Nicat Nəsirli: “Bu mənada, tərəflər arasında birgə müəssisələrin yaradılması həyata keçirilə bilər”
“Biz məhsullarımızı Belarus bazarına çıxarmaq niyyətindəyik”. Bunu Prezident İlham Əliyev Minskdə Belarus Prezidenti Aleksandr Lukaşenko ilə birgə mətbuata bəyanatla çıxışında deyib.
Ölkə başçısının sözlərinə görə, Azərbaycan və Belarus arasında on milyonlarla dollarlıq müqavilələrin bağlanması gələcək üçün yaxşı göstəricidir: “Biz görülən işləri təhlil edirik, məsələlərin həlli yollarını müəyyənləşdiririk və bu məsələləri həll edirik. Mən bu gün səhər Azərbaycan Ticarət Evinə baş çəkdim. Deməzdim, təəccübləndim, amma sevindim ki, belə gözəl yerdə, şəhərin mərkəzində Azərbaycanın yaraşıqlı guşəsi yaradılıb və orada bizim nailiyyətlərimiz Belarus vətəndaşlarına nümayiş etdiriləcək. Həmçinin, mənə dedilər ki, bizim məhsullarımız artıq Belarus bazarına çıxıb və onlara yaxşı tələbat var. Biz bu baxımdan belaruslulardan geri qalmışıq. Artıq Bakıda yüksək keyfiyyətli və bizim vətəndaşlar arasında çox məşhur olan Belarus məhsullarını satan yeddi ticarət müəssisəsi mövcuddur. Biz məhsullarımızı Belarus bazarına çıxarmaq niyyətindəyik. Düşünürəm ki, bu, həm bizim ikitərəfli ticari-iqtisadi əlaqələrimizi möhkəmləndirəcək, həm də bir-birimizin imkanlarını daha çox nümayiş etdirəcək”.
Azərbaycan Belarusla iqtisadiyyatın bir sıra sahələrində, o cümlədən kənd təsərrüfatı sahəsində əlaqələri genişləndirə bilər. Nəzərə almaq lazımdır ki, elə aqrar məhsullar var onlar əsasən Belarusda yetişdirilir. Eləsi də var ki, həmin məhsullar Azərbaycanda becərilir. Belarus bazarında bu məhsullara ehtiyac var. Bu baxımdan, tərəflər qarşılıqlı maraqlara uyğun olaraq bütün bunları reallaşdıra bilərlər.
Bütün bu deyilənlərin fonunda, maraqlıdır, Belarus Azərbaycanın kənd təsərrüfatı məhsulları üçün necə bir bazar rolunda çıxış edə bilər?
Məsələyə münasibət bildirən “Ərzaq məhsullarının tədarükü və təchizatı” ASC-nin şöbə müdiri, kənd təsərrüfatı məsələləri üzrə ekspert Nicat Nəsirli buna bir neçə aspektdən yanaşdı: “Belarus bizim üçün qida və kənd təsərrüfatı sahəsində əməkdaşlıq baxımından maraqlı bir ölkədir. Hazırda hər iki ölkə arasında şin, ağac emalı, qida məhsulları, məişət texnikası, qab-qacaq, neft-kimya, maşınqayırma və kənd təsərrüfatı məhsullarının ticarəti mövcuddur. Lakin əməkdaşlığın indiki səviyyəsi ölkələrin potensialını tam ifadə etmir.
Bu ölkənin aqrar potensialı və təcrübəsi bizim gərəyimiz ola bilər. Kənd təsərrüfatı Belarusun ÜDM-nin 7,8%-ni təşkil edir. Hazırda respublikanın torpaqlarının 43 faizi əkinçiliyə cəlb edilib. İlboyu Rusiyaya böyük həcmdə ixrac həyata keçirir. Eyni zamanda, Belarus il ərzində bizim qida bazarının ən aktiv iştirakçılarından biridir. Belarus ehtiyac duyduğu bir sıra kənd təsərrüfatı məhsullarını Azərbaycan hesabına əldə edə bilər. Söhbət o məhsullardan gedir ki, həmin məhsullar Belarusda istehsal olunmur. Bu mənada, Azərbaycanda birgə müəssisələrin yaradılması həyata keçirilə bilər. Kadr və təcrübə təminatı Belarus tərəfdən, sərmayə və texnologiya isə bizim tərəfimizdən cəlb edilə bilər. Məlum olduğu kimi, bu gün ölkəmizdə Belarusun kənd təsərrüfatı texnikalarının istehsalı həyata keçirilir. Bu məsələ dəfələrlə ölkə prezidentləri tərəfindən müzakirə olunub ki, birgə Belarus-Azərbaycan məhsulları üçüncü ölkə bazarlarına çıxarılmalıdır. Bu istiqamətdə ən real iş Gəncə Avtomobil Zavodunun timsalında həyata keçirilə bilər. Hazırda Qafqaz regionunda, Orta Asiya ölkələrində kənd təsərrüfatı texnika və avadanlıqlarına böyük tələbat var. Belarus tərəfi əmindir ki, Azərbaycan Cənubi Qafqaz və Orta Asiya regionuna çıxmaq üçün əlverişli coğrafiyadır. Dövlət başçıları iş adamlarına üz tutaraq açıq ifadə etdilər ki, ikitərəfli əlaqələrin ən vacib indikatoru hər iki dövlət tərəfindən qoyulmuş investisiyalardır. Bu investisiyalar qarşılıqlı etibar, maraq və mənfəət naminə əməkdaşlığa dəstək verə bilər. Ölkələr arasında istehsal kooperasiyalarının əməkdaşlığı genişlənməlidir, investisiya layihələrinin sayı artmalıdır. İki ölkənin elmi dairələri arasında birgə tədqiqatların aparılması yeni iqtisadi sahələri müəyyən edə bilər. Belarusun kənd təsərrüfatı kooperasiyaları baxımdan gözəl təcrübəsi var. İstehsal kooperasiyalarının yaradılması maraqlı əməkdaşlıq sahəsi ola bilər. “Ərzaq məhsullarının tədarükü və təchizatı” ASC də bu ölkə ilə əlaqələrdə marağını bildirərək, bir neçə dəfə bu ölkənin müvafiq qurumlarının əməkdaşlarını Bakıya dəvət edib, burada işgüzar müzakirələr aparılıb və gələcək əməkdaşlığın istiqamətləri müəyyən olunub. Gələcəkdə Belarusun tədarük-təchizat sisteminin yaxından öyrənilməsi, Azərbaycanda tətbiq olunması nəzərdə tutulub”.
Vidadi ORDAHALLI
