İlqar Hüseynli: “İki ölkə arasında nəqliyyat sahəsində əlaqələrin genişlənməsi böyük tranzit gəlirləri və digər iqtisadi dividendlər vəd edir”
“Bu gün imzalanan sənədlərlə Azərbaycan və Türkmənistanın nəqliyyat potensialını birləşdirdik, əlaqələndirdik”. Sözügedəın fikirləri Prezident İlham Əliyev Türkmənistan Prezidenti Qurbanqulu Berdıməhəmmədovun adından Azərbaycan Prezidentinin şərəfinə verilən rəsmi ziyafətdə çıxışı zamanı deyib.
Dövlət başçısının sözlərinə görə, iki ölkə Xəzər dənizi məsələsində fəal qarşılıqlı fəaliyyət göstərir. Prezident bununla bağlı bir sıra məqamlara toxunub: “Bu il Xəzər dənizinin hüquqi statusu ilə bağlı Konvensiya imzalanıb. Bizim ölkələrimiz bu Konvensiyanın imzalanmasına böyük töhfə verib. Biz Xəzər dənizinin ekoloji təhlükəsizliyi ilə məşğul oluruq. Biz hazırda mühüm və gələcəkdə də mühüm olacaq qitələrarası əhəmiyyətli məsələlər, o cümlədən “Şərq-Qərb” nəqliyyat dəhlizinin möhkəmləndirilməsi ilə məşğuluq. Bu dəhliz uzun əsrlər mövcud olub. Bu dəhlizlə bizim əcdadlarımıza ünsiyyət qurmağa imkan vermiş karvanlar keçib. Böyük tarixi İpək Yolu bizim ölkələrimizin ərazisindən keçib və təbii ki, bu gün biz fəal surətdə bu dəhlizin müasir infrastrukturunun yaradılması üçün əlavə səylər göstəririk. Mən artıq qeyd etmişəm ki, biz sanki razılaşmışdıq, amma əslində razılaşmamışdıq. Faktiki olaraq, eyni zamanda, Türkmənistan və Azərbaycan ərazisində möhkəm nəqliyyat potensialı yaratdıq. Bu gün isə imzalanan sənədlərlə biz bu nəqliyyat potensialını birləşdirdik, əlaqələndirdik. İmzalanan 20-dən çox sənədin əksəriyyəti birbaşa və ya dolayısı ilə nəqliyyat təhlükəsizliyi üzrə əməkdaşlıq məsələsinə aiddir”.
Azərbaycanla Türkmənistanın öz nəqliyyat potensialını birləşdirməsi, nəticə etibarilə, bu ölkələrin tranzit imkanlarını daha da artıracaq. Eyni zamanda, bu, iki ölkənin iqtisadi inkişafına öz müsbət təsirini göstərəcək.
Maraqlıdır, bəs ekspertlər buna necə yanaşırlar? İki ölkənin öz nəqliyyat potensialını birləşdirməsi nə kimi perspektiv vəd edir?
Məsələyə münasibət bildirən ekspert İlqar Hüseynlinin sözlərinə görə, bununla bağlı işlərin genişləndirilməsi müsbət perspektiv vəd edir: “Məsələ ondadır ki, bundan bir neçə gün əvvəl Qazaxıstanla belə bir məsələ müzakirə olundu. İndi də Türkmənistanla bu yöndə bir sıra razılaşmalar əldə olundu. Nəzərə almaq lazımdır ki, Azərbaycan strateji geoməkanda yerləşir. Bu ona imkan verir ki, qonşu dövlətlərlə geniş nəqliyyat əlaqələri qurulsun. Həmçinin, digər hərtərəfli addımlar atılsın. İqtisadi baxımdan qonşu dövlətlərlə həyata keçirilən bu tip irimiqyaslı sazişlərin olması çox vacibdir, xüsusən də nəqliyyat sahəsində. Xəzəryanı ölkələrin hər birinin böyük İpək Yoluna və transmilli nəqliyyat dəhlizlərinə çıxış imkanları Azərbaycan vasitəsilə mümkündür. Ona görə də Türkmənistan sözügedən nəqliyyat əlaqələrində bizim üçün əhəmiyyətli ölkə hesab olunur. İki ölkə arasında nəqliyyat sahəsində əlaqələrin genişlənməsi böyük tranzit gəlirləri və digər iqtisadi dividendlər vəd edir. Türkmənistandan gələn yükləri Azərbaycan vasitəsilə Avropa bazarına çıxarmaq mümkün olacaq. Türkmənistanın Bakı-Tiflis-Qars dəmir yolunun imkanlarından istifadə imkanları genişlənir. Digər tərəfdən, bütün bunların sayəsində “Transxəzər” layihəsi reallaşa bilər. Nəticədə Türkmənistan qazı Azərbaycan vasitəsilə Avropa bazarına çıxarılacaq. Sözsüz ki, bütün bunlar bir sıra iqtisadi perspektivlər vəd edir. Ona görə də bu yöndə imzalanan sənədlərə, əldə olunan razılaşmalara müsbət prizmadan yanaşıram”.
Vidadi ORDAHALLI
