İlqar Hüseynli: “Bu sahədə əməkdaşlığın genişləndirilməsini perspektivli hesab edirəm”
“Nəqliyyat-logistika sahəsində xeyli ehtiyatlar var”. Bunu Belarus Prezidenti Aleksandr Lukaşenko Minskdə Azərbaycan Prezidenti İlham Əliyevlə geniş tərkibdə görüşündə deyib.
Onun sözlərinə görə, bununla bağlı potensial var: “Məsələn, “Şimal-Cənub” beynəlxalq nəqliyyat dəhlizinin yaradılması və “İpək Yolu İqtisadi Kəməri” təşəbbüsü çərçivəsində dəmir yollarının çəkilişi. Biz həmin layihələrə bu və ya digər şəkildə qoşulmuşuq. Fikrimcə, əczaçılıq üzrə birgə müəssisələrin yaradılması, habelə informasiya-kommunikasiya texnologiyaları, elm və mədəniyyət sahələrində səylərin əlaqələndirilməsi perspektivli olacaq. Biz Azərbaycan üçün, özü də sizə lazım olacaq bütün ixtisaslar üzrə lazımi qədər kadrlar hazırlanmasını davam etdirmək əzmindəyik”.
Azərbaycanla Belarus arasında çoxşaxəli iqtisadi əlaqələr mövcuddur. Sözügedən əlaqələr getdikcə daha geniş müstəvidə inkişaf etməkdədir. Belarus Azərbaycanla iqtisadi əməkdaşlığın faydalı olmasının fərqindədir. O üzdən, iqtisadiyyatın müxtəlif sahələri ilə bağlı əməkdaşlığa maraq göstərir. Onlardan biri də nəqliyyat-logistika sahəsidir.
Maraqlıdır, iki ölkə arasında nəqliyyat-logistika sahəsində əməkdaşlığın genişləndirilməsi hansı perspektiv vəd edir?
Məsələyə münasibət bildirən ekspert İlqar Hüseynlinin sözlərinə görə, bu sahədə əməkdaşlıq müəyyən perspektivlər vəd edir: “Məsələ ondadır ki, Azərbaycan strateji bölgədə yerləşir və bir sıra imkanlara sahibdir. Xüsusən də nəqliyyat və kommunikasiya baxımından ciddi potensiala malikdir. Azərbaycan nəqliyyat və kommunikasiya baxımından böyük “İpək Yolu”nun ən ciddi həlqəsini təşkil edən dövlətlərdən biridir. Nəzərə almaq lazımdır ki, artıq Bakı-Tiflis-Qars dəmir yolu fəaliyyətə başlayıb. Asiyadan Avropaya və əks istiqamətdə yüklərin daşınmasında Azərbaycanın rolu artır. Görünən odur ki, Avropa bazarlarına çıxışla bağlı böyük işlər görülüb. Eyni zamanda, “Şimal-Cənub” nəqliyyat dəhlizinin ərsəyə gətirilməsi ilə bağlı işlər sürətləndirilib. Bir sözlə, Avropa bazarlarına çıxış imkanlarının yaradılması baxımından Azərbaycan strateji əhəmiyyətini daha da möhkəmləndirir. Bu baxımdan götürsək, istənilən postsovet ölkəsi və yaxud da Şərqi Avropa ölkələrinin maraq dairəsindədir ki, Azərbaycanla nəqliyyat-logistika sahəsində əməkdaşlıq etsinlər. O cümlədən Belarus da bu sahədə Azərbaycanla əməkdaşlıq etməkdə maraqlıdır. Bu, Azərbaycanın yerləşdiyi əlverişli coğrafi mövqeyi ilə bağlıdır. Digər tərəfdən, Azərbaycanla Belarus arasında çox yüksək səviyyəli əlaqələr mövcuddur. Onu da qeyd edim ki, Azərbaycanda böyük dəniz limanı inşa olunur. Bütün bunları nəzərə alsaq, hesab edirəm ki, nəqliyyat-logistika sahəsində Belarusla əməkdaşlıq Azərbaycan üçün faydalıdır. Fikrimcə, bütün bunlar gələcəkdə Azərbaycanın tranzit gəlirlərinin artmasında mühüm rol oynayacaq. Ona görə də bu sahədə əməkdaşlığın genişləndirilməsini perspektivli hesab edirəm”.
Vidadi ORDAHALLI
