Azərbaycanın Ermənistan tərəfindən işğal edilmiş ərazilərində yaradılan separatçı rejimə Araik Arutyunyan rəhbərlik edəcək. Qondarma qurum tərəfindən "prezident seçkilərinin ikinci turu" keçirilib. Baxmayaraq ki, beynəlxalq təşkilatlar, 120-dən çox ölkə hələ qondarma "seçkiləri" tanımadıqları barədə bəyanat vermişdi, separatçı rejim qanunsuz əməlini davam etdirərək, "seçkilərin ikinci turu"nu keçirib. Separatçıların yeni rəhbəri "seçilən" Arutyunyan daha əvvəl Qarabağda yaradılan qondarma qurumun "baş naziri" olub. Onun 88 faizlə Mailyana qalib gəldiyi bildirilir. Dağlıq Qarabağ dünyada yeganə bölgə olub ki, separatçılar, koronavirusun yayılmasına baxmayaraq, insanları təhlükə altına ataraq “seçki” keçirməyə qərar veriblər. Halbuki, seçkinin “ikinci turu” ərəfəsində Dağlıq Qarabağda onlarla virusa yoluxanlar var idi.
Görünən bu oldu ki, separatçıların artıq keçmiş lideri Bako Saakyan Araik Arutyunyanın xələfi seçilməsi üçün, nə yolla olursa-olsun, “ikinci turu” keçirməyə qərar verib. Həmçinin qeyd olunur ki, “seçkinin” təxirə salınması separatçılarla Ermənistan hakimiyyəti arasında suallar yarada bilərdi. Tamamən Ermənistandan asılı olan Dağlıq Qarabağ separatçıları “seçkini” keçirməklə İrəvanın da mövqeyini nəzərə alıblar. Qondarma qurumda keçirilən saxta “seçkilər” Ermənistanın daxili siyasi intriqalarına dair hansı mahiyyətləri üzə çıxardı? Prosesdən Paşinyan qalib çıxdı, yoxsa digərləri? Siyasi elmlər doktoru Hatəm Cabbarlı “Bakı-Xəbər”ə açıqlamasında bildirdi ki, pandemiyanın geniş yayıldığı dönəmdə ermənilərin, saxta da olsa, iki tur “seçki” keçirməsi növbəti rusvayçılıq idi:
Hatəm Cabbarlı:“Bu seçim nə Ermənistanda, nə də qondarma qurumda formalaşan hərbi elitanın maraqlarına cavab verir”
“Saxta “seçkiyə” bir neçə gün qalmış namizədlər seçkinin təxirə salınacağını anlayışla qarşılayacaqlarını desələr də, bu olmadı. Bako Saakyan “seçkinin” keçirilməsində israrlı olduğunu ortaya qoydu. “Seçkilərdə” Bako Saakyanın dəstəklədiyi Arutyunyan qalib gəldi. Ehtimal olunurdu ki, seçkilər başqa zamana keçiriləcəyi təqdirdə digər favorit namizəd Mailyan qalib gələcək. Arutyunyanın “prezidentliyini” seçilmək yox, təyinat adlandırmaq olar. Ermənistanla qondarma qurum arasında ziddiyyətin olmasına baxmayaraq, Nikol Paşinyan Arayik Arutyunyanı təbrik etdi. Maraqlıdır ki, ona sabiq prezident Serj Sarkisyan da dərhal təbrik ünvanladı. Paşinyan bu estafetdə Mailyanı dəstəkləyirdi. Bu nəticələr həm Ermənistanın daxilində, həm də İrəvanla Xankəndi arasındakı münasibətlərin gərginləşməsinə səbəb olacaq. Faktiki olaraq, Paşinyan bu prosesdən məğlub çıxdı. Separatçı rejimin başçısı Bako Saakyan aprelin 14-də ənənəvi “erməni-rus dostluğu əbədidir” deməklə “seçkidə” Moskvanı razı salacaq adamın “qalib olacağı” mesajını vermişdi. Nəticə də elə oldu. Hazırda Ermənistanda həbsdə olan, Xocalı soyqırımının törədilməsinə başçılıq etmiş Robert Koçaryandan başlayan bu zəncir qırılmadı və Araik Arutyuyan “prezident seçildi”. Paşinyan fakt qarşısında qalıb. Arutyunyanla işləməyə məhkumdur. Hazırkı şəraitdə Paşinyan münasibətləri gərginləşdirməyi optimal variant kimi qəbul etmədi. “Seçkilər” dönəmində də Nikol Paşinyan hansı namizədi dəstəklədiyi ilə bağlı konkret fikir bildirmədi. Ancaq ümumi mənzərə bundan ibarət idi ki, Paşinyan Masis Mailyanın seçilməsində maraqlı idi. Arayik Arutyunyan oliqarxdır. Qondarma qurumda ən zəngin adamlardan sayılır. Onun Ermənistanla da biznes əlaqələri və maraqları var. Siyasətçi olmaqla yanaşı, həm də iş adamı olan Arutunyan üçün şəxsi maraqlar da önəm daşıyır. Bu baxımdan da onun Paşinyanla münasibətləri tam korlamayacağını təxmin edə bilərik. “Seçkilərdə” 45 faiz “seçicinin” iştirak etdiyi bildirilsə də, bu inandırıcı deyil. Belə pandemiya şəraitində sadə adamların qutu başına getməsi inandırıcı görünmür. Buna baxmayaraq, fakt budur ki, növbəti dönəmdə qondrama quruma Arayik Arutyunyan rəhbərlik edəcək. Bu seçim nə Ermənistanda, nə də qondarma qurumda formalaşan hərbi elitanın maraqlarına cavab verir. Həmin dairələr “parlaq” hərbi keçmişi olan Balasanyanın seçilməsini istəyirdilər. Onun göstəricisi 3-cü yer oldu. Hələlik Paşinyanla Arutunyan qısa dönəm üçün bir-biri ilə məcburi əməkdaşlıq etməyə məhkumdurlar”.
Məhəmmədəli QƏRİBLİ
