Ruslan Quliyev: “Azərbaycanda şərabçılıq turizminin inkişafı ilə bağlı infoturlar təşkil olunub”
Müasir və qloballaşan dünyada sosial-iqtisadi inkişaf göstəriciləri arasında turizm ön sıradadır. Turizmin inkişafı, ümumilikdə, başqa sahələrin də inkişafına təsir göstərir. Ölkəmizdə keçirilən beynəlxalq yarışlar turist axınını daha da genişləndirdi. Artıq dünyanın bir sıra ölkələrində Azərbaycana maraq artıb. Onlar Azərbaycana gəlmək, sosial-iqtisadi şəraitlə yaxından tanış olmaq istəyirlər. Yalnız Bakı ilə kifayətlənməyən qonaqlar regionlara da səfər edirlər. Bu baxımdan şəhər turizmi ilə yanaşı, kənd turizmi də inkişaf edir. Azərbaycanda turizmin bir sıra sahələri inkişaf etdirilir.
Turizmin ən maraqlı sahələrindən biri də şərabçılıq turizmidir. Şərabçılıq turizmi əksər xarici ölkələrdə inkişaf edib. Bəllidir ki, Azərbaycanda şərabçılıq sahəsi inkişaf etdirilir. Azərbaycan istehsalı olan şərablar artıq əksər xarici ölkədə tanınır.
Məlumat üçün bildirək ki, bu günlərdə Azərbaycan Turizm Bürosunun təşəbbüsü ilə şərabçılıq turizminin inkişafına dair yerli şərab istehsalçıları ilə görüş keçirilib. Toplantıda Azərbaycanda şərabçılıq üzrə turizmin inkişaf etdirilməsi və şərab marşrutlarının hazırlanması barəsində müzakirələr aparılıb. Azərbaycan şərabçılıq turizminin beynəlxalq səviyyədə təbliğatının aparılması istiqamətində Azərbaycan Turizm Bürosu tərəfindən müvafiq təşviqat kampaniyalarının aparılacağı qeyd olunub.
Maraqlıdır, Azərbaycanda şərabçılıq turizmi hansı səviyyədədir və sektorun inkişafı üçün nə kimi işlər görmək lazımdır?
Sağlamlıq və Termal Turizmə Dəstək Assosiasiyasının sədri Ruslan Quliyev “Bakı-Xəbər”ə açıqlamasında qeyd etdi ki, Azərbaycanın şərabçılıq sahəsi üzrə böyük ənənələri var: “Azərbaycanın şərabçılıq turizm marşrutuna salınması bu sahəyə maraq göstərən turistlərin ölkəmizə gəlməsinə səbəb olacaq. İpək Yolu üzərində yerləşən Azərbaycanın şərabçılıq məhsulları xarici turistlər üçün maraqlı olacaq”.
Həmsöhbətimizin sözlərinə görə, son 10 il ərzində Azərbaycanda şərabçılıq turizminin inkişafı ilə bağlı infoturlar təşkil olunub. Şamaxı, Qəbələ, Göygöl istiqamətinə turlar təşkil olunub. Həmin turlar vasitəsilə səyahət sevənlərə tək bölgələrimiz deyil, eyni zamanda, Azərbaycan istehsalı olan şərablar haqqında da məlumat verilib”.
R.Quliyev bildirdi ki, bir çox dünya ölkəsində şərabçılıq turizmi inkişaf edib. Turizmin bu növünə böyük maraq var. Qonşu Gürcüstanda şərabçılıq turizmi inkişaf edib. Anoloji hal Azərbaycanda da yaşana bilər: “Məlumdur ki, ölkədə şərabçılığın inkişafı ilə bağlı Dövlət Proqramı qəbul olunub. Bu sahənin inkişaf olunması üçün dövlət tərəfindən müəyyən işlər görülür”.
Günel CƏLİLOVA
