Müstəqillik tariximizin ilk video dövlət müşavirəsi bir sıra xarakterik əlamətlərlə fərqləndirilə bilər. Ölkənin daxili və xarici siyasəti, pandemiya ilə mübarizə, davamlı islahatlar, iqtisadi sabitlik, Qarabağ problemi, bəzi beynəlxalq dairələrin Azərbaycana qərəzli yanaşmalarını inadla davam etdirmələri və s. ilə bağlı düşündürücü mesajlar sözügedən konfransa geniş marağı təmin edən amillərdi.
Bunu baki-xeber.com-a açıqlamasında eyniadlı saytın və qəzetin baş redaktoru, politoloq Aydın Quliyev deyib. Onun sözlərinə görə, Azərbaycanın yeni daxil olduğu daxili siyasi konfiqurasiyanın əsas əlamətlərinin təqdim olunması baxımından videokonfransın rolu barədə ayrıca danışmağa ehtiyac yaranır:
“Prezident bu mərhələnin bir neçə əsas xüsusiyyətini göstərdi. Siyasi qüvvələrin mütləq əksəriyyətinin dövlətçilk mövqeyində dayandığını bildirən Prezident, əslində cəmiyyətimizdə real siyasi qüvvələr nisbətinin aydın mənzərəsini çəkdi. Bu mənzərə onu ifadə edir ki, bəzi müxalif dairələrin "böyük-böyük"iddialarına baxmayaraq, Azərbaycanda siyasi qüvvələr nisbəti tam şəkildə hakimiyyətin tərəfindədir”.
A.Quliyev bildirdi ki, Prezident yeni konfiqurasiya mərhələsində müxalifətin fərqli perspektivlərə malik müxtəlif qruplaşmalarının da sərhədlərini aydın göstərdi:”Təbii ki, yeni siyasi konfiqurasiyada heç də bütün müxalif sayılan qrupların yeri yoxdur və olmayacaq. Prezident aydın bildirdi ki, yalnız dövlətçilik mövqeyi olan, siyasi dialoqa gedən, ifrat ittihamçılıqdan uzaq, dövlət idarəçiliyində qanuni üsullarla birbaşa və dolayı iştiraka qadır müxalif qüvvələr yeni konfiqurasiyada təmsil oluna biləcəklər”.
Politoloqun sözlərinə görə, illərdən bəri ardıcıl boykot bəyanatları verən, siyasi proseslərdən özünü kənarda qoyan, siyasi proseslərdə iştirakın ancaq küçə-müydan aksiyaları formasını məqbul sayanların, təbii ki, yeni konfiqurasiyada təmsilçilik şansları olmayacaq:”Dövlətin bu günlərdə koronavirusla ağır mübarizəsinin özünü də qaralamaq istəyən opponentlərin siyasi müxalifət adı altında yeni konfiqurasiyaya düşmək şanslarl necə ola bilər ki?! Normal məntiqin hökmünə görə, bu ağır günlərdə özlərini hətta barışmaz radikal sayanlar da müxalifətçilik fəaliyyətinə ara verərək, dövlətin ümumi bəla ilə mübarizə tıdbirlərinə dəstək verməli, ya heç olmasa maneçilik etməməli idilər. Əvəzində ifrat ittihamçılıq, hətta pandemiya əleyhinə dövlət tədbirlərinin özünün də qaralanmasına qədər dərinləşdirildi. Koronavirusla mübarizə Fonduna hətta "1 manat" belə kömək etməyi özünə borc bilməyən müxalif qruplaşmanın Azərbaycanın yeni siyasi konfiqurasiyasinda necə iştirak etmək şansı qala bilər?!”
A.Quliyevin sözlərinə görə, hər bir dövlətin tarixində elə məqamlar olur ki, o məqamda istənilən siyasi qüvvə düşmən deyil, ya tərəfdaş, ya da sağlam və qərəzsiz opponent olmağı bacarmalıdır:”Yoluxan və ölənlərin statistikası üstündə siyasət qurmaq taktikasını xalq da düşmənçilik kimi qəbul edir və belə taktika ilə gedənlər, nəinki yeni siyasi düzəndə təmsil olunmaq şansını itirir, ümumiyyətlə sivil siyasi sistemin elementi kimi yox olub gedir.
Prezident sivil siyasi müxalifətin həqiqi güc göstəricilərinin də nələrdən ibarət olduğunu təhlil etdi. Göstərdi ki, müxalifətin güc anlayışı heç də qanunsuz aksiyalarda, seçki boykotlarında, hər şeyi pisləməkdə, hər şeyi qara rəngdə görməkdə, başqasının uğurlarını danmaqda deyil. Müxalifətin gücü odur ki, hakimiyyətin səhv və ya görmədiklərini sağlam şəkildə görsün, proqram və təlimatlar, qrafiklər və qanun layihələri təqdim etsin, dövlət idarəçiliyində iştirak üçün sağlam kadrlar yetişdirsin, dövlətçilik məsələlərində isə açıq mövqe göstərməyi özünə yersiz şəkildə eyib bilməsin. Beləliklə, yeni siyasi düzən şəraitində perspektivdə iki taleyi olan müxalifət görmək mümkündür:özünü xalqdan və siyasi sistemdən kənarda qoyaraq tam iflas olmaq yolunu tutmuş radikal müxalifət və güclü sivil qüvvəyə çevrilmək şansına malik müxalifət. Kimin yolunun üzun olacağının artıq hər qüvvənin özündən asılı olduğu dövr başlayır. Milli Məclisdə və ondan kənarda ölkənin sivil müxalfətinə iddialı partiyaların özləri üçün də yeni dövr başlayır. Bu dövr önlar üçün sınaqdır. Onlara Azərbaycanın sivil və hakimiyyətə legitim təsirli güc parametrlərinə malik müxalifəti olduqlarını sübut etmək şansı verılıb. Bu sınaqdan çıxa bilməyən konstruktiv partiyalar da radikallar kimi siyasi sistemdən kənara qoyula bilər”.
Baki-xeber.com
