Azərbaycan dövlətinin pandemiya dövründə həyata keçirdiyi tədbirlər, vətəndaşların sağlamlığının müdafiəsi istiqamətində gördüyü işlər nəticəsində koronavirus ölkəmizdə geniş şəkildə yayılmadı. Koronavirusun ölkəmizin sərhədlərinə yaxınlaşmadığı, lakin təhlükənin hiss edildiyi dövrdən başlayaraq lazımi təhlükəsizlik tədbirlərini həyata keçirməsi nəticəsində Azərbaycan böyük nəticələr əldə etdi. Halbuki, dünyanın inkişaf etmiş ölkələri pandemiyanı qeyri-ciddiyə aldıqları üçün ona qarşı heç bir təhlükəsizlik tədbiri görmədilər, nəticə də göz önündədir.
Prezident ilin birinci rübünün sosial-iqtisadi yekunlarına həsr olunan videokonfransda pandemiyanın dünya ölkələrinə vurduğu zərərdən danışıb və bildirib ki, dünya ölkələrinin pandemiya dövründə keçdiyi ağır proses bizim üçün də dərs olmalıdır, bundan ibrət götürməliyik: “...Koronavirus böyük bəladır, 100 mindən çox insanın həyatına son qoyub. Demək olar ki, dünyanın bütün ölkələrində koronavirusla bağlı problemlər yaşanır. Azərbaycan da dünyanın bir parçasıdır. Ancaq deyə bilərəm ki, qabaqlayıcı tədbirlər və düşünülmüş siyasət nəticəsində biz vəziyyəti nəzarət altında saxlayırıq. Hesab edirəm ki, bu günə qədər atılmış bütün addımlar düzgün istiqamətdə atılmış addımlardır. Məhz bu addımların atılması nəticəsində Azərbaycanda vəziyyət nəzarət altındadır. Əgər bu addımlar vaxtında atılmasaydı və biz düşünülmüş strategiya çərçivəsində məhdudlaşdırıcı rejimi mərhələli yollarla sərtləşdirməsəydik, bu gün xəstələrin sayı min yox, bəlkə də 10 min, bəlkə də 20 min ola bilərdi. Ən inkişaf etmiş ölkələrin təcrübəsi onu göstərir ki, heç bir ölkə özünü tam sığortalı hesab edə bilməz. Heç bir ölkənin səhiyyə sistemi bu xəstələrin artan dinamikasının qarşısında duruş gətirə bilməz. Ona görə bu, bizim üçün də dərs olmalıdır və mən bunu artıq bildirmişəm, bir daha demək istəyirəm ki, ibrət götürməliyik. Bizim bütün addımlarımız ölçülüb-biçilmiş addımlardır və təsadüfi deyil ki, bir neçə ölkə bizim təcrübəmizdən yararlanıb oxşar addımlar atır. Biz bunu görürük. Ona görə bizim bundan sonrakı addımlarımız elə atılmalıdır ki, insanların sağlamlığını, onların həyatını qoruya bilək...”. Dövlət başçısı “bu bizə dərs olmalıdır, bundan ibrət götürməliyik” deyəndə nələri nəzərdə tuturdu?
“Bu aspektdən də, sözsüz, bütün bu proseslərin özündən dərs götürməyin lazım olduğu...”
“Xalq Cəbhəsi” qəzetinin baş redaktoru, tanınmış politoloq Elçin Mirzəbəyli bizimlə söhbətində bildirdi ki, pandemiyanın yayılması dünya ölkələrinin bir çoxunun buna hazır olmadığını göstərdi. “Məlum olduğu kimi, koronavirus pandemiyası ilə bağlı mübarizə prosesi dünyanın bir çox ölkəsində idarəçilik sistemində olan çatışmazlıqları üzə çıxardı. Həm idarəçilik, həm iqtisadiyyatla bağlı problemlər, həm səhiyyə sistemində olan neqativ hallar ortaya çıxdı. Həmin dövlətlər, bütövlükdə, həm toplumun idarə edilməsi, həm dövlət idarəçilik mexanizmlərinin işləkliyi kontekstində, sosial faktor məsələsində və s. özlərinin kifayət qədər zəif olduqlarını nümayiş etdirdilər. Hadisələrin öncədən nəzərə alınmaması, ayrı-ayrı dövlətlərin fors-major hallara hazır olmaması, nəticə etibarilə, daha acınacaqlı bir vəziyyətin ortaya çıxmasına zəmin yaratdı. Azərbaycan ilk gündən önləyici tədbirlər həyata keçirdi və şübhəsiz, bu çevik qərarların qəbul edilməsində, innovativ texnologiyaların tətbiqində Azərbaycanda son dövrlərdə həyata keçirilən iqtisadi-siyasi, hüquqi islahatların müstəsna rolu var. Təbii ki, bu islahatlar həyata keçirilməsəydi, biz bu gün bütün müstəvilərdə tutumlu bir davranışın və çevik bir idarəçilik sisteminin şahidi olmazdıq. Bu aspektdən də, sözsüz, bütün bu proseslərin özündən dərs götürməyin lazım olduğu və çatışmazlıqların aradan qaldırılması üçün, şübhəsiz ki, müvafiq addımların atılması nəzərdə tutulur. Cənab Prezident öz nitqində qarşıdakı vəzifələr haqqında da geniş şəkildə danışdı. Qənaətimə görə, ayrı-ayrı istiqamətlər üzrə islahatların aparılması prosesi həm də çox güman ki, dövlət səviyyəsində nəzərə alınan və təhlil edilən problemlərin, çatışmazlıqların aradan qaldırılmasına yönəlib”.
Digər tərəfdən, bunun ictimaiyyətə hesablanmış mesaj olduğunu deyən E.Mirzəbəylinin sözlərinə görə, həmrəylik, birlik çox önəmli faktordur ki, Azərbaycan xalqı bunu nümayiş etdirdi. E.Mirzəbəylinin bildirdiyinə görə, amma, bütövlükdə, fərqi yoxdur, istər koronavirusla mübarizədə, yaxud hər hansı bir fors-major halında, digər proseslərdə daha məsuliyyətli, daha intizamlı davranmalıyıq. “Qənaətimə görə, nəticə çıxarmaq təkcə dövlət strukturları üçün deyil, eyni zamanda, bütün vətəndaşlar üçün əhəmiyyət kəsb edir” - deyə E.Mirzəbəyli qeyd etdi.
İradə SARIYEVA
