Azərbaycan Prezidenti Administrasiyasının Xarici siyasət məsələləri şöbəsinin müdiri, Prezidentin köməkçisi Hikmət Hacıyev açıqlamasında bildirib ki, Rusiyanın Ermənistana silah verməklə bağlı verdiyi cavab bizi qane etmir:
“Ermənistan təcavüzkar dövlətdir. Ermənistan rəhbərliyi Tovuz hadisələrini dırnaqarası qələbə kimi təqdim etməyə çalışır. Əsas sərhədlərin qorunması, əhalinin təhlükəsizliyinin təmin edilməsidir. Ermənistan silahlı bölmələri geri oturduldu. Onlar bu gün də itkilərini gizlədirlər. Buna görə də Ermənistanın hərbi-siyasi rəhbərliyi məsuliyyət daşıyır. Nikol Paşinyan iddia edir ki, Tovuz hadisələri Ermənistanda istehsal olunan müdafiə sənayesi məhsullarının keyfiyyətini göstərdi. Ermənistanda nə istehsal olunduğu məlumdur. Tovuz hadisələrini törətməkdə növbəti məqsəd Ermənistandakı sosial, demoqrafik böhrandan erməni ictimaiyyətinin diqqətini yayındırmaqdır. Nikol Paşinyan Soros Fondunun parlaq yetirməsidir. Azərbaycanın işğal olunmuş ərazilərindəki qızıl və digər metallar çıxarılaraq istismar edilir. Nikol Paşinyan siqaret mafiyasına da nəzarət edir”.
H.Hacıyev qeyd edib ki, Ermənistanın baş naziri yenə də münaqişənin və Tovuz hadisələrinin mahiyyətini təhrif edib: “Ermənistan münaqişənin hərbi həllinin olmadığını deyirsə, ilk növbədə işğala son qoymalıdır. Son dövrlər Ermənistanın silahlandırılması Azərbaycan ictimaiyyətini, dövlətini ciddi narahat edir. Bu məsələ Prezident İlham Əliyev tərəfindən Rusiya Prezidenti qarşısında da qaldırılıb. Müxtəlif istiqamətlərdə Rusiyadan yüklərin daşınması həyata keçirilir və bu, ictimaiyyətimizi narahat edir. Rusiya tərəfinin açıqlamaları bizi tam qane etmir. Suallarımız açıq qalmaqda davam edir. Biz gözləyirik ki, hansı əsaslarla Ermənistanın intensiv şəkildə silahlandırılmasının davam etdiyinə aydınlıq gətirilsin. Ermənistan Tovuz hadisələri zamanı işğalçılıq siyasətini davam etdirdiyini göstərdi. Guya təyyarələrin tikinti materialları daşıdığı barədə cavab bizi qane etmir. Yük materialları başqa yollarla da daşına bilər”.
Qeyd edək ki, Azərbaycanda səfərdə olanda Rusiyanın müdafiə naziri Ermənistana təyyarələrlə silah yox, tikinti materiallarının daşındığını demişdi. Hikmət Hacıyevin bu mövqeyi Şoyqunun açıqlamasına cavabdır. Ekspertlərin Azərbaycanın bu mövqeyinə münasibəti necədir?
Politoloq Qabil Hüseynli “Bakı-Xəbər”ə bildirdi ki, Hikmət Hacıyevin bu mövqeyi Azərbaycanın Şoyqunun yalanlarına inanmadığına dair mövqeyini ifadə edir:“Olduqca sərrast və yerində verilən bir cavabdır. Azərbaycan tərəfi ölkə başçısı səviyyəsində bu məsələyə öz iradını bildirmişdirsə, deməli, əlində tutarlı arqumentləri olub. Ancaq Şoyqu gəlib Bakıda gülməli bir əsaslandırma ilə bizim başımızın altına yastıq qoymaq istədi. Rusiya tərəfi hərbi təyinatlı yüklərə adi tikinti materialları adı verib üstündən keçiləcəyini gözləyirdi. Şimal qonşumuzun Müdafiə nazirinin dili ilə gətirdikləri arqumentlər isə, el dili ilə desək, “uşaq başı aldatmaq” kimi bir gediş idi. Əlbəttə, bizim üçün milli təhlükəsizlik baxımından bu qədər vacib olan aşkarlanmış bu böyük fakta qeyri-ciddi yanaşma da cəmiyyətimizdə narahatlıq doğurmalı idi”.
Politoloqun sözlərinə görə, həmin yüklərin daşınma trayektoriyasına diqqət etdikdə Rusiyanın nə qədər gülünc bir fikir ifadə etdiyi üzə çıxır:“Rusiya ilk dəfə deyil ki, Ermənistana belə silah tranşı edir. Hər dəfə vəziyyət gərginləşəndə onlar bu sayaq addımları atırlar. Gəlin, həmin yükün daşınma trayektoriyasına diqqət edək. Mozdok-Aktau-Türkmənbaşı-Rəşt-Meğri-İrəvan marşurutu ilə Rusiya niyə tikinti materialı daşımalıdır? Bunun maya dəyəri çox baha başa gəlməzmi? Hesab edirəm ki, Rusiyanın qaneedici cavab verməməsi bizi başqa instansiyalara müraciət etməyə vadar edə bilər. Belə hal həm region, həm də dünya üçün təhlükə sayılır. İşğalçı bir ölkəyə külli miqdarda silah verib, onun altından tikinti materialıdır deyib çıxmaq pis presedentin əsasını qoya bilər. Ya Rusiya bu məsələ ilə bağlı məntiqli izah verib üzrxahlıq etməlidir, ya da biz bu mövzunun müzakirəsini beynəlxalq arenaya çıxarmalıyıq”.
Doğrudan da, gülməli arqumentləri irəli sürüb bir ölkəyə yalan danışmaq problemin həlli sayıla bilməz.
Məhəmmədəli QƏRİBLİ
