Prezident İlham Əliyevin ölkəmizdə koronavirus pandemiyasının geniş yayılmasının qarşısının alınması, əhalinin sağlamlığının qorunması ilə bağlı gördüyü işlər xalqımız tərəfindən yüksək qiymətləndirilir. Bununla əlaqədar Prezidentə minnətdarlıq məktubları gəlməkdə davam edir. Bütün baş verənlər, Azərbaycanın koronavirusa qarşı apardığı mübarizə, qazanılan nəticələr təkcə ÜST, müxtəlif ölkələr tərəfindən müsbət qarşılanıb təqdir edilmir, bu prosesi sadə azərbaycanlılar da izləyir. Bu elə bir prosesdir ki, azərbaycanlılar təkcə bunu izləmirlər, həm də yaşayırlar, görürlər, öz həyatlarında hiss edirlər. Və təbii ki, həm də dəyərləndirirlər.
Əslində, bütün dünyada konkret məsələyə ən düzgün qiyməti sıravi vətəndaş verir və bu qiymətin nədən ibarət olduğunu sıravi insanların bu mübarizənin əsl müəllifi olan Prezident İlham Əliyevə ünvanladığı məktublardan aydın görmək olar. Ölkə daxilindən və xaricindən sadə vətəndaşların Prezidentə ünvanlanan dəstək məktublarında əsasən hansı ideyalar ifadə olunur?
Aydın Hüseynov:“Ölkənin dayanıqlığını, gələcək inkişafını və vətəndaşların hazırkı dönəmdə sağlamlığını Prezidentin necə düşündüyü kiçik detalları ilə xalqa aydın olub”
Millət vəkili Aydın Hüseynov “Bakı-Xəbər”ə açıqlamasında bildirdi ki, sadə vətəndaşlardan gələn məktublar ölkə başçısının yürütdüyü siyasətə bəslənən məhəbbətin ən səmimi ifadəsidir:“Biz bilirik ki, ölkə başçısı bütün seçkilərdə xalqdan böyük dəstək alaraq Prezident seçilir. Ölkə vətəndaşlarının böyük əksəriyyətinin ona səs verməsi cənab İlham Əliyevin yürütdüyü siyasətin dəstəkləndiyi anlamına gəlir. Pandemiya kimi həssas dönəmdə isə Prezident xalqa bəslədiyi məhəbbətin ən bariz nümunəsini ortaya qoymuş oldu. Vətəndaş gördü ki, hətta ən ağır şəraitlərdə belə Prezident onların arxasındadır, onların vəziyyətini düşünür. İstər daxildə, istərsə də xaricdə yaşayan xalqımızın nümayəndələri gördülər ki, Prezident pandemiya ilə bağlı gərginliyin aradan qaldırılması istiqamətində əzmlə çalışır. Azərbaycan vətəndaşına məlum oldu ki, Prezident bütün addımları ölkə vətəndaşının sağlam qalması üçün atıb. Məhz buna görə də sadə vətəndaşlar öz hisslərini məktub vasitəsilə ifadə edirlər. Karantin rejiminin tətbiqi, pandemiya ilə bağlı yeni xəstəxanaların tikilməsi, sosial yardımların operativ şəkildə çatdırılmasına həmin məktublarda işarə olunur. Bunu doğru qəbul edilən qərarlar kimi dəyərləndirirlər. Hökumətin pandemiya ilə bağlı xüsusi dəstək proqramını qəbul etməsi də məktublarda xalqın maraqlarının ifadəsinə cavab verən nüans kimi qabardılır. Azərbaycanda görülən bu işlərin başqa dövlətlər üçün nümunə və təcrübə olduğuna dair də nəticələr çıxarmaq olur. Azərbaycan vətəndaşı qürur duyur ki, dövlətinin rəhbəri bütün məsələlərdə onun yanındadır. 2.5 milyard vəsaitin ayrılması Azərbaycan vətəndaşı, onun sağlamlığı üçündür. Həmçinin məktubalrdan bu nəticəyə gəlinir ki, Prezidentin atdığı addımlar yalnız pandemiya dönəmi deyil, postpandemiya zamanı üçün də nəzərdə tutulub. Ölkənin dayanıqlığını, gələcək inkişafını və vətəndaşların hazırkı dönəmdə sağlamlığını Prezidentin necə düşündüyü kiçik detalları ilə xalqa aydın olub. Məktubların çoxunu oxumuşam. Orda bir səmimiyyət, xalqla Prezidentin arasındakı vəhdəti gördüm. Artıq sadə xalq nümayəndələri arada heç bir vasitəçi olmadan belə ölkə başçısına öz duyğularını ifadə edə bilirlər. Bu olduqca sevindirici haldır”.
Məhəmmədəli QƏRİBLİ
