“Biz bu nəşrdə müxtəlif aşıq mühitlərinin təmsilçiləri olan 61 aşığın şeirlərini toplamışıq”
Azərbaycan Aşıqlar Birliyi (AAB) tərəfindən “Çağdaş Azərbaycan aşıqlarının şeir antologiyası” nəşr edilib. “Gənclik” nəşriyyatında çap olunan antologiyanı AAB sədri, əməkdar elm xadimi, professor Məhərrəm Qasımlı və ADMİU-nun dosenti, fəlsəfə doktoru Altay Məmmədli nəşrə hazırlayıblar. Kitabın redaktoru isə filologiya elmləri doktoru, professor Mahmud Allahmanlıdır.
AAB sədri Məhərrəm Qasımlı bizimlə söhbətində bildirdi ki, ilk dəfədir çağdaş Azərbaycan aşıqlarının şeirlərindən ibarət antologiya çap olunur. Kitabın Prezident İlham Əliyevin qərarı ilə ayrılan maliyyə hesabına çap edildiyini qeyd edən M.Qasımlının sözlərinə görə, ölkə başçısı mütəmadi olaraq aşıq sənətinə diqqət və qayğı göstərir.
Kitabda 61 müasir Azərbaycan aşığının şeirlərinin toplandığını deyən M.Qasımlının bildirdiyinə görə, nəşr hazırda yaşayıb-yaradan aşıqların poetik axtarışlarını əhatə edir. Aşıq şeirinin müxtəlif poetik biçimlərini - qoşma, gəraylı, təcnis, divani, müxəmməs, bayatı və s. çevrələyən bu antoloji nəşrin tarixən mövcud olan aşıq şeiri ənənəsinin bu gün də davam etdiyini təsdiqlədiyini deyən M.Qasımlı, həmçinin, bildirdi ki, aşıqların hazırda yaratdıqları şeirlərin poetik ruhunda el-yurd məhəbbəti, qəhrəmanlıq, milli dövlətçiliyə bağlılıq, gözəlliyin, saflığın, halallığın, mərdliyin tərənnümü diqqət önündədir. Nəşrdə həm görkəmli ustad aşıqların, həm də gənc nəslə mənsub saz-söz ifaçılarının yaratdıqları poetik nümunələr xronoloji ardıcıllıqla verilib. “İlk dəfədir Azərbaycanda belə bir antologiya çap olunur. Biz bu nəşrdə müxtəlif aşıq mühitlərinin təmsilçiləri olan 61 aşığın şeirlərini toplamışıq. Bu aşıqların hamısı həyatdadır və yaradıcılıqlarını davam etdirirlər. Azərbaycan Aşıqlar Birliyinin növbəti layihəsi olan “Çağdaş Azərbaycan aşıqlarının şeir antologiyası” cənab Prezidentin qayğısı ilə nəşr olunub. Prezident İlham Əliyev hər zaman aşıq sənətinə xüsusi qayğı göstərib və bu gün də öz qayğı və diqqətini aşıqlardan əsirgəmir” - deyə M.Qasımlı qeyd etdi.
“Çağdaş Azərbaycan aşıqlarının şeir antologiyası” Azərbaycan Respublikası Prezidentinin fərdi təqaüdçüsü, əməkdar mədəniyyət işçisi, ustad aşıq Mahmud Məmmədovun müxtəlif biçimli şeirləri ilə başlayır, gənc aşıq Pərviz Axundun poetik nümunələri ilə bitir.
Kitaba “Sazın-sözün qanadı” adlı ön sözü AAB sədri, əməkdar elm xadimi, professor M.Qasımlı yazıb. Nəşrin geniş ictimaiyyətə təqdimatı payızda keçiriləcək.
İradə SARIYEVA
