Təzəgül Yusifova: “Bu layihənin həyata keçirilməsi məktəblilərin ölkəmizin hər bir bölgəsi haqqında daha zəngin informasiya əldə etməsində mühüm rol oynayır” Kamran Əsədov: “Hesab edirəm ki, bu layihə həqiqətən də respublikamızın ictimai və mədəni həyatında çox mühüm hadisədir” Fariz Xəlilli: “... çox önəmli bir layihədir”
Uşaqlar bizim gələcəyimizdir. Bu baxımdan onların vətənpərvərlik ruhunda tərbiyə edilməsi zəruridir. Bugünkü uşaqlara Azərbaycanı tanıması, bölgələrimizə, onun tarixinə, mədəniyyətinə bələd olması olduqca vacibdir.
Məlum olduğu kimi, ölkəmizin şagirdlərə, uşaq və yeniyetmələrə tanıdılması istiqamətində “Ölkəmizi tanıyaq” maarifləndirici tur-aksiyası keçirilir. Azərbaycan Respublikasının Prezidenti İlham Əliyevin tapşırığına əsasən keçirilən tur-aksiyaya Azərbaycanın bütün bölgələrindən olan məktəblilər qoşulur.
Təhsil ekspertlərinin bildirdiyinə görə, Prezident İlham Əliyevin təşəbbüsü ilə keçirilən “Ölkəmizi tanıyaq” layihəsi şagirdlərin dünyagörüşünün artırılması, intellekt səviyyəsinin yüksəldilməsi, ölkəmiz haqqında yeni biliklər əldə etməsi baxımından böyük əhəmiyyətə malikdir.
Qeyd edək ki, erməni işğalı nəticəsində öz doğma yurdlarını itirən məktəblilər də bu tur-aksiyada yaxından iştirak edirlər. Məsələn, Xocalı məktəbliləri keçən il Qəbələ-Şəki-Zaqatala bölgəsinə səyahət ediblər.
Bir rayonun məktəblilərinin tur-aksiyası çərçivəsində başqa bir rayona səyahət etməsinin mühüm bir iş olduğunu deyən ekspertlər bildirirlər ki, başqa rayona təşkil edilən tur-aksiya zamanı şagirdlər ayrı-ayrı rayonlarımızın inkişafını görür, quruculuq və abadlıq işləri ilə tanış olur, yeni biliklər əldə edirlər.
Onu da vurğulayaq ki, Naftalan şəhər ümumtəhsil məktəblərinin 9-11-ci sinif şagirdləri də “Ölkəmizi tanıyaq” layihəsi çərçivəsində Quba-Qusar-Xaçmaz rayonlarında olublar.
Təhsil ekspeti, tarixçi Təzəgül Yusifova bizimlə söhbətində qeyd etdi ki, layihənin əsas məqsədi ölkəmizin müxtəlif bölgələrinin müasir həyatı, tarixi, mədəni irsi, adət-ənənələri, özünəməxsus xüsusiyyətlərini şagirdlər arasında təbliğ etməkdir: “Bu layihə çərçivəsində, həmçinin, şagirdlər, məktəblilər ümummilli lider Heydər Əliyevin qurub-yaratdığı müstəqil Azərbaycanın nailiyyətləri ilə yaxından tanış ola bilirlər. Ümumiyyətlə, bu tur-aksiyanın böyük əhəmiyyəti var. Məktəblilər Azərbaycanı qarış-qarış gəzib Vətənimizin tarixini öyrənirlər. Təbii ki, bölgələrimiz fərqlidir və hər birinin özünəməxsus gözəlliyi, tarixi, folkloru, mədəniyyəti, abidələri var. Bu layihənin həyata keçirilməsi məktəblilərin ölkəmizin hər bir bölgəsi haqqında daha zəngin informasiya əldə etməsində mühüm rol oynayır. Məsələn, Naxçıvan məktəblərinin şagirdləri bu tur-aksiya çərçivəsində Bakının Suraxanı rayonunda qonaq olublar, yaxud Suraxanı və Qaradağ məktəbliləri Naxçıvanı ziyarət ediblər. Daşkəsən məktəbliləri Lənkəran-Astara-Masallı bölgəsində olublar. Çox sevindirici haldır ki, bu tur-aksiyada iştirak edən məktəblilərə Vətənimizin tarixi haqqında ətraflı məlumat verilir. Məsələn, onlar Ermənistan-Azərbaycan Dağlıq Qarabağ münaqişəsi ilə də bağlı məlumatlandırılırlar. Bu da mühüm məsələdir. Şagirdlər getdikləri rayonların keçmiş və müasir simasını əks etdirən tarix-diyarşünaslıq muzeyləri, qədim tarixi abidələri, gənclər mərkəzləri, olimpiya kompleksləri, bayraq meydanları, rəsm qalereyaları və digər obyektlərlə tanış olurlar, bu da onların yaddaşında silinməz izlər buraxır, dünyagörüşlərini zənginləşdirir.
Gəncə məktəblilərinin də Lənkəran-Masallı-Astara marşrutu üzrə sözügedən rayonlara səyahət etməsi diqqətçəkəndir. Belə ürəkaçan faktlar çoxdur. Bu layihə, keçən il olduğu kimi, bu il də uğurla həyata keçirilir. Düşünürəm ki, bu tur-aksiyanın Azərbaycanın hərtərəfli tanıdılması istiqamətində rolu böyükdür. Dağlıq Qarabağ problemi həll edildikdən sonra qaçqın, məcburi köçkün şagirdlər öz torpaqlarına qayıdacaqlar, gün gələcək Bakıdan və digər bölgələrdən onlara da şagirdlər qonaq gedəcəklər. Biz o günü səbrsizliklə gözləyirik”.
Tanınmış təhsil eksperti, tarixçi-alim Kamran Əsədov da bizimlə söhbətində “Ölkəmizi tanıyaq” tur-aksiyanın əhəmiyyətinin yüksək olduğunu bildirdi: “İlk növbədə qeyd edim ki, Azərbaycan Prezidenti İlham Əliyevin tövsiyəsinə əsasən "Ölkəmizi tanıyaq” devizi ilə keçirilən maarifləndirici tur-aksiyanın çərçivəsində məktəblilərin respublikamızın müxtəlif bölgələrinə, tarixi məkanlara ekskursiyaları təşkil edilir. Hesab edirəm ki, bu layihə həqiqətən də respublikamızın ictimai və mədəni həyatında çox mühüm hadisədir və məktəblilərin dünyagörüşünün daha da zənginləşməsinə, gənclərin vətənpərvərlik və azərbaycançılıq prinsipləri əsasında tarixi-mədəni irsimizə hörmət ruhunda tərbiyə olunmasına çox böyük töhfələr verir. Xatırladım ki, Azərbaycan Respublikası Təhsil Nazirliyi icra hakimiyyəti nümayəndələri ilə bu turları təşkil edir və bu olduqca maraqlı, vacib bir addımdır. Bütün dünya ölkələrində təhsil müəssisələri arasında münasibətlərin, əməkdaşlığın genişləndirilməsi üçün bu tipli turlar həyata keçirilir. Hətta Sovet dönəmində də Azərbaycan məktəbliləri pioner düşərgələrinə cəlb olunurdu. Bu layihənin müsbət tərəfi də odur ki, şagirdlər dərsliklərdə gördükləri tarixi yerləri, abidələri əyani şəkildə görürlər”. K.Əsədovun sözlərinə görə, bu layihənin müsbət tərəfləri çoxdur, lakin onun gələcək üçün daha mükəmməl işlənilməsinə ehtiyac var. “Müsbət tərəfləri ilə yanaşı, gələcəkdə bu layihədə müəyyən dəyişikliklər edilməsi barədə düşünmək lazımdır. İlk növbədə isə turların iştirakçılarının sayı və tura cəlb olunmasından başlamaq lazımdır. Hesab edirəm ki, təkcə təhsil nəticələri yüksək olan məktəblilər yox, həm də zəif nəticə əldə edən məktəblilər də bu layihənin iştirakçılarına çevrilməlidirlər. Bundan əlavə, bu turları təkcə ölkə ərazisinə yox, xarici ölkələrə də təşkil etmək lazımdır. Çünki bizim təhsilimiz dünyaya inteqrasiya proseslərini yaşayır. Bunun daha sürətli həyata keçirilməsi üçün məktəblilər arasında məlumatların çoxalması müsbət təsir göstərəcək”- deyə bildirən K.Əsədovun sözlərinə görə, təhsil sisteminin ayrılmaz hissələrindən birini də məhz fərqli yerlərə ekskursiyalara getmək təşkil edir.
O qeyd etdi ki, məktəblilərin asudə vaxtının illik həcminin əhəmiyyətli hissəsini məhz bu addımlar təşkil edir. Ekspert vurğuladı ki, on iki ayın doqquz ayını dərs oxumaq, imtahanlara, sınaqlara hazırlaşmaq hər bir şagird üçün çox yorucudur. “Dünya təhsil təcrübəsində şagirdlərin sağlam həyat tərzi və asudə vaxtlarının səmərəli təşkili məktəbin tərbiyə sisteminin prioritet istiqamətlərindən biridir. Məhz bu addımlar sayəsində şagirdlər Azərbaycanın bölgələrini gəzir, digər məktəbli həmyaşıdları ilə tanış olub əlaqələr qurur, bölgələrimizi tanıyır, tarixi yerləri görürlər” - deyə ekspert bildirdi.
MİRAS – Mədəni İrsin Öyrənilməsinə Kömək İctimai Birliyinin rəhbəri, tarixçi-alim Fariz Xəlilli də layihənin olduqca dəyərli olduğunu qeyd etdi: “Doğrudan da, “Azərbaycanı tanıyaq” layihəsi çox önəmli bir layihədir. Bu layihənin Azərbaycan Respublikası Prezidentinin göstərişi ilə həyata keçirilməsi dəyərli bir addımdır. Azərbaycanın bir bölgəsindən başqa bölgələrinə məktəblilərin səyahət etməsi onlarda vətənpərvərlik hisslərini gücləndirməklə yanaşı, həm də maddi və qeyri-maddi mədəni irsə, ölkəmizin zənginliyinə, möhtəşəm tariximizə böyük sevgi hissi aşılayır, yaradır. Məktəblilər bu irsi həm öyrənir, həm də təbliğ edirlər. Bu layihənin həyata keçirilməsinin müsbət nəticələri var. Mənim də, bir tarixçi-arxeoloq kimi, “Azərbaycanı tanıyaq” layihəsi ilə bağlı fikir və təkliflərim var. Hesab edirəm ki, bu tur-aksiyanı daha geniş səviyyədə həyata keçirmək olar. Bu tur-aksiyalar hazırda əsasən turizm üçün əlverişli məkanlara təşkil edilir. Bununla da daha çox turistik ab-hava yaranır. Azərbaycanın hər bir bölgəsinin tarixi, mədəniyyəti çox zəngindir. İstərdim ki, məktəblilər tur-aksiya çərçivəsində turizm olmayan bölgələrə də getsinlər. Mən bu tur-aksiyanı təşkil edənlərə arxeoloji abidələrin seçilməsinə kömək etmək məsələsində mədəni irs mütəxəssisi kimi dəstək verməyə həmişə hazıram. Azərbaycanın mədəni irs zənginliyi, yaşından asılı olmayaraq, hər bir azərbaycanlının diqqətində olmalı və onlar vasitəsilə mədəni irs ictimailəşməlidir”.
İradə SARIYEVA
