Tanınmış jurnalist-şair Şöhlət Abbasın “Məni bağışlama” adlı ilk şeirlər kitabı işıq üzü görüb. Qarabağ müharibəsinin salnaməsini yazan ilk jurnalistlərdən biri olan Ş.Abbasın könül çırpıntılarının toplandığı bu nəşrdə müəllifin vətənpərvərlik ruhunda yazdığı, doğma torpağa məhəbbətlə qələmə aldığı şeirlər öz fərqliliyi ilə diqqəti cəlb edir. Əlbəttə, bütün şairlər öz duyğularını, yaşadıqlarını yazır. Şair sözünə yad duyğu, yad təsir sirayət edə bilməz.
“Məni bağışlama” kitabına “Yurd həsrətli misralar” adlı ön söz yazan pedaqogika üzrə fəlsəfə doktoru, Azərbaycan Yazıçılar Birliyinin üzvü Cəbrayıl Qəhrəmanov sadə və təvəzökar insan, şair-jurnalist, “Pillələr” qəzetinin baş redaktoru Ş.Abbası hələ ötən əsrin 70-ci illərindən tanıdığını və şeirlərinə, yazılarına bələd olduğunu qeyd edir. “Bu kitab Şöhlət Abbasın oxucularla ilk görüşüdür. Mən Şöhlət Abbasa yeni yaradıcılıq uğurları və ən ümdəsi, ona doğma yurdlarımıza qayıtmaq gününün qismət olmasını arzulayıram. Və sözsüz ki, həmin Qələbə gününün şərəfinə Şöhlət Abbas daha möhtəşəm poeziya nümunələri yaradacaq” - deyə yazan alim qeyd edir ki, Ş.Abbas doğulduğu Laçın torpağına, sözə, poeziyaya çox bağlı bir qələm adamıdır.
Getdim dünyaları gəzdim-dolaşdım,
Yenə də ürəyim Laçında qaldı.
Şair bülbülə xitabən yazdığı başqa bir şeirində isə dərdini, yaşadığı Vətən, yurd ağrısını, köçkünlük əzabını ona anladır.
Nə acıdır yurd həsrəti,
Nə şirindir Vətən, bülbül.
...Qazandığım ağ saçımdır,
Gəncliyimdir itən bülbül...
Şairin ilk kitabının oxucular tərəfindən də böyük maraqla qarşılanacağına şübhə etmirik.
İradə SARIYEVA
