Fikrət Yusifov: “Qeyri-neft ixracında artımın əsas səbəbi…”
“Azərbaycanda qeyri-neft sektorunun inkişafı, qeyri-neft ixracının artırılması əsas məqsəddir. Bu ilin 10 ayında bizim qeyri-neft ixracımız 12%, ümumi ixracımız isə 37% artıb. İxrac artdıqca, bizim iqtisadi vəziyyətimiz daha da yaxşılaşır. Bu, makroiqtisadi sabitliyə, manatın məzənnəsinə müsbət təsir göstərir”.
Bunu Prezident İlham Əliyev Sumqayıt Kimya Sənaye Parkındakı tütün məmulatları istehsalı fabrikinin açılışında bildirib.
Prezident qeyd edib ki, Azərbaycanda makroiqtisadi sabitlik çox yaxşı səviyyədədir, inflyasiya on ayda cəmi 2,4%-dir. Bu müəssisələrin yaradılması yerli və xarici investorlar üçün növbəti bir siqnaldır ki, gəlsinlər Azərbaycana sərmayə qoysunlar: “Bu ilin 10 ayında ölkəmizin qeyri-neft sənayesi 10% artıb. Bu, çox gözəl göstəricidir. Kənd təsərrüfatı 5% artıb. Sumqayıt Kimya Sənaye Parkında əlbəttə ki, sənaye müəssisələri fəaliyyət göstərir, ancaq onların bəziləri kənd təsərrüfatına sıx bağlı olan müəssisələrdir, o cümlədən siqaret fabriki. Mən əminəm ki, bu fabrikin fəaliyyəti nəticəsində Azərbaycanda tütünçülüyün inkişafı daha yüksək templərlə gedəcək. Biz tütünçülüyü bərpa edirik, əgər keçən il 3 min ton quru tütün yığılmışdısa, bu gün artıq 4 500 ton yığılıb və 5 min tonu keçəcək. Əlbəttə ki, gələcəkdə bu fabrikdə bizim yerli tütündən daha da böyük həcmdə istifadə olunacaq. Yəni bu, kənd təsərrüfatına böyük təkan verir”.
Ekspertlər cari ilin 10 ayında qeyri-neft ixracının 12%, ümumi ixracın isə 37% artmasının gözlənilən olduğunu vurğulayırlar.
İqtisadçı-ekspert Fikrət Yusifov “Bakı-Xəbər”ə açıqlamasında qeyd etdi ki, qeyri-neft və ümumi ixracın artımı gözləniləndir: “Nəzərə almaq lazımdır ki, ümumi ixrac əsasən neftə bağlıdır. Qeyri-neft sektorunda isə ixracın 12 faiz artması olduqca yaxşı göstəricidir. Artımın səbəbi bir neçə il öncə real sektorun inkişafı istiqamətində dövlətin göstərdiyi xüsusi diqqətlə bağlıdır. Məlumdur ki, qeyd olunan sahənin inkişafı üçün çoxlu sayda sərəncam imzalanıb və icra mexanizminin uğurla tətbiq olunması ilə bağlıdır.Qeyri-neft sektorundan gözlənilən nəticə artıq özünü müsbət mənada büruzə verir. Üç il öncə real sektorun sürətli inkişafı qarşıya məqsəd olaraq qoyulmuşdü və nəticə göz qabağındadır”
Həmsöhbətimizin sözlərinə görə, qeyri-neft sənayesi və aqrar sektorda müsbət nəticələr əldə olunub. Qeyri-neft ixracında əsas artım qeyri-neft sənayesinin və aqrar sektorun məhsullarında qeydə alınıb.
İqtisadçı hesab edir ki, 2019-cu ildə iqtisadiyyatın real sektorunda artım sürəti indikindən daha yüksək olacaq: “Məlumat üçün bildirim ki, gələn il üçün iqtisadi artımın 3,6 faiz olacağı proqnoz edilir. Nəzərə almaq lazımdır ki, son illər ərzində real sektorun inkişafı ilə bağlı ciddi addımlar atılır. Qeyri-neft sektorunun ayrı-ayrı sahələrinə fərdi şəkildə nəzər yetirilsə məlum olar ki, əldə olunan nəticələr çox yüksəkdir. Hesab edirəm ki, gələn il Azərbaycanın bu sahədə əldə edəcəyi nəticələr 2018-ci illə müqayisədə iki dəfə yüksək olacaq”.
Günel CƏLİLOVA
