Qadir Bayramlı: “Toxum birjası yaradılandan sonra bu sahə fermerlər arasında geniş şəkildə təbliğ olunmalıdır”
Xəbər verildiyi kimi, 2019-cu ildə Azərbaycan Kənd Təsərrüfatı Nazirliyi nəzdindəki Dövlət Toxum Fondu onlayn layihə olaraq Toxum birjası yaratmağı planlaşdırır. Bu barədə media nümayəndələrinə Dövlət Toxum Fondunun rəhbəri Emin Əliyev deyib.
Onun sözlərinə görə, bu internet tətbiqi vasitəsilə fermerlər, istehsalçılar və toxum şirkətləri toxum seçə, daşımalar həyata keçirə, aqrotexniki məsləhətlər üçün məsləhətçilər seçə biləcək: “Birjada onlayn rejimdə toxumun alışını, sertifikasiyasını, logistikasını və hətta ticarətini həyata keçirmək mümkün olacaq. Gələcəkdə isə maliyyələşdirmə və ya kreditləşmə üçün müraciət etmək mümkün olacaq”.
E.Əliyev əlavə edib ki, gələn il fond, həmçinin, “ToxumArt” layihəsinin reallaşdırılmasını planlaşdırır: “Bundan başqa, Bakı şəhərinin müxtəlif hissələrində şəbəkə stendlərinin yaradılması nəzərdə tutulur”.
Toxum birjasının əhəmiyyəti barəsində danışan Azərbaycan Dövlət İqtisad Universitetinin dosenti Qadir Bayramlı “Bakı-Xəbər”ə açıqlamasında qeyd etdi ki, Toxum birjasının yaradılması ölkədə toxum təminatını yaxşılaşdırmağa öz töhfəsini verə bilər: “Nəzərə almaq lazımdır ki, kənd təsərrüfatının ən zəif sahələrindən biri Toxum birjasıdır. Toxumçuluq təsərrüfatları yetərli sayda deyil”.
Həmsöhbətimizin sözlərinə görə, aqrar sahə üçün toxum çox əhəmiyyətlidir. Toxum düzgün seçildiyi təqdirdə məhsuldarlıq artır. Düzgün toxum seçilərsə, məhsuldarlıq 30 faiz artar: “Xatırladım ki, əvvəllər bir çox toxum təsərrüfatı var idi. Sevindirici haldır ki, son zamanlar bu sahədə canlanma yaşanır. Ayrı-ayrı bölgələrdə toxumçuluq təsərrüfatı yaradılır. Xaricdən məhsuldar toxumlar alınıb gətirilərək fermerlərə verilir. Hesab edirəm ki, Toxum birjasının yaradılması fermerlərin keyfiyyətli toxum təminatına kömək edər. Eyni zamanda, fermerlərin əllərində toxumluq məhsullarının satılmasında yeni yaradılacaq qurumun böyük köməyi olacaq”.
Q.Bayramlı onu da əlavə etdi ki, Toxum birjası yaradılandan sonra bu sahə fermerlər arasında geniş şəkildə təbliğ olunmalıdır. Təbliğat müxtəlif formada həyata keçirilə bilər.
Ekspert bildirdi ki, bəzi bölgələrdə məhsuldarlığın aşağı olmasının səbəbi aqrotexniki tədbirlərin yetərli olmaması ilə yanaşı, toxumun düzgün seçilməməsi ilə bağlıdır. Fermerlərin kefiyyətli toxum əldə etmək imkanı zəif olduğu üçün, onlar əllərində olan toxumu əkin üçün istifadə edirlər: “Belə olan halda, məhsuldarlıq istənilən səviyyədə olmur. Toxum birjasının yaradılması qeyd olunan sahədə müsbət dəyişikliyə səbəb ola bilər”.
Günel CƏLİLOVA
