Rusiya Polşaya hücum etsə ABŞ-la ordusu ilə toqquşacaq...
Polşa öz ərazisində yerləşən hər bir amerikalı hərbçi üçün ABŞ-a ildə 15 min dollar ödəməyi, eləcə də lazımi infrastrukturun xərclərini çəkməyi təklif edib. Polşa müdafiə nazirinin müavini Pavel Zalevski bunu Azadlıq Radiosuna verdiyi müsahibədə açıqlayıb.
Təklif Varşava ilə Pentaqon arasında Polşada daimi Amerika hərbi bazasının yaradılması ilə bağlı danışıqların bir hissəsi kimi müzakirə olunur. Zalevskinin sözlərinə görə, tərəflər hazırda bu planın həyata keçirilməsi üçün variantları, o cümlədən qoşunların sayı, onların imkanları və mümkün yerləşmələri barədə danışıqlar aparırlar.
"Biz Amerika qoşunları üçün çox xüsusi şərtlər təklif edirik" – deyən nazir müavininin sözlərinə görə, Polşa infrastruktur xərclərini ödəməyə və ölkədə xidmət edən hər bir Amerika hərbçisi üçün ildə 15 min dollar ayırmağa hazırdır. Bu xərcləri kimin ödəyəcəyi soruşulduqda, Zalevski "Polşa vergi ödəyiciləri" cavabını verib.
Sentyabrın 17-də ABŞ Prezidenti Donald Tramp Polşada ABŞ hərbi bazasının yaradılması ilə bağlı işlərin davam etdiyini və onun yerinin tezliklə açıqlana biləcəyini açıqlayıb. Lakin daimi yerləşdirmə ilə bağlı yekun parametrlər hələ müəyyən edilməyib.
Hazırda Polşada minlərlə Amerika əsgəri var, lakin onlar əsasən rotasiya əsasında yerləşdirilir. Ölkə alyansın şərq cinahında NATO əməliyyatları üçün əsas mərkəzə çevrilib.
Varşava ümid edir ki, daimi baza Amerika hərbi qüvvələrinin daha uzunmüddətli mövcudluğunu təmin edəcək. Zalevski bildirib ki, daimi yerləşdirmə ABŞ-ın Polşanın təhlükəsizliyinə "davamlı öhdəliyini" təsdiqləyəcək və Rusiyaya siqnal göndərəcək. Onun sözlərinə görə, əgər Amerika qüvvələri yerləşdirilərsə, Polşaya potensial hücum Rusiya və Amerika hərbçiləri arasında birbaşa toqquşma riski yaradacaq.
Zalevski həmçinin daimi bazanın təkcə Polşanın deyil, həm də ABŞ-ın özünün maraqlarına uyğun olacağını vurğulayıb. Danışıqlar Vaşinqtonun Avropadakı hərbi siyasətini yenidən nəzərdən keçirməsi fonunda aparılır.
Amerikalı ekspertlər hesab edir ki, Polşada daimi baza Amerikanın NATO-nun şərq cinahındakı mövcudluğunu gücləndirə bilər, lakin onun əhəmiyyəti ABŞ-ın digər Avropa ölkələrində hansı qüvvələri və imkanları saxlamasından asılı olacaq. NATO-nun keçmiş baş katibinin kəşfiyyat və təhlükəsizlik üzrə köməkçisi Devid Kettler qeyd edib ki, müttəfiqlər yalnız yeni bazanı deyil, həm də Avropadakı Amerika qüvvələrinin ümumi ölçüsünü, onları sürətlə gücləndirmək qabiliyyətini və birgə fəaliyyət göstərmək qabiliyyətlərini qiymətləndirəcəklər.
Son illərdə Polşa müdafiə xərclərini və Amerika silahlarının alışını əhəmiyyətli dərəcədə artırıb.
Tahir TAĞIYEV
