Müvafiq normalara görə, istənilən məhsulun, o cümlədən ərzaq məhsullarının tərkibi onun qablaşdırılmasında göstərilməlidir. Ancaq müşahidələr göstərir ki, bu heç də hər zaman belə olmur. Məhsulların üzərində bəzi hallarda tərkibi göstərilmir. Yeyinti məhsullarının içinə nə vurulub bilinmir.
Elə hallar olur ki, ərzaq üzərində nəinki məhsulun tərkibi, heç istehsal edən şirkət barəsində də məlumat verilmir. Bu cür hallar isə birbaşa vətəndaşların hüquqlarının pozulması deməkdir. Bir şeyi nəzərə almaq lazımdır ki, ərzaq məhsullarını geyim və digər bu kimi məhsullarla eyniləşdirmək olmaz. Düzdür, əslində bütün məhsulların tərkibi göstərilməlidir. Ancaq söhbət ərzaqdan gedirsə, o zaman məsələyə daha həssas yanaşmaq lazımdır. Məhsulun maya dəyərini azaltmaq istəyən bəzi işbazlar yeyinti məhsulunun tərkibinə xeyli miqdarda qatqılar əlavə edir. Bu yolla məhsul daha ucuz başa gəlir. Ancaq pul qazanmaq istəyən şirkətlər insanların həyat təhlükəsini nəzərə almır. Bir çox xəstəliklərin yaranması da bu cür həddən artıq qatqıların və əlavə vasitələrin istifadəsindən yaranır. Sözügedən məsələdə çatışmayan məqamlar həm də ondan ibarətdir ki, istehlakçıların bu məsələdə maariflənmə səviyyəsi aşağıdır. O üzdən, belə hallara qarşı mübarizədə passivlik göstərirlər. Ən nəhayət, ərzaq istehsalı ilə məşğul olan müəssisələr qanundaki boşluqlardan istifadə edərək ərzaqın tərkibini göstərmir və yaxud da buna laqeyd yanaşır.
Sözügedən məsələni dəyərləndirən iqtisadçı-ekspert Samir Əliyev hesab edir ki, bu cür hallar rast gəlinən malların satışı qəti şəkildə qadağan edilməlidir: "Yeyinti haqqında qanunda qeyd edilir ki, məhsulun üzərində tələb olunan məlumatlar əks olunmalıdır. İstər məhsulun tərkibi, istər onun istehsal müddəti olsun, ərzağın üzərində qeyd edilməlidir. Həmçinin, istehsalçı şirkətin koordinatları məhsulun üzərində əks olunmalıdır. Bu sadalananlar yoxdursa, o zaman məhsulun satışı qəti qadağan edilir. Burada vətəndaşın da hüququ pozulur. Məhsulu alan şəxs bilməlidir ki, ərzağın tərkibində nə var. Ən əsası isə, bu məlumatlar Azərbaycan dilində olmalıdır. Bəzən görürsüz ki, məhsulun üzərində əcnəbi dildə məlumatlar olur. Ərəb dilində və ya digər dillərdə yazılmış məlumatı vətəndaşlar başa düşmür. Sonda isə zərbə vətəndaşa dəyir".
Ekspertin fikrincə, bu cür nöqsanların aradan qaldırılması üçün ciddi nəzarət olmalıdır. Yəni bura həm dövlət həm də vətəndaş cəmiyyəti tərəfindən nəzarət gücləndirilməlidir: "Dövlət tərəfindən sosial çarxlar hazırlanaraq kanallarda yayımlanmalıdır. Vətəndaşlara elan edilməlidir ki, üzərində lazımi məlumatlar yazılmayan məhsulu almasınlar. Sosial çarxlarda bu məhsulların təhlükəli olduğu və s. bildirilməlidir. Bu cür addımlar xeyli effekt verə bilər. Paralel olaraq cərimələrin tətbiq edilməsi də məsələnin həllinə kömək edəcək".
