Fikrət Yusifov: “Bununla bağlı potensial imkanlar dəyərləndirilməlidir”
SOCAR-ın Belarusun “Qrodno-Azot” şirkətinin modernləşdirilməsinə sərmayə qoyması imkanları müzakirə olunur. Bu sözləri Belarus Prezidenti Aleksandr Lukaşenko Minskdə Azərbaycan Prezidenti İlham Əliyevlə görüşdə deyib: “Siz lap yaxın vaxtlarda Türkiyədə neft emalı kompleksi inşa etmisiniz. Azərbaycanlı sərmayədarların Belarusa gəlişinə şad olarıq və strateji sahələrdə ciddi qarşılıqlı fəaliyyətə hazırıq. İndi Azərbaycan Dövlət Neft Şirkətinin “Qrodno-Azot” şirkətinin modernləşdirilməsinə sərmayə qoyması imkanları müzakirə edilir. Biz bu cür səyləri alqışlayırıq”.
Belarus dövlət başçısı onu da bildirib ki, üçüncü ölkələrin bazarlarının birgə mənimsənilməsinə başlamağa hazırıq: “Vaxtilə biz bu barədə yalnız arzu edirdik. Minsk və Gəncə zavodlarının iştirakı ilə Türkiyə üçün traktorların buraxılışı layihəsi yüksək hazırlıq səviyyəsindədir. Gələcək məhz bu cür təşəbbüslərindir, onlara istiqamətlənmək lazımdır. Azərbaycana elektrobuslar, liftlər, taxılyığan kombaynlar və digər kənd təsərrüfatı texnikası göndərilməsi və onların orada yığılması kimi istiqamətlər üzrə perspektivlər var”.
Bütün hallarda, görünən odur ki, Belarus Azərbaycanın ölkə xaricində böyük investisiya layihələri həyata keçirməsinin fərqindədir və bununla bağlı iqtisadi prosesləri izləyir. O üzdən, bu kimi layihələrin Belarusda da Azərbaycan tərəfindən həyata keçirilməsini arzulayır. Ona görə ki, bu, Belarus iqtisadiyyatının inkişafına müsbət təsir göstərəcək.
Maraqlıdır, bəs ekspertlər Lukaşenkonun bununla bağlı çağırışlarını necə dəyərləndirirlər?
Məsələyə münasibət bildirən iqtisad elmləri doktoru Fikrət Yusifovun sözlərinə görə, prinsipcə, Azərbaycanın Belarus iqtisadiyyatının müxtəlif sahələrində investisiya layihələri həyata keçirməsi mümkündür: “Məsələ ondadır ki, Azərbaycanla Belarus son illər ərzində dostluğun ən yaxşı nümunəsini qonşu dövlətlərə sərgilədilər. Bu münasibətlərin doğurdan da nümunəvi olduğunu hər kəs görür. Təbii ki, sözügedən münasibətlər ilk növbədə iki dövlət başçısının səmimi münasibətlərindən qaynaqlanır. İlham Əliyevlə Aleksandr Lukaşenkonun münasibətləri dostluğa, qarşılıqlı inama söykənən münasibətlərdir. Hansı ki, ötən illər ərzində bu bir neçə dəfə sübut olunub. Təbii ki, Azərbaycanla Belarus arasında iqtisadi əlaqələr getdikcə dərinləşir. Belarusda Azərbaycanda istehsal olunan qeyri-neft məhsullarının nümayiş etdirilməsi üçün ticarət evi var. İqtisadi-ticarət və o cümlədən hərbi müstəvidə əlaqələrin genişləndirilməsi üçün geniş imkanlar var. Bununla bağlı əlaqələrin daha da dərinləşdirilməsi qarşıya məqsəd qoyulub. Hesab edirəm ki, sözügedən müstəvidə SOCAR Belarus neft bazarında bir sıra layihələr həyata keçirə bilər. Həmin bazarda SOCAR-ın iştirakı, hər hansı bir müəssisənin qurulmasında və yaxud da modernləşdirilməsində iştirak etməsi tamamilə normal haldır. Bununla bağlı potensial imkanlar Belarusda varsa, niyə də belə layihələrə investisiya qoyulmasın. O baxımdan hesab edirəm ki, Azərbaycan Belarusda cəlbedici əhəmiyyət kəsb edən iqtisadi sahələrə böyük həcmdə sərmayələr yatıra bilər. Bu, neft-kimya sahəsi ilə də bağlı ola bilər, digər sahələrlə də. Bununla bağlı potensial imkanlar dəyərləndirilməlidir”.
Vidadi ORDAHALLI
