Bütün dünya koronavirus pandemiyası ilə mübarizə aparır. Bu gün elə dövlətlər var ki, pandemiyaya qalib gəlmək ərəfəsindədirlər, elələri də var, hələ heç bir irəliləyişə nail olmayıblar.
Bəşəriyyəti bürüyən koronavirus pandemiyasının tamamilə məhv edilməsində, yer üzündən silinməsində müstəsna rol oynayan amillərdən biri dövlətlərin birliyi, həmrəyliyidir.
Bu gün virusdan xilas edilməyin yolu, əlbəttə, bəşəri həmrəylikdən keçir. Pandemiyanın ilk dalğalarının yayılmağa başladığı ilk günlərdə Azərbaycan koronavirusa qarşı ümumbəşəri mübarizəyə ciddi maddi və mənəvi dəstək verməklə, bütövlükdə, bu prosesə qoşulmaqla ortaya çox ciddi nəticələr, nümunələr qoya bildi.
Məlumdur ki, öz daxilində pandemiya ilə ciddi mübarizə aparan dövlətlərin böyük əksəriyyətinin başı özünə qarışdığından, koronavirus pandemiyasına qarşı həyata keçirilən ümumbəşəri mübarizəyə qoşulmağa heç bir səy göstərmir. Uzağa getməyək, məsələn, Ermənistan kimi. Ermənistan nəinki koronavirusla ümumibəşəri mübarizəyə qoşulmur, hətta heç bir ölkəyə yardım belə təklif etmir. Əlbəttə, ömrü boyu o dövlətin, bu dövlətin verdiyi ianələrlə dolanan bir forpostun koronavirus pandemiyasına qarşı aparılam ümumibəşəri mübarizəyə qoşulmaması anlaşılandır. Bu mübarizəyə qoşulan dövlətin, ilk növbədə, iqtisadi gücü, humanizm, həmrəylik potensialı olmalıdır. O da ki, bu ölkədə yoxdur.
Onu da bildirək ki, Azərbaycan Cənubi Qafqaz respublikaları arasında göstərdiyi ümumbəşəri həmrəyliyə görə liderdir.
Qeyd etdiyimiz kimi, Azərbaycan dövləti isə pandemiyanın başlandığı ilk dövrlərdən başlayaraq pandemiyaya qarşı ümumbəşəri mübarizəyə qoşuldu, bununla da ümumbəşəri həmrəyik göstərdi. Bu gün Azərbaycanın pandemiya dövründə göstərdiyi ümumbəşəri həmrəylik nümunələri beynəlxalq qurumlar tərəfindən qeyd edilir, bir örnək kimi bütün dünyaya təqdim olunur. Dövlətimizin dünyanın ağır günündə ortaya qoyduğu ümumbəşəri həmrəylik nümunələri dünya tərəfindən təqdir edilir.
Onu da bildirək ki, Prezident İlham Əliyevin rəhbərliyi ilə Azərbaycan dövlətinin ortaya qoyduğu ümumbəşəri həmrəylik nümunələri ilə bağlı Prezidentin ünvanına təşəkkür məktubları gəlir.
Bildiyimiz kimi, pandemiyanın yayıldığı yeni dövrdə Ümumdünya Səhiyyə Təşkilatı göstərdiyi həmrəyliyə görə dövlətimizə ilk təşəkkür edən beynəlxalq qurum olub.
Aprelin 16-da isə Birləşmiş Millətlər Təşkilatı (BMT) həmrəyliyə görə Azərbaycana təşəkkür edib. Belə ki, BMT-nin Azərbaycandakı nümayəndəliyi Heydər Əliyev Mərkəzinə Azərbaycanın əsas memarlıq simvollarından birinin üzərində Ümumdünya Səhiyyə Təşkilatının (ÜST) bayrağının təsvir olunmasına görə dərin minnətdarlığını bildirib.
“Bu həmrəyliyi və dəstəyi yüksək qiymətləndiririk. Mübarizənin ön cəbhəsində olan Ümumdünya Səhiyyə Təşkilatı (ÜST) minlərlə əməkdaşı ilə birgə virusla mübarizə aparan üzv dövlətləri və onların cəmiyyətlərini, xüsusilə də bu pandemiyadan daha çox əziyyət çəkənləri, məsləhət, təlim, avadanlıq və həyati əhəmiyyət daşıyan xidmətlərlə dəstəkləyir.
ÜST və BMT-nin digər agentlikləri ölkədə COVID-19 pandemiyasının səbəb olduğu təcili problemləri həll etmək üçün Azərbaycan hökuməti və digər tərəfdaşlarla sıx əməkdaşlıq edirlər.
Azərbaycanın bu çətin sınaqdan alnıaçıq çıxmasına dəstək olmaq üçün əlimizdən gələni edəcəyik. Biz birlikdə daha güclüyük və birlikdə bu böhrana qalib gələcəyik" - deyə təşkilatın minnətdarlığında bildirilib.
Qeyd edək ki, koronavirus (COVID-19) pandemiyasına qarşı mübarizədə Azərbaycanın dəstəyini nümayiş etdirmək məqsədilə aprelin 16-da Heydər Əliyev Mərkəzinin binası üzərinə Ümumdünya Səhiyyə Təşkilatının bayrağı videoproyeksiya olunub.
Aprelin 3-dən başlayaraq virusdan zərər çəkən hər bir dövlətin bayrağı həmin ölkənin musiqisinin sədaları altında Mərkəzin binası üzərinə proyeksiya olunur. Bununla da Heydər Əliyev Mərkəzi COVID-19-un geniş yayıldığı dövlətlərə və onların xalqlarına dəstəyini, hörmət və ehtiramını ifadə edir.
İndiyədək Çin, Fransa, Almaniya, İran, İtaliya, Rusiya, İspaniya, Türkiyə, Böyük Britaniya, ABŞ, Gürcüstan, Avropa İttifaqı və Ümumdünya Səhiyyə Təşkilatının bayraqları Mərkəzin binasının üzərində nümayiş olunub.
Azərbaycan dövlətinə təşəkkür edən ölkələr sırasında Fransa, Almaniya və digər ölkələr də var.
Avropa İttifaqı da həmrəyliyə görə Azərbaycana təşəkkür etməyi unutmayıb. Belə ki, Avropa İttifaqının (Aİ) Azərbaycandakı nümayəndəliyinin rəhbəri, səfir Kestutis Yankauskas həmrəyliyə görə ölkəmizə təşəkkür edib.
Azərbaycan dövlətinə, ölkəmizə göstərdiyi nəcib nümunələrə görə minnətdarlıq edənlərin çox qısa bir sırasını sizə təqdim etdik.
“Bunun nəticəsidir ki, bu gün müxtəlif beynəlxalq təşkilatlar, dövlətlər göstərdiyi bəşəri həmrəyliyə görə Azərbaycan dövlətinə, cənab Prezidentə təşəkkür məktubları ünvanlayırlar”
Pandemiya ilə mübarizədə Azərbaycanın göstərdiyi bəşəri həmrəyliyə görə də regionda lider olmasının təsadüfi olmadığını deyən “Səs” qəzeti və eyniadlı informasiya agentliyinin rəhbəri, politoloq Bəhruz Quliyevin bildirdiyinə görə, buna Azərbaycanın mövcud iqtisadi-siyasi, mənəvi gücü, eyni zamanda, beynəlxalq nüfuzu imkan verir ki, dövlətimiz bəşəri həmrəyliyə qoşulsun və bu sahəyə böyük töhfələr versin. “Bu gün bəşəriyyətlə COVID-19 pandemiyası arasında “soyuq müharibə”gedir. Müasir dünyaya “soyuq müharibə”nin şərtlərini COVID-19 diqtə edir. Ona görə də bu gün bütün dövlətlər, birliklər, güclər pandemiyaya qarşı mübarizədə birləşib. Sözsüz ki, bu dövlətlər sırasında Azərbaycanın xüsusi yeri var. Azərbaycan COVID-19 pandemiyası ilə bağlı həyata keçirilən bəşəri mübarizəyə qoşulmaqla, bu mübarizəyə maddi-mənəvi dəstək verməklə, bu sahədə həmrəylik göstərməklə, bir daha özünün real gücünü ortaya qoymuş oldu. Azərbaycan dövləti həm ölkə daxilini bu virusa geniş yoluxmadan qoruyur, həm insanların təhlükəsizliyini, rifahını təmin edir, həm bölgədə başqa ölkələrə dəstək göstərir, eyni zamanda da, bütövlükdə, bütün dünyaya həmrəylik göstərir. Azərbaycanın koronavirus pandemiyası ilə bağlı bəşəri mübarizəyə verdiyi ciddi dəstək, beynəlxalq aləmlə həmrəylik nümayiş etdirməsi ayrı-ayrı dövlətlər, beynəlxalq təşkilatlar tərəfindən təqdir edilir. Bunun nəticəsidir ki, bu gün müxtəlif beynəlxalq təşkilatlar, dövlətlər göstərdiyi bəşəri həmrəyliyə görə Azərbaycan dövlətinə, cənab Prezidentə təşəkkür məktubları ünvanlayırlar. Həqiqətən də Azərbaycanda həyata keçirilən mübarizə tədbirləri, yoluxmanın az olması, ölüm faizinin cüzilik təşkil etməsi, sagalanların isə yoluxanları üstələməsi beynəlxalq qurumların da gözündən qaçmır və onlar bu məqamları da vurğulayırlar. Cənubi Qafqazda lider dövlət olan Azərbaycanın pandemiyaya qarşı mübarizə metodu bir Azərbaycan modeli kimi öyrənilməkdədir. Bilirsiniz ki, cənab Prezidentin təşəbbüsü ilə bu günlərdə Türkdilli Dövlətlərin Əməkdaşlıq Şurasının onlayn iclası keçirildi. Məlumdur ki, Türk Şurasına Azərbaycan sədrlik edir. Türk Şurasının onlayn iclasında da bütün çıxışlar, fikirlər, müzakirələr COVID-19 pandemiyası ilə mübarizəyə yönəldi. Eyni zamanda, bütün türkdilli dövlətlərin də gəldiyi qənaət bu oldu ki, Azərbaycan bu prosesdə fərqli mübarizə üsulu ortaya qoyub, pandemiya ilə mübarizədə daha aktiv və fəaldır, yenilikçidir” - deyə bildirən B.Quliyev hesab edir ki, Azərbaycan dövləti, bütövlükdə, pandemiya ilə mübarizəyə ən çox töhfə verən dövlətlərdəndir. “Artıq beynəlxalq müşahidələr də göstərir ki, Azərbaycan dövləti bu sahədə nə qədər ciddi iş ortaya qoyub. Ölkəmizin pandemiya ilə mübarizədə gördüyü işlər, həyata keçirdiyi tədbirlər yalnız ölkəmizə deyil, bütövlükdə, qonşu ölkələrə də dividend gətirə bilər”.
B.Quliyev hesab edir ki, dövlətimizin bu istiqamətdə bəşəriyyətə verdiyi həmrəylik töhfəsinin bu gün Azərbaycanın bir dövlət kimi dünyada xüsusi yerə, nüfuza malik olmasını bir daha sübut edir.
İradə SARIYEVA
