Koronavirus üzündən dövlətlər arasında dayanan əlaqələr bu gün Cənubi Qavqaz ölkələri arasında işğalçı Ermənistana daha çox təsir göstərməyə başlayır. Hətta erməni medisı yazır ki, bu gedişlə yaxın aylar ərzində Ermənistan iqtisadiyyatının tam çöküşünə şahidlik etmək mümkündür. Xatırladaq ki, hazırki pandemiya durumunda ən pis vəziyyət Ermənistandadır. Bəzi mənbələrə əsasən, Ermənistanda koronavirusa yoluxanların sayı 500 nəfərdən çoxdur. Yəni onsuz da zəif olan Ermənistan iqtisadiyyatı koronavirus səbəbindən çox ağır durumdadır.
Belə vəziyyətdə düşmən artan narazılıqdan diqqəti yayındırmaq üçün yenə cəbhə təxribatlarını artırır. Xüsusən də dövlət sərhədində. Xatırladaq ki, bu günlərdə Ermənistan Silahlı Qüvvələri dövlət sərhəd xəttinin Qazax rayonu istiqamətində yenidən təxribata cəhd edib. Təxribata cəhd edən 3 müqaviləli düşmən hərbçisi yaralanıb. Noyemberyan tibb mərkəzinin növbətçi həkimi Naira Taryanın sözlərinə görə, hərbçilərdən birinin vəziyyəti ağırdır, o, göz nahiyəsindən yaralanıb. Digər 2 hərbçi isə qol və ayaq nahiyəsindən yaralanıb. Təxribatçı erməni hərbçilərin İrəvana köçürüldüyü bildirilir. Düşmən baş verənlərə görə mzsuliyyəti Azərbaycan tərəfinin üzərinə atmağa çalışır. Amma Dövlət Sərhəd Xidməti bu xüsusda düşmənin yalanını yenidən ifşa edib. Qurumun məlumatında bildirilir ki, son aylar ərzində Azərbaycan-Ermənistan dövlət sərhədinin Qazax rayonu ərazisindən keçən hissəsində Ermənistan Silahlı Qüvvələrinin bölmələri tərəfindən əməliyyat şəraitinin kəskin gərginləşdirilməsi məqsədilə çoxsaylı təxribatlar törədilib, təmas xəttinin yaxınlığında yerləşən yaşayış məntəqələrimiz və kənd yollarında hərəkət edən mülki nəqliyyat vasitələri iri çaplı silahlardan və snayper tüfənglərindən davamlı surətdə atəşə tutulub. Eləcə də Ermənistan Silahlı Qüvvələrinin kəşfiyyat-diversiya qrupları tərəfindən sərhəd-döyüş məntəqələrimizin dislokasiya yerlərinə basqın cəhdləri edilib, sərhədçilərin sayıqlığı nəticəsində düşmən təxribatlarının qarşısı alınıb və onlar itki verməklə geriyə qaçmaq məcburiyyətində qalıblar: “Ermənistanla dövlət sərhədində əməliyyat şəraitinin ciddi gərginləşləşməsi barədə tərəfimizdən mütəmadi olaraq məlumat verilib, Azərbaycan Respublikasının beynəlxalq səviyyədə tanınmış sərhədlərini qoruyan Dövlət Sərhəd Xidmətinin hərbi qulluqçularına qarşı düşmən tərəfinin bütün təxribatlarına adekvat cavabların veriləcəyi və nəticədə baş verəcək bütün fəsadlara görə məsuliyyətin Ermənistanın hərbi-siyasi rəhbərliyinin üzərinə düşməsi xüsusi qeyd olunub. Martın 30-da Ermənistan kütləvi informasiya vasitələrində bu ölkənin Müdafiə Nazirliyinə istinad edilməklə yayılmış məlumatda guya Azərbaycan tərəfinin atəşkəs rejimini pozaraq Ermənistanın Noyemberyan rayonunun Koti və Voskevan kəndlərini atəşə tutması nəticəsində 14 yaşlı mülki şəxsin yaralanması, eyni zamanda, guya Ermənistanın döyüş mövqelərinə qarşı diversiyanın keçirilməsi nəticəsində bir neçə hərbi qulluqçunun yaralanması qeyd olunub. Bununla əlaqədar olaraq bildiririk ki, Ermənistan Silahlı Qüvvələrindən fərqli olaraq, sərhəd döyüş məntəqələrimiz tərəfindən qarşı ərazidə yerləşən yaşayış məntəqələri istiqamətində atəş açılmır, düşmənin atəşkəs rejiminin pozulduğu döyüş mövqeləri adekvat cavab atəşi ilə susdurulur. Həmçinin düşmən döyüş mövqelərinə qarşı sərhəd-döyüş məntəqələrimiz tərəfindən diversiyanın keçirilməsi barədə məlumat da həqiqətə uyğun deyil. Ermənistan tərəfinin atəşkəs rejimini pozmaqla törətdiyi təxribatın nəticəsi olaraq qarşılaşdığı döyüş itkilərini bu cür ictimailəşdirməsini Ermənistan cəmiyyətində özünə haqq qazandırmağa yönəlmiş uğursuz cəhd kimi dəyərləndiririk”. Hazırda Ermənistan daxilində baş verənlər də düşmənin təxribat cəhdlərinin uğursuz olduğunu üzə çıxarır. Əvvəla, rəsmi şəkildə yayılan məlumata görə, Ermənistan ordusunun təxribata cəhd edən 3 hərbi qulluqçusu yaralanıb. Lakin sosial şəbəkələrin ermənidilli seqmentində yayılan məlumatlara görə, yaralanan düşmən hərbi qulluqçularının sayı 3 yox, 4-dür. Qeyd edək ki, bundan əvvəl də Ermənistan Silahlı Qüvvələri ordu daxilində baş verən ölüm və yaralanma faktlarını gizlədib. Bu kimi faktlar dəfələrlə erməni hərbi qulluqçuların valideynlərinin etirazına səbəb olub. Məlumata görə, indi də yeni belə aksiyaya hazırlıq görülür. Bu isə Nikol Paşinyan iqtidarı üçün əlavə problemlər deməkdir. Siyasi ekspert Zaur Məmmədov qeyd edir ki, bu halda Ermənistan hakimiyyətinin iki yolu var: ya zəbt edilmiş torpaqlar Azərbaycana geri qaytarılır və Ermənistan iqtisadi təcriddən azad olunur, ya da Nikol Paşinyan və onun komandası İrəvandan qaçmalı olacaq:“Ermənilər anlamağa başlayıblar ki, gec-tez Bakı torpaqları geri qaytaracaq. İndiki şəraitdə isə ermənilər başa düşür ki, bunu onların özləri könüllü olaraq etsə, daha yaxşı olar. Sərhədlər açılacaq, iqtisadi əlaqələr yaradılacaq. Biri də var ki, torpaqlar güc yolu ilə geri qaytarılır. Bu halda Azərbaycan bir neçə saat içində Gümrüyə qədər irəliləmək gücünə malik olduğunu sübut edəcək. Bu illüziya deyil”. Politoloq bildirib ki, Bakının hərb variantına əl atmamasının səbəbi var:“Bakı fikirləşməyə İrəvana vaxt verir. Paşinyan ermənilər üçün ya qəhrəmana çevrilir və torpaqları könüllü qaytarır, ya da karyerasını didərginliklə davam etdirir”.
Tahir TAĞIYEV
