Əkbər Qoşalı: “Ölkəmizdə sosial təminat sisteminin əhatə etdiyi önəmli sayda əhali qrupunun mövcudluğu, bəlli istiqamətlər üzrə ödəmələrin ardıcıl olaraq artırılması...”
“Proqnozlar 2019-cu ildə əmək pensiyaçılarının orta sayının 1 milyon 294 min nəfər olacağını göstərir”. Məlum olduğu kimi, bunu əmək və əhalinin sosial müdafiəsi naziri Sahil Babayev Milli Məclisin plenar iclasında çıxışı zaman deyib.
Onun sözlərinə görə, Azərbaycanda sosial təminat sisteminin bütün istiqamətləri üzrə ödənişlərin davamlı artımına, bu sistemin əhatə dairəsinin genişləndirilməsinə nail olunmaqla dövlət başçısının tapşırıqları əsasında özünüməşğulluq proqramlarının icrasında aztəminatlı və həssas qruplar üçün dövlət dəstəyi, kiçik ailə təsərrüfatlarının biznesə çıxış imkanlarının yaradılması, onların ünvanlı sosial yardım proqramlarından asılılığının azaldılması və digər işlər geniş vüsət alıb.
Nazir bildirib ki, hesablamalara görə, 2019-cu ildə demoqrafik inkişaf meylləri, əhalinin məşğulluğu və sosial vəziyyətinin göstəriciləri, eləcə də pensiya qanunvericiliyində son dəyişikliklər nəzərə alınmaqla sığorta pensiya sisteminin əsas parametrləri aşağıdakı kimi gözlənir: “Doğulanların sayı 150 min nəfər, doğulanda gözlənilən ömrün uzunluğu qadınlar üçün 78, kişilər üçün 73.5 yaş təşkil edəcək. Bundan başqa, iqtisadiyyatla məşğul olanların sayı 4 milyon 994 min nəfər olacaq. Muzdlu işçilərin orta illik sayının 1 milyon 548 min nəfər olacağı proqnozlaşdırılır. Proqnozlar 2019-cu ildə əmək pensiyaçılarının orta sayının 1 milyon 294 min nəfər olacağını göstərir”.
Onu da qeyd edək ki, ilbəil dövlətin sosial yönümlü siyasəti güclənir və bu özünü bütün sferalarda göstərir. Pensiyaçıların aldığı təqaüdlər artırılır, sosial qayğıya ehtiyacı olanların vəziyyəti yaxşılaşdırılır və s.
Gələn il əmək pensiyaçılarının sayının 1 milyon 294 min nəfər olacağını nəzərə alsaq, aparılan sosial siyasət necə şərh olunur?
Məsələyə münasibət bildirən Azərbaycanda Atatürk Mərkəzinin şöbə müdiri, Milli QHT Forumu İdarə Heyətinin üzvü Əkbər Qoşalının sözlərinə görə, dövlətin bu yöndə apardığı siyasət təqdir olunmalıdır: “Əlbəttə, biz işləyən, özü öz dolanışığını təmin edən vətəndaşlarımızı alqışlayır, bütün yaşda onlara gümrahlıq arzulayırıq. Bununla belə, istər yaşa görə, istərsə də sağlamlıq durumuna və s. görə pensiyaya çıxan həmvətənlərimizi də anlayıb, onlara dövlət qayğısının göstərilməsini təqdir etməliyik. Ölkəmizdə sosial təminat sisteminin əhatə etdiyi önəmli sayda əhali qrupunun mövcudluğu, bəlli istiqamətlər üzrə ödəmələrin ardıcıl olaraq artırılması dövlətin öz vətəndaşına münasibətinin bir göstəricisi kimi dəyərləndirilə bilər. Hökumətin, konkret olaraq, əmək və əhalinin sosial təminatı sahəsinə məsul mərkəzi icra hakimiyyəti orqanının nail olmaq istədiyi özünüməşğulluq proqramlarının icrasında aztəminatlı, həssas qruplar üçün dəstək, kiçik ailə təsərrüfatlarının böyük biznesə çıxış və qovuşma imkanlarının yaradılması və s. kimi addımlar Prezidentimizin bu sahəyə konseptual baxışının nəticəsidir. Prezidentin tapşırıqları ilə sözügedən qrupların ünvanlı sosial yardım proqramlarından asılılığının mümkün qədər azaldılması, eləcə də buna bənzər işlərin geniş vüsət alması da vurğulamalı olduğumuz məqamlardandır. Ölkənin iqtisadi imkanları böyük olduğu üçün əmək pensiyalarının həcmi artır”.
Ə.Qoşalının açıqlamasından o da məlum oldu ki, bu məsələnin mərkəzi icra hakimiyyəti orqanları ilə qanunverici orqan arasında büdcə müzakirələri zamanı gündəmə gəlməsi mühüm əhəmiyyət kəsb edir: “Bu həm mövzunun həssaslığını, əhatə dairəsinin genişliyini, həm də məsələnin dövlət üçün prioritetliyini, başqa sözlə, dövlət qayğısı, dövlət nəzakəti və məsələnin xəlqi anlamını göstərməkdədir. Əlbəttə, sosial təminat sisteminin gücləndirilməsindən danışarkən, bu sistemin uzunmüddətli inkişafı üçün, daha son illərə, bəlkə son aylaradək də müşahidə olunan korrupsiya, süründürməçilik hallarını danmadan, əksinə, belə halları etiraf edib, aradan qaldırılması üçün daha təsirli mexanizmlərin işlənməsi, islahatlar zərfinin əsas hədəfi olaraq təsbit olunması təqdirəlayiqdir. Belə bir yanaşmanın, sosial ədalət prinsipini şəkilləndirərək, vətəndaşların məmnunluğuna gətirib çıxaracaq şəffaf sosial təminat sisteminin qurulmasına imkan verəcəyi ilə bağlı fikirləri bölüşürəm”.
Vidadi ORDAHALLI
