“Dünyada ilk dəfə olaraq “Hilal Star” mükafatı restoranlara və aşpazlara Azərbaycandan verilməyə başlayacaq”
Şərqlə Qərbin qovuşduğu Azərbaycan müxtəlif profilli tədbirlərin keçirdiyi məkandır. Bəşəriyyətin bir sıra taleyüklü problemləri Bakının evsahibliyi ilə həll olunur desək, heç bir mübaliğəyə yol vermərik. Son illər beynəlxalq kulinariya festivalları və konqreslərində yaxından iştirak edən ölkəmiz İslam kulinariya mədəniyyətinə də töhfələr verir.
Bakıda “Dreamland Golf Club Baku” kompleksinin ərazisində Dünya İslam Kulinariya Konqresi baş tutub.
Müsahibimiz Azərbaycan Milli Kulinariya Assosiasiyasıın rəhbəri, dünyaşöhrətli mütəxəssis Tahir Əmiraslanovla belə bir konqresin Azərbaycanda keçirilməsinin əhəmiyyətindən danışdıq.
- Tahir müəllim, bir sıra beynəlxalq tədbirlərə evsahibliyi edən Bakı hər zaman İslam mədəniyyətinin təbliğində xüsusi fərqlənib. İndi də paytaxtımızda Dünya İslam Kulinariya Konqresi keçirilib. Bu konqresin ölkəmizdə keçirilməsinin əhəmiyyəti nədir?
- İlk olaraq deyim ki, ölkə başçısı cənab İlham Əliyevin və I vitse-prezident Mehriban Əliyevanın Azərbaycan mədəniyyətinin vacib bir hissəsi olan bu sahənin inkişafında müstəsna xidmətləri var. Azərbaycan hər zaman bu və digər beynəlxalq tədbirin keçirilməsində yaxından iştirak edib. Belə bir tədbirin Bakıda keçirilməsi mühüm əhəmiyyət kəsb edir. Bu konqresin gələcək perspektivləri çox böyükdür və o özündə İslam dünyasının mətbəx mədəniyyətini birləşdirir. Bu konqres Azərbaycan Dövlət Turizm Agentliyi Milli Kulinariya Mərkəzi və Azərbaycan Milli Kulinariya Assosiasiyasının (AMKA) birgə təşkilatçılığı ilə baş tutub. Bu konqresin keçirilməsində əsas məqsədlərdən biri Dünya İslam Kulinariya Birliyinin (WICS) ofisinin daimi olaraq Azərbaycana köçürülməsi idi. Artıq Dünya İslam Kulinariya Birliyinin ofisi Azərbaycanda fəaliyyət göstərəcək. Bu tədbirdə 25 ölkə iştirak edirdi. Konqres çərçivəsində halal qida sərgisi, aşpaz və qənnadçıların İslam mətbəxi yarışları, WİCS kateqoriyalı münsif kursları, Dünya İslam Kulinariya Təşkilatının II konfransı da keçirilib. Konfrans zamanı WİCS-in daxili məsələləri, proqramı, yeni layihələri müzakirə edilib. Konqres başa çatıb və biz konqresdən sonra da görüləcək işlərlə məşğul oluruq. Bu konqresin müsəlman aşpazların, mütəxəssislərin dünyada tanıdılması üçün də əhəmiyyəti danılmazdır.
- Deyəsən, konqres çərçivəsində yeni mükafat da təsis edilib?
- Dünyada ilk dəfə olaraq “Hilal Star” mükafatı restoranlara və aşpazlara Azərbaycandan verilməyə başlayacaq. Bu da bir yenilikdir. Buna görə də “Hilal Star” tarixi Azərbaycandan başlayır.
- Kulinariya çempionatında yerli müəssisələr də iştirak etdilərmi?
- Bəli, bütün bunlarla yanaşı, tədbir çərçivəsində II Beynəlxalq İslam Kulinariya Çempionatı da keçirilib. Birinci çempionat 2009-cu ildə Bakıda baş tutmuşdu. Bu, peşəkar kulinariya müsabiqəsidir. Yarışlar komanda və fərdi şəkildə olacaq, həmçinin, gənc iştirakçılara da sinif ayrılıb. Yarışda şadlıq sarayları, otellər, ketrinq şirkətləri, aviaşirkətlər iştirak ediblər. Müsabiqədə şadlıq sarayları "bəy-gəlin" və "qonaq süfrəsi", otellər "Azərbaycan səhər yeməyi", ketrinq şirkətləri "Azərbaycan mətbəxi furşeti", aviaşirkətlər "Bort yeməyi", şirniyyat müəssisələrimiz şirniyyat siniflərində yarışdılar. Bununla bərabər, müxtəlif mətbəx incəsənəti sinifləri üzrə yarışlar da olacaq. Münsiflər heyəti beynəlxalq səviyyəli hakimlik səviyyəsinə malik kulinariya hakimlərindən ibarətdir. Eyni zamanda, tədbir zamanı halal sərgi də baş tutub.
Halal sərgidə halal məhsul istehsal edən şirkətlər və məhsullar yer aldı və onlar öz məhsullarını 16-18 iyul tarixlərində sərgidə göstərə bildilər. Tədbirin əsas dəstəkçisi "Azersun Holding" MMC-nin “Super Sun” yağı və “Azerçay” markaları olub.
İradə SARIYEVA
