Ruslan Atakişiyev: “Təqaüdçülər, əlillər və digər kateqoriyaya aid olan insanların sosial vəziyyətinin yaxşılaşdırılması məqsədilə pensiya təminatında artım baş verəcək”
“45 min 500 insanın pensiyası 35 faiz artacaq”. Bunu əmək və əhalinin sosial müdafiəsi naziri Sahil Babayev mətbuat konfransında bildirib. O qeyd edib ki, pensiya təyinatının avtomatlaşdırılması pensiya sistemində inqilabi dəyişikliyə səbəb olacaq.
Nazir onu da qeyd edib ki, 2019-cu ildə 45 500 insanın pensiyası 35 faiz artacaq: “Gələn il, həmçinin, 38 min şəxsin aylıq gəliri 48% artacaq. Pensiya təyinatının avtomatlaşdırılması hər il 67 min pensiya alan şəxsin həyatını yüngülləşdirəcək. Artıq pensiyaların təyin olunması avtomatik qaydada aparılacaq, vətəndaşlarımızın Dövlət Sosial Müdafiə Fondunun yerli şöbələrinə getmələrinə ehtiyac qalmayacaq”.
2019-cu ildə 45 min 500 insanın pensiyasının faiz artması barədə fikir bildirən iqtisadçı-ekspert Ruslan Atakişiyev “Bakı-Xəbər”ə açıqlamasında qeyd etdi ki, dövlət büdcəsində sosial xərclər üçün 10 faizə yaxın artım qeydə alınacaq. Ümumilikdə, sosial xərclər üzrə ayrılan vəsaitin artımı gözlənir. 2019-cu ilin büdcə zərfində də qeyd olunur ki, sosial sahənin bir sıra sferalarında artım qeydə alınacaq. Əsasən təqaüdçülər, əlillər və digər kateqoriyaya aid olan insanların sosial vəziyyətinin yaxşılaşdırılması məqsədilə pensiya təminatında artım baş verəcək”.
Həmsöhbətimiz onu da vurğuladı ki, 2019-cu ilin dövlət büdcəsində gəlir və xərclərin təhlili göstərir ki, növbəti ildə əməkhaqları və pensiya məbləğlərində artım olacaq: “Məlumdur ki, bununla bağlı rəsmi açıqlamalar da ictimaiyyətə təqdim olunub. Pensiya məbləğinin artması sosial müdafiə baxımından çox vacibdir. 2019-cu il dövlət büdcəsi sosial prioritetliyini qoruyub saxlayır”.
İqtisadçının sözlərinə görə, hər il pensiya məbləği əvvəlki ilin inflyasiya səviyyəsinə uyğun olaraq indeksləşdirilirdi: “Məlumdur ki, 2018-ci ildə bu mexanizm dəyişdirildi. Əvvəlki ilin inflyasiya səviyyəsi deyil, orta aylıq əməkhaqqının artım səviyyəsi əsas götürülərək pensiya məbləği indeksləşdirildi”.
Günel CƏLİLOVA
