Könül Nuriyeva: “Qeyri-neft sekorunun əsas istiqamətlərindən sayılan kənd təsərrüfatı və turizm sahəsində inkişaf qeydə alınır”
“Həyata keçiriləcək kompleks tədbirlər nəticəsində iqtisadiyyatın prioritet sahəsi olan qeyri-neft sektorunun artımı 2019-cu ildə 3.9 faiz olacaq”. Bu barədə iqtisadiyyat naziri Şahin Mustafayev noyabrın 13-də Milli Məclisin plenar iclasında çıxışı zamanı məlumat verib.
O qeyd edib ki, kompleks dövlət dəstəyi göstərilən layihələrin ümumi dəyəri 2.5 milyard manat təşkil edən və tikintisi davam etdirilən 181 istehsal və emal müəssisələrinin istifadəyə verilməsi qeyri-neft sektorunun inkişafına mühüm töhfə verməklə yanaşı, 19 min yeni iş yeri yaradılmasına imkan verəcək.
2019-cu ildə qeyri-neft sektorunda artımın qeydə alınacağını tək yerli təşkilatlar deyil, eyni zamanda, beynəlxalq reytinq agentlikləri də proqnozlaşdırırlar.
İqtisadçı-ekspert Könül Nuriyeva bizimlə söhbətində qeyd etdi ki, ölkə iqtisadiyyatının inkişafı istiqamətində görülən işlər artıq müsbət nəticəsini büruzə verir: “Ölkə iqtisadiyyatında yaşanacaq inkişafı beynəlxalq maliyyə qurumları da proqnoz edir. Beynəlxalq Valyuta Fondu, Dünya Bankı, Asiya İnkişaf Bankı, Avropa Yenidənqurma və İnkişaf Bankı Azərbaycanda iqtisadi artımın olacağını proqnozlaşdırırlar.
İqtisadi artım əsasən qeyri-neft sektorunun hesabına formalaşır. Bəllidir ki, artıq əsas aparıcı sahə qeyri-neft sektorudur. Qeyri-neft sektorunun ixracında da artımlar qeydə alınıb. Bu da vacib məqamlardan biridir”.
İqtisadçının sözlərinə görə, qeyri-neft sekorunun əsas istiqamətlərindən sayılan aqrar və turizm sahəsində inkişaf qeydə alınır və alınacaq: “Bəllidir ki, qeyd olunan sahəyə dövlət tərəfindən xüsusi diqqət göstərilir. Aqrar sahə artıq inkişaf edir. Aqroparklar yaradılır. Kənd təsərrüfatının inkişafı üçün xarici təcrübə öyrənilərək tətbiq olunur. Eyni vəziyyət turizm sahəsində də yaşanır. Ölkə turizminin inkişaf etdiyini beynəlxalq təşkilatlat təsdiq edirlər. Turizmin inkişafı ilə bağlı görülən işlər sayəsində ölkəyə gələn turistlərin sayı daha da artacaq”.
K.Nuriyeva hesab edir ki, qeyri-neft sektoru 2019-cu ildə inkişaf dövrünü yaşayacaq.
Günel CƏLİLOVA
