“Milli valyutada faiz dərəcəsi yüksək olduğu və tam şəkildə sığortalandığı üçün əmanətçilər milli valyuta ilə depozit yerləşdirməyə üstünlük verirlər”
Açıqlanan statistik rəqəmlərə əsasən, əhalinin banklardakı pulu 8 milyard manatı ötüb. 2018-ci il oktyabr ayının 1-nə Azərbaycan əhalisinin banklardakı əmanətlərinin milli valyuta ekvivalentində məbləği əvvəlki ilin eyni dövrü ilə müqayisədə 16,8 faiz artaraq 8 milyard 199,1 milyon manat təşkil edib.
Qeyd edək ki, əmanətlərin 62,6 faizi xarici, 37,4 faizi isə milli valyutada qoyulub. Milli valyutada olan əmanətlər ötən ilin müvafiq dövrünə nisbətən 1,5 dəfə, xarici valyutada əmanətlər isə 1,8 faiz artıb.
Cari il ərzində əhalinin banklarda olan əmanətinin həcminin 8 milyard manat təşkil etməsi necə göstərici sayıla bilər? Məsələ ilə bağlı bank sahəsi üzrə mütəxəssis Əkrəm Həsənova müraciət etdik.
O, “Bakı-Xəbər”ə açıqlamasında qeyd etdi ki, son iki il ərzində banklara yerləşdirilən əmanətlərin həcmi artıb. Ancaq bu artım uzunmüddətli olmaya bilər.
Həmsöhbətimizin sözlərinə görə, əsasən xarici valyuta ilə yerləşdirilən bank əmanətlərinin həcmi artıb. Ancaq bununla yanaşı, milli valyuta ilə yerləşdirilən əmanətlərin həcmində də artım qeydə alınır. Bunun da səbəbi manatın məzənnəsinin stabil qalmasıdır. Məlumdur ki, 2017-ci ilin fevral ayından başlayaraq manat sabitdir. Nəzərə almaq lazımdır ki, milli valyutada faiz dərəcəsi yüksəkdir və tam şəkildə sığortalanır. Bu səbəbdən də insanlar milli valyuta ilə əmanət yerləşdirməyə üstünlük verirlər.
Ekspert onu da vurğuladı ki, 2019-cu ilin mart yının 4-dən etibarən əmanətlərin sığortalanması ləğv olunacaq. Hmin tarixdən etibarən hansısa bank müflisləşsə, orada olan əmanətlər artıq tam sığortalı olmayacaq. Yalnız banka yerləşdirilən əmanətin 30 min manat hissəsi sığortalanacaq. Bu müddət artırılmasa, bank sisteminə yerləşdirilən əmanətlər azalar. Son aylar bank əmanətlərində qeydə alınan azalma tendensiyanın başlanğıcı kimi də qiymətləndirilə bilər: “Ancaq hesab edirəm ki, əmanətlərin tam olaraq sığortalanması müddəti bir neçə il uzana bilər. Belə olan halda, banka yatırılan əmanətlərin artmasının şahidi olarıq”.
Günel CƏLİLOVA
