Məlumatlara görə, Bakı Uşaq və Gənclər Teatrı Azərbaycan Teatr Xadimləri İttifaqının keçirdiyi 44 günlük Zəfər bayramna həsr olunmuş “Qalib olan Azərbaycan” tamaşalar festivalının nəticələrinə etiraz edib. Teatr ictimaiyyətində dolaşan söhbətlərə görə, birinci yerin qalibi Bakı Uşaq və Gənclər Teatrınin tamaşası olsa da, Teatr Xadimləri İttifaqı mükafatı Akademik Milli Dram Teatrının tamaşasına verib. Bu da tərəflər arasında ciddi qalmaqala səbəb olub.
Onu da bildirək ki, Teatr Xadimləri İttifaqının sədri Azər Paşa Nemətov eyni zamanda Akademik Milli Dram Teatrının direktorudur.
Bakı Uşaq və Gənclər Teatrının Azərbaycan Teatr Xadimləri İttifaqının keçirdiyi festivalın nəticələrinə etiraz etdiyi doğrudurmu? Ümumiyyətlə festivalda nə baş verib?
Bakı Uşaq və Gənclər Teatrının direktoru, əməkdar artist İntiqam Soltan “Bakı-Xəbər”ə bildirdi ki, özü və kollektiv Teatr Xadimləri İttifaqının tədbirlərində onlara qarşı son dərəcə haqsız münasibət sərgiləndiyini düşünür. O qeyd etdi ki, teatr eyni ərəfədə iki teatr festivalında iştirak edib. Bunlardan biri Azərbaycan Teatr Xadimləri İttifaqının keçirdiyi 44 günlük Zəfər bayramna həsr olunan "Qalib olan Azərbaycan" tamaşalar festivalı, o birisi isə Mədəniyyət Naizrliyinin təşkil etdiyi qısa tamaşalar festivalı olub. “Azərbaycan Teatr Xadimləri İttifaqı 44 günlük Vətən müharibəsində şanlı qələbəmizə həsr olunmuş "Qalib olan Azərbaycan" tamaşa festivalı keçirirdi. Festival noyabrın 2-si ilə 5-i arasında keçirilirdi. Bütün tamaşalar videoformat şəklində oktyabr ayının 10-na kimi festivala təqdim olunmalı idi. Bakı Uşaq və Gənclər Teatrı İlhamə Əhmədovanın quruluşunda "Cənnətə bilet" tamaşasını hazırladı və festivalın tələbinə uyğun olaraq göstərildiyi vaxtda təqdim etdik. Tamaşaların festivala təqdim olunma vaxtı bitəndə iştirak edəcək teatrların və tamaşaların adı bəlli idi. Amma qəribədir ki, Akademik Milli Dram Teatrı öz tamaşalarını festivala təyin edilən vaxt başa çatandan 17 gün sonra göndərib. Festivala tamaşa qəbulu bitdikdən 17 gün sonra Akademik Milli Dram Teatrının təqdim etdiyi tamaşanı hansı əsasla qalib élan ediblər? Festivalda birinci yer heç bir teatra verilməyib. İkinci yer isə Akademik Milli Dram Teatrına verilib. Niyə? Əgər bu tearın təqdim etdiyi tamaşa layiq olsaydı mən buna etiraz etməzdim. Mən də qısa və konkret təklif edirəm ki, Akademik Milli Dram Teatrının qalib élan edilən tamaşası ilə Bakı Uşaq və Gənclər Teatrının tamaşası birlikdə tamaşaçılar qarşısında nümayiş olunsun və qalib açıq səsvermə yolu ilə seçilsin. Mən deyəndə ki, qoy tamaşaların hansının üstün olduğunu tamaşaçı özü seçsin, Teatr Xadimləri İttifaqının ayrı-ayrı nümayəndələri ağız büzürlər ki, tamaşaçı nə bilir tamaşa nədir. Başa düşə bilmirəm, əgər tanmaşaçı tamaşanın nə olduğunu bilmirsə, onda bu tamaşalar kimin üçün hazırlanır?
Mən Teatr Xadimləri İttifaqının fəaliyyətinə bircə faktı göstərmək istəyirəm. Ölkədə sırf teatrla məşğul olan bir təşkilat var, o da Teatr Xadimləri İttifaqıdır. Soruşa bilərsiz ki, bəs Mədəniyyət Nazirliyi? Mədəniyyət Nazirliyinin teatr sahəsi ilə məşğul olan bir şöbəsi var, o şöbənin də işi yalnız teatlar deyil. Yəni Teatr Xadimləri İttifaqının teatrdan başqa işi olmamalıdır. İndi gəlin, nümunəni sizə təqdim edim. Mədəniyyət Nazirliyinin də həmin festivalla parallel olaraq keçirdiyi “4.4 Qısa tamaşalar” festivalında 30-a yaxın tamaşa iştirak edib. Orada aralarında müstəqil teatrlar da olan müxtəlif teatrlar, hətta qeyri-peşəkar aktyorlardan ibarət olan teatr toplumları da iştirak etmişdi. Bu festivalın nəticəsi çox maraqlıdır. Nəticədə, birinci yeri “ƏSA” Teatrı qazanıb. Əgər “ƏSA” Teatrı birinciliyi qazanıbsa, demək Azərbaycanda peşəkar teatr yox səviyyəsindədir. Azərbaycanda peşəkar teatrın yox səviyyəsində olduğunu bir festival təsdiq edirsə bunun baiskarı kimdir? Bunun baiskarı ölkədə teatrlarla işləyən yeganə təşkilat olan Teatr Xadimləri İttifaqıdır. Özünü kənara çəkməklə deyil ki. Hələ öz keçirdiyi festivalda götürüb Mədəniyyət Nazirliyinin loqosundan istifadə edir, heç olmasa nazirliyin loqosuna hörmət edib bu əyintilərə yol verməsin. Çox qəribədir ki, İttifaqın keçirdiyi festivalda birinci yeri ümumiyyətlə ləğv ediblər. Birinci festival deyil ki, biz birinciliyi qazandığımız halda birinci yeri ləğv edirlər, belə hallar olub. Mən və kollektivimiz düşünürük ki, Teatr Xadimləri İttifaqının tədbirlərində bizə qarşı son dərəcə haqsız münasibət sərgilənir. Bundan öncə ittifaq tərəfindən “Nizami” festivalı çərçivəsində ən yaxşı tamaşa seçilirdi. Bu festivala 23 nömrə təqdim etmişdik. Hansının yaxşı, hansının zəif olması ilə işim yoxdur. Reallıqda ən yaxşı ifaçı bizim aktyorumuz Niyaz Qasımov olduğu halda, birinci yeri ləğv edib, ikinci yeri 2 nəfər arasında bölüşdürdülər. Mən bir çox nüansların üstünü açmaq istəmirəm. Bu ittifaqda olan bir çox əməkdaşlar təkcə mənim yox, bizim bütün kollektivimizin son dərəcə hörmət etdiyi, mədəni, yüksək peşəkar, insani keyfiyyətlərə malik nümayəndələrdir. Biz onları çox sevirik. Amma bu ittifaqın rəhbər heyətində elə nümayəndələr də var ki, son dərəcə qərəzli mövqe tuturlar”.
Teatr Xadimləri İttifaqının keçirdiyi “Qalib olan Azərbaycan” teatr festivalında birinci yerin ləğv edilib, ikinci yerin Akademik Milli Dram Teatrına, üçüncü yerin isə Rus Dram Teatrının təqdim etdiyi müstəqil bir işə verildiyini deyən İ.Soltanın sözlərinə görə, Uşaq və Gənclər Teatrı ilə Qusar Teatrına xüsusi diplom verilib: “Mən ağzımı açıb danışanda “balans qorunmalıdır” deyirlər. Hansı balans qorunmalıdır ki, burada rus, ləzgi teatrı iştirak edir? Bunu bizə deməyə ehtiyac yoxdur. Sənətdə balanslaşdırma siyasəti aparmaq olmaz, sənətin bir adı var - sənət. Balanslaşdırmanı gəlin Uşaq və Gənclər Teatrından öyrənin. Teatımızın təqdim etdiyi tamaşanın quruluşçu rejissoru rusdillidir, baş rolun ifaçısı milliyyətcə ləzgidir. Halbuki, indiyə qədər bu kəlməni biz dilimizə gətirməmişik, bu adam azərbaycanlıdır, nə fərqli var. Baş rolun-şəhid rolunun ifaçısı ləzgidir, həm də 44 günlük müharibədə 44 gün döyüşmüş, vuruşmuş aktyordur...”
İradə SARIYEVA
