Məlum olduğu kimi, martın 31-də işğal altındakı Dağlıq Qarabağda “prezident və parlament seçkiləri” keçirilir. “Prezident seçkisində” 14 namizəd var. “Parlament seçkisində” isə 12 siyasi partiya iştirak edir. 33 yerlik “parlamentə” 361 namizəd var. Dünyanın koronavirusla mübarizə apardığı, Ermənistanın özündə virusa yoluxanların sayının artdığı bir zamanda erməni separatçıları “seçkiləri” təxirə salmadılar. Halbuki, “prezidentliyə” namizədlərdən 4-ü virusla əlaqədar “seçkiləri” təxirə saxlamağa çağırış etmişdi. Demək, həmin “namizədlərin” virusun Dağlıq Qarabağda yayılması haqqında səhih məlumatları var ki, “seçkini” təxirə salmaqda israr etmişdilər. Ən maraqlısı isə budur ki, Ermənistan və separatçı qurumun nəzarəti altında olan bütün KİV “seçkilərdə” beynəlxalq müşahidəçilərin də iştirakına dair təbliğat aparır, hətta onların sayını belə qeyd edirlər.
Ermənistanda virusa yoluxanların sayı 500-ə yaxınlaşıb. Hətta qeyd edilir ki, virus işğalçı orduya da sirayət edib. Bu amillər Dağlıq Qarabağda virusun olmasını şərtləndirə bilir. Belə olan təqdirdə Ümumdünya Səhiyyə Təşkilatı bütün region üçün təhlükə mənbəyi sayılan bu qondarma “seçkilərin” ləğvini niyə tələb etmir?
Azərbaycan Milli İstiqlal Partiyasının funksioneri Elşən Mustafayev “Bakı-Xəbər”ə açıqlamasında bildirdi ki, belə bir addımın atılması həm də beynəlxalq hüququn tapdanması anlamına gəlir:“Təəssüflər olsun ki, son 30 ilə yaxın müddətdə biz qondarma qurumda müəyyən adlar altında keçirilən seçki şoularına etiraz etsək də, beynəlxalq birliyin buna sərt təpkisini görmədik. Bu gün Azərbaycanın Ermənistan tərəfindən işğal altında saxlanılan Dağlıq Qarabağ bölgəsində keçirilən qondarma “prezident və parlament” seçkiləri Dağlıq Qarabağda beynəlxalq hüquqa zidd olan mövcud rejimin birtərəfli qaydada qanuniləşdirilməsi cəhdinin daha bir nümunəsidir. Bu addım BMT Təhlükəsizlik Şurasının və ATƏT-in qərar və qətnamələri də daxil olmaqla, beynəlxalq hüququn açıq şəkildə pozulmasıdır. Bununla yanaşı, saxta “seçki” dünyanın bütün ölkələrində mühüm yarışların, toplantıların təxirə salındığı bir zamanda keçirilir. Bu həm də bəşəriyyətə, insanlığa edilən hörmətsilikdir. Hətta xüsusi pafosla prosesə beynəlxalq müşahidəçilərin də qatıldığını deyirlər. Bütün region, hətta dünyanın bir çox ölkəsini virusa yoluxma risqi qarşısında qoyan qondarma rejimə qarşı susqun mövqe bizi təəccübləndirir. Niyə Ümumdünya Səhiyyə Təşkilatı bu faktı bəşəriyyətə qarşı cinayət kimi bəyan edib, “seçkinin” keçirilməsini qadağan edən çağrış səsləndirmir? Bütün bunlar bir daha ikili standartlı yanaşmanın göstəricisi sayılmalıdır. Biz bütün kanallarla dünya üçün çox ağır olan bu sınaq zamanı saxta seçkilərin keçirilməsinə bəslənən laqeyd münasibəti ifşa etməliyik”.
Məhəmmədəli QƏRİBLİ
