Qeyri-neft sektorunun mühüm qolu kimi turizmin inkişafında atılan addımlar artıq öz yüksək nəticələrini verməkdə, bu sahənin iqtisadi tərəqqidə xüsusi çəkisi artmaqdadır. Digər tərəfdən görünən budur ki, turizm həm də indiki vəziyyətdə Azərbaycana valyuta axınını təmin edən əsas sahələrdən birinə çevrilib. Artıq turizm xəttilə ölkəyə daxil olan valyutanın həcmi yüzlərlə milyon dollar təşkil edir və bu rəqəmin daha da artması gözlənir. Əsas səbəb də budur ki, ölkəmizə üz tutan turistlərin sayında böyük artım qeydə alınır.
Belə ki, təkcə cari ilin yanvar-oktyabr ayları ərzində Azərbaycana dünyanın 194 ölkəsindən 2 milyon 420,4 min və ya ötən ilin müvafiq dövrü ilə müqayisədə 6,1 faiz çox əcnəbi və vətəndaşlığı olmayan şəxs gəlib.
Araşdırmalar göstərir ki, 2018-ci ilin yanvar-oktyabr aylarında Asiya və Yaxın Şərq ölkələrindən Azərbaycana gələn turistlərin sayında böyük artım müşahidə olunur. Dövlət Turizm Agentliyi bildirir ki, qeyd olunan dövr ərzində Yaxın Şərq ölkələrindən gələn ziyarətçilərin sayı 330 min olub, bununla da ötən ilin eyni dövrü ilə müqayisədə 42 faiz artım baş verib. Bu regiondan daha çox səyahətçi Səudiyyə Ərəbistanı, İsrail və Küveytdən gəlib. Yanvar-oktyabr ayları ərzində Azərbaycana gələnlər arasında Rusiya vətəndaşları 752 min səyahətçi ilə birinci yeri tutur. Rusiyalı turistlərin sayı 2017-ci ilin eyni ayları ilə müqayisədə 3,3 faiz artaraq, Azərbaycana gələn bütün xarici vətəndaşların 31 faizini təşkil edib.Bu dövrün statistikası ilə əlaqədar ən maraqlı fakt Hindistan və Pakistandan gələn səyahətçilərin sayının müvafiq olaraq 183 faiz və 149 faiz artmasıdır.
Rusiya Dövlət Dumasının deputatı Dmitri Savelyev isə bütün bunların təsadüfi olmadığını bildirir. Moskvada keçirilən "Nəqliyyat həftəsi 2018" beynəlxalq sərgisində o, bu xüsusda bildirib: "Bakı artıq dünya turizminin Məkkəsinə çevrilir. Rusiya-Azərbaycan Parlamentlərarası Dostluq Qrupunun sədri kimi mən də bu möhtəşəm, gözəl şəhərə səfər edən rusiyalıların sayının maksimum çox olmasında maraqlıyam". Savelyevin sözlərinə görə, Azərbaycanın gözəl güşələrində olduqda oralara vurulmamaq mümkün deyil və buraya dağ-xizək kurortları və digər unikal təbii landşaftlar daxildir: "Özümdən bilirəm ki, bir dəfə Azərbaycana səfər etməklə ona vurulursan. Çox sayda rusiyalı Azərbaycanın gözəllikləri və paytaxt Bakı haqqında eşidib, amma əminəm ki, cəmi bir dəfə səfər etməklə onlar bu şəhərə və ölkəyə aşiq olacaqlar". Rusiyanın “TurStat” Analitik Agentliyi isə bildirir ki, Bakı MDB-yə üzv ölkələrin şəhərləri arasında şoppinq səyahətlərinin reytinqində liderlik edir. Rusiyalı turistlərin alış-verişi üçün populyar olan MDB şəhərləri üçlüyünə Azərbaycanın, Qazaxıstanın və Belarusun paytaxtları daxil edilib. “TurStat”ın məlumatına görə, turistlər MDB şəhərlərinə orta hesabla 2-3 günlük səfər edir və alış-verişə 1000 dollaradək pul xərcləyirlər. Agentlik, həmçinin qeyd edir ki, cari il may ayının 1-dən 31-dək keçirilən Bakı Şoppinq Festivalı əcnəbi turistlərin böyük marağına səbəb olub.
Tursitlərin Azərbaycana marağının sürətlə artmasının səbəbləri barədə “Georgia Today” nəşrində də maraqlı məqamlar yer alıb: “Azərbaycan turizm sahəsinin inkişafı yönündə vacib islahatlar həyata keçirir. Turizm Azərbaycanda qeyri-neft sektorunun inkişafı istiqamətində əsas sektorlardan birinə çevrilib. Turizmin inkişafı yeni iş yerlərinin açılmasına, yolların və mehmanxanaların tikilməsinə, bütün nəqliyyat növlərinin istehsalının stimullaşdırılmasına, milli mədəniyyət nümunələrinin qorunmasına və tanıdılmasına imkan yaradır. Başqa sözlə, turizm sosial-iqtisadi inkişafın katalizatorudur”. Məqalədə qeyd edilir ki, bu gün Azərbaycan dünya səviyyəsində yeni cəlbedici turizm istiqaməti kimi tanınır. Əcnəbi qonaqlar Azərbaycandakı infrastrukturu, unikal memarlığı, bütün sahələrdə müşahidə olunan tərəqqini, qədim tarixi və çoxəsrlik zəngin mətbəxi, eləcə də, sabitliyi, təhlükəsizliyi və komfortu yüksək qiymətləndirirlər: “Turizm ölkəyə müxtəlif xarici investisiyaların cəlb olunmasına da vasitə olur. Əhalinin gəlirləri artır və rifahı yüksəlir. Azərbaycan qədim məbədlərin müasir və ən yaxşı memarlar tərəfindən inşa edilmiş göydələnlərlə çiyin-çiyinə dayandığı ölkədir. Bakının obrazı öz qeyri-adiliyi, eyni zamanda, keçmişlə bu günün uğurlu harmoniyası ilə fərqlənir. Ölkənin müxtəlif regionlarında müasir tələblərə cavab verən yeni yol-nəqliyyat infrastrukturunun və mehmanxanaların tikilməsi yerli və əcnəbi turistlərin Azərbaycan regionlarına marağını artırır. Ölkə başçısı İlham Əliyevin 2018-ci il 20 aprel tarixində imzaladığı fərmanla Dövlət Turizm Agentliyi yaradılıb. Turizm Azərbaycanda prioritet istiqamət olaraq təyin edilib və milli əhəmiyyətli sahə hesab olunur”.
Tahir TAĞIYEV
