan və Başqırdıstanda kürdlərin evlərinə hücumlar oldu ki, hardan gəlibsinizsə, ora da gedin. Bunun arxasında erməni əlinin olmasına şübhə yeri qalmır. Hər iki xalqın ziyalıları bu məsələdə həssaslıq nümayiş etdirməlidir. Biz imkan verməməliyik ki, düşmən bizi bir-birimizlə üz-üzə qoysun”.
Aydındır ki, Azərbaycanda etnik qrupların sıxışdırılması haqda təbliğatın arxasında tipik erməni riyakarlığı və təxribatı durur.
Məhəmmədəli QƏRİBLİ
