2020-ci ilin birinci rübünün sosial-iqtisadi yekunlarına həsr olunan videokonfransda Prezident İlham Əliyev ölkə həyatının bütün istiqamətlərinə diqqət çəkib və qarşıda duran vəzifələrin həyata keçirilməsi ilə bağlı mühüm ismarıclar verib. İlham Əliyev bildirib ki, bu islahatların məntiqi davamı parlament seçkiləri idi:
“Parlament seçkiləri bir daha xalqımızın iradəsini ifadə etdi, bir daha göstərdi ki, apardığımız siyasət Azərbaycan vətəndaşları tərəfindən bəyənilir, dəstəklənir və parlament seçkiləri demokratik inkişaf istiqamətində atılmış növbəti addımdır. Seçkilərdən sonra parlamentin tərkibi böyük dərəcədə, rəhbər orqanları isə tam dəyişdirildi. Tarixdə ilk dəfə olaraq, müxalifət nümayəndəsi Milli Məclisin sədrinin müavini vəzifəsinə seçildi. Hesab edirəm ki, bu, siyasi sistemin təkmilləşdirilməsi və siyasi münasibətlərin sağlam zəmində qurulması istiqamətində atılmış önəmli addımdır. Eyni zamanda, tarixdə ilk dəfə olaraq, parlament komitələrinə müxalifət nümayəndələri başçılıq edirlər, həm sədr, həm müavin vəzifələrində. Hesab edirəm ki, bu da çox önəmli addımdır və ilk növbədə, siyasi sistemin yeni konfiqurasiyasına yol açan bir addımdır, eyni zamanda, Milli Məclisdə gedən proseslərə müsbət təsir göstərəcək. İndiki şəraitdə biz açıq-aydın görürük ki, siyasi qüvvələrin mütləq əksəriyyəti dövlətçilik prinsiplərini hər şeydən üstün tutur və bu da əslində, bizim əsas məqsədimizdir. Çünki əsas məqsədimiz elə siyasi sistem yaratmaqdır ki, fərqli baxışlardan asılı olmayaraq, hər bir siyasi qüvvə üçün bir amal müqəddəs olsun, o da dövlətçilik, müstəqillik, azadlıq, rifah və inkişafdır. Belə olan halda həm siyasi müstəvidə işlər müsbət istiqamətdə gedəcək, eyni zamanda, ölkədə mövcud olan problemlər daha tezliklə həll olunacaq. Çünki müxalifət nümayəndələri bəzən iqtidar nümayəndələrinin görmədiyi qüsurları görürlər, onları dilə gətirirlər, onları diqqətə çatdırırlar və bu, çox müsbət haldır. Ancaq, eyni zamanda, bir daha demək istəyirəm ki, bütün siyasi qüvvələr üçün bir amal, bir məsələ toxunulmaz olmalıdır, bu da bizim müstəqilliyimiz, dövlətçiliyimiz və dövlət maraqlarıdır”.
Göründüyü kimi, Prezident İlham Əliyev indiki şəraitdə siyasi qüvvələrin mütləq əksəriyyətinin dövlətçilik prinsiplərini hər şeydən üstün tutduğunu vurğulamaqla, bir daha antimilli qüvvələrə və onlardan öz maraqları üçün istifadə edənlərə xatırlatdı ki, Azərbaycanın islahatlar yolu ilə yeni inkişaf mərhələsinə qədəm qoyması, bu istiqamətdə inamla addımlaması xalqın, siyasi qüvvələrin mütləq əksəriyyətinin birmənalı şəkildə dəstəklədiyi, alternativi və geriyə dönüşü olmayan yoldur. Siyasi qüvvələrin mütləq əksəriyyətinin dövlət prinsiplərini hər şeydən üstün tutması olduqca müsbət göstəricidir. Buna necə nail olunub?
Fazil Mustafa:“Artıq ötən əsrin 90-cı illəri deyil ki, ölkənin xarici modellərlə idarə olunmasına maraq göstərilsin”
Parlamentdə müxalifəti təmsil edən Böyük Quruluş Partiyasının sədri Fazil Mustafa “Bakı Xəbər”ə açıqlamasında bildirdi ki, yeni siyasi konfiqurasiyanın formalaşması istiqamətində ilkin addımlar atıldı:“Birinci mərhələdə parlament azlığı sayılan partiyalar qanunverici orqanın işinə cəlb edildi. İkinci mərhələdə parlament müxalifəti ideyası inkişaf etdirilməlidir. Bu çox normal modeldir. Siyasi mübarizənin episentrinin parlamentə köçürülməsi çox doğru addım sayılar. Dövlətin hər hansı təlatümdən qorunması baxımından da vacib amillərdən biridir. İlkin təmsil,ilik müsbət aura yaratdı. Əvvəllər müxalifət prosesdən kənardaydı, parlament idarəçiliyində YAP və bitərəflər təmsil olunurdu. Ancaq bir vacib detala da fikir verməliyik. Parlamentdə azlıqda olan partiyaların heç də hamısı müxalif mövqedə deyil. Onların arasında iqtidarın kursunu tam dəstəkləyən partiyalar da var. Yəni parlament azlığı deyəndə, yalnız orda təmsilçilik qazanan müxalif partiyalar nəzərdə tutulmur. Radikal, dövlətə qarşı sərt mövqe sərgiləyən müxalifətçilik bəyənilmirsə, qəbul edilmirsə, bunun alternativi sayılan parlament müxalifəti ideyası canlandırılmalıdır. Cünki radikal müxalifətlə bağlı müəyyən neqativ fikirlər səslənəndə bundan müxalif mövqedə olan istənilən adam pay götürə bilir. Bu ay;rım olarsa, hər kəs daha yaradıcı və konstruktiv müxalifət olmağa maraq göstərəcək. Yəni ölkə başçısının da ifadə etdiyi kimi, hakimiyyətə qarşı müxalif olursan, amma ümumilli məsələlərlə bağlı dövlətlə əməkdaşlıq edirsən. Son vaxtlar fikir verdinizsə, özünə radikal müxalifət deyən qüvvələrin çoxu situasiyanı doğru dəyərləndirə bilmədi. Bu da onların yaradıcılıq qabiliyyətlərinin aşağı olması ilə bağlıdır. Mən düşünürdüm ki, bir az yaradıcı hisslərə sahib olan siyasilər bəyanat verə bilərdilər ki, biz bu məsələdə hakimiyyətin atdığı bütün addımları dəstəkləyirik. Heç onların ən radikal tərəfdarları belə buna etiraz etməyəcəkdi. Çünki bu vəziyyət yalnız bizim ölkədə hakim deyil. Dünyanı bürüyən bəşəri mahiyyət alan problemlə bağlı dövlətin yanında olub, atılan addımları dəstəkləmək olardı. Bu ideyanı dəstəkləməmək özünü kənarda qoymaq deməkdir. Məhz bu baxımdan da hesab edirəm ki, Prezidentin vurğuladığı amillər kifayət qədər haqlıdır. Çünki böyük əksəriyyət dövlətçilik mövqeyindədir. Amma müəyyən istisnaları da görürük. Hansısa siyasi qüvvə belə ağır şəraitdə belə dialoq üçün təşəbbüs etmirsə, bu olduqca zərərli yanaşmadan xəbər verir. Ölkə başçısının bu səpkidə səsləndirdiyi iradları da haqlı sayıram”. Azərbaycanın siyasi qüvvələrinin mütləq çoxluğunun dövlətçilik mövqeyində durmağa necə nail olmaqları ilə bağlı isə millət vəkili bunları dedi:“Bu gün Azərbaycanda səmimi müxalifət anlayışı olan insanlar da anlayır ki, zaman başqadır. Artıq ötən əsrin 90-cı illəri deyil ki, ölkənin xarici modellərlə idarə olunmasına maraq göstərilsin. Hansısa xarici qüvvələrin dəstəyi ilə hakimiyyətə gəlmə mexanizmləri də bura üçün keçərsizdir. Yeganə uğur faktoru xalqın dəstəyi ola bilər. Məhz bu səbəbdən də siyasi sistem dövlətçilik anlayışını dərindən mənimsəyərək, dövlətçiliklə bağlı mövqedə mühafizəkar yanaşma ortaya qoyur. Bu çox yaxşıdır. Xalqın hamısı ədalət, demokratiya axtarışında deyil. Belə bir vəziyyətdə siyasi qüvvələr də öz hərəkətlərinə təftişçi yanaşır. Məlum olur ki, köhnə metodlar işləmir. Fikir veririk ki, radikal müxalifət heç zamanın texnoloji imkanlarından belə yararlana bilmir. Normal esse yazmaq qabiliyyəti olan müxalifət niyə mitinq üçün meydan tələb etməlidir? Bacarsalar, elə sosial şəbəklərin yaratdığı imkanlar hesabına öz auditoriyalarına xitab edə bilərlər. Təəssüf ki, yalnız kiminsə şəklini qoyub, onu söydürməklə məşğul olurlar”.
Deputatın sözlərinə görə, cəmiyyətimizin problemlərindən biri də kütləyə yaltaqlanmaqdır:“Ziyalılar heç vaxt bu mövqedə olmamalıdırlar. Həqiqəti söyləmək lazımdır. Hakimiyyətdə qorxub kimsə nəyisə söyləməyə bilər. Ancaq kütlədən qorxub həqiqətləri gizlətmək xalqın gələcəyi ilə bağlı məsuliyyətdən boyun qaçırmaq anlamına gəlir. Müxalifətin də əsas vəzifəsi xalqı küyçülüyə yox, demokratiyaya hazırlamaq olmalıdır. Bunu etmədən hakimiyyətə gəlmək olmaz. İndiki hakimiyyət xalqla arasında olan məsafəni yaxınlaşdıra bilib. Xalqın dəstəyi olmasaydı, heç bir hakimiyyətin ömrü 27 il olmazdı. Hakimiyyət xalqın marağını müxalifətdən yaxşı təmsil edə bilir ki, özünü qoruya bilir. Düşünürəm ki, xalqın başlıca marağı təhlükəsizliklə bağlıdır. Bu gün radikal müxalifətin çağırışları xalqın təhlükəsizliyinə zəmanət vermir. İnad mübarizəsi olmamalıdır”.
Məhəmmədəli QƏRİBLİ
