Fikrət Yusifov: “Bərk tullantıların idarə edilməsi, ali təhsil və kənd təsərrüfatı sahələri yaxın zamanlar içərisində DB-nin aidiyyəti strukturlarından...”
Dünya Bankı Azərbaycanda kreditləşdirmə üçün prioritet sahələri müəyyənləşdirib. Bankın Bakı Nümayəndəliyinin rəhbəri Navid Naqvi bildirib ki, yaxın illərdə Azərbaycanda səhiyyə, bərk tullantıların idarə edilməsi, ali təhsil və kənd təsərrüfatı sahələri Dünya Bankının kreditləşdirməsi üçün ən yüksək prioritet sahələr hesab olunur.
N.Naqvi DB ilə Azərbaycan hökuməti arasında əməkdaşlığın səviyyəsini qənaətbəxş hesab etdiyini bildirib və hazırda müxtəlif sahələrdə layihələrin hazırlandığını qeyd edib: “Biz son vaxtlar milli strategiyaya dəstək olan bərk tullantıların idarə edilməsi layihəsini başa vurduq”.
N.Naqvi, həmçinin, bu istiqamətdə maliyyə qurumları ilə innovasiyaların tətbiqi və bu sahədə tərəfdaşlığı özündə ehtiva edən, Azərbaycan Prezidenti tərəfindən təsdiqlənən və 2011-2021-ci illəri əhatə edən ölkədə Təhsilin İnkişafı üzrə Milli Strategiyanı xatırladıb.
Nümayəndəliyin rəhbəri onu da qeyd edib ki, bank artıq təhsil sahəsində bir neçə tədqiqat işini başa çatdırıb. Ölkənin kənd təsərrüfatında risq idarəetmə sisteminin öyrənilməsi də aparılıb: “Mən bilirəm ki, dövlət səhiyyə sektorunu transformasiya etməyi nəzərdə tutur, lakin bizim bu istiqamətdə hələ ki, layihəmiz yoxdur. Layihənin hazırlanmasına başlamaq üçün hökumət kredit üçün banka müraciət etməlidir”.
Azərbaycan iqtisadiyyatı sərmaylər üçün açıqdır. Eyni zamanda, digər ölkələrlə müqayisədə daha əlverişlidir. O baxımdan dünyanın müxtəlif maliyyə qurumları ölkədə bir sıra layihələrə kreditlər ayıra bilərlər. Təbii ki, söhbət daha perspektivli sahələrdən gedir. Bu baxımdan DB-nin Azərbaycanda kreditləşdirmə üçün müəyyən etdiyi prioritet sahələri ekspertlər necə dəyərləndirirlər?
Məsələyə münasibət bildirən iqtisad elmləri doktoru Fikrət Yusifovun sözlərinə görə, DB-nin kreditləşdirmə üçün müəyyən etdiyi prioritet sahələr təsadüfi deyil: “DB-nin dərc etdiyi hesabatında Azərbaycanın 33 pillə irəliləyərək 25 yerdə qərarlaşması təsdiqləndi. Təbii ki, DB Azərbaycanda gedən islahatları lap yaxından izləyən maliyyə institutlarından biridir. Eyni zamanda, bu proseslərə yetərincə obyektiv və dolğun qiymət verən bir təşkilatdır. O baxımdan qurum Azərbaycanda gedən prosesləri çox yaxından izləyir və ölkənin 2015-ci ilin sonlarından başladığı sürətli islahatları ilk bəyənənlərdən biri DB-dir. Təbii ki, belə olan halda, DB xətti ilə bir sıra sahələrə kreditlərin ayrılması üçün zəmin yaranır. Adətən belə kreditlər veriləndə aparılan islahatların səviyyəsi dəyərləndirilir. Ondan sonra buna uyğun olaraq kreditlər ayrılır. Bununla yanaşı, sahələr müəyyən olunur. Azərbaycanda da bu sahələrin müəyyən olunması təsadüfi deyil. Ona görə də bərk tullantıların idarə edilməsi, ali təhsil və kənd təsərrüfatı sahələri yaxın zamanlar içərisində DB-nin aidiyyəti strukturlarından uzunmüddətli, aşağı faizlərlə kreditlər əldə edəcəklər. Bu da, bütövlükdə, iqtisadiyyatın sadalanan sahələrinin daha yaxşı inkişaf etməsinə bir təkan olacaq”.
Vidadi ORDAHALLI
