Fuad İbrahimli: “Beynəlxalq təşkilatlar, ekspertlər ölkədə aparılan iqtisadi islahatların nəticəsinə əsasən Azərbaycan iqtisadiyyatı haqqında müsbət və doğru fikir bildirirlər”
Məlumdur ki, Azərbaycan Dünya Bankının "Doing Business-2019" reytinqində 190 ölkə arasında 25-ci yerdə qərarlaşıb. Bundan əvvəlki hesabatda ölkəmiz 57-ci yerdə idi.
“Doing Business-2019" reytinqində 190 ölkə arasında Azərbaycanın 25-ci yerdə qərarlaşması tək yerli mütəxəssislər tərəfindən deyil, eyni zamanda, xarici ekspertlər tərəfindən də dəyərləndirilir. Azərbaycanın qeyd olunan sırada qərarlaşması beynəlxalq ekspertlər tərəfindən gözlənilən olduğu vurğulanır.
Ukraynalı ekspert Aleksandr Oxrimenko Dünya Bankının “Doing Business-2019” hesabatında Azərbaycanın mövqeyinin yaxşılaşmasını şərh edərkən bildirib ki, Azərbaycan iqtisadiyyatının uğurları ölkə rəhbərliyinin düşünülmüş dövlət siyasətinin göstəricisidir: “Azərbaycan iqtisadiyyatının artımına son illərdə keçirilmiş köklü islahatlar yardım edib. Aydındır ki, Azərbaycan biznes mühitinin yaxşılaşmasına doğru hərəkət edir, bu isə bazar iqtisadiyyatı şərtlərində böyük əhəmiyyət kəsb edir. Azərbaycanda özəl biznesin aparılması üçün optimal şəraitin yaradılması onu göstərir ki, dövlət investisiya mühitinin yaxşılaşmasında və öz vətəndaşlarının rifahının artmasında maraqlıdır. Əlbəttə ki, dövlət tərəfindən bu cür yanaşma yalnız müsbət nəticələr verə bilər”.
Yerli və xarici ekspertlərin fikrincə, Azərbaycan iqtisadiyyatının uğurları ölkə rəhbərliyinin düşünülmüş dövlət siyasətinin göstəricisidir.
İqtisadçı-ekspert Fuad İbrahimli “Bakı-Xəbər”ə açıqlamasında qeyd etdi ki, inkişaf etmiş ölkələr Azərbaycan iqtisadiyyatının inkişafı haqqında mütəmadi məlumatlar yayırlar: “İstənilən ölkənin iqtisadiyyatında inkişaf qeydə alınırsa, bu dərhal beynəlxalq reytinq cədvəllərində öz əksini tapır. Danılmaz faktdır ki, artıq Azərbaycan iqtisadiyyatı inkişaf dövrünü yaşayır. Xatırladım ki, 2015-ci ildən sonra ölkə iqtisadiyyatı sürətlə inkişaf etməyə başladı. Həmin ildən etibarən operativ müdaxilələr nəticəsində, imzalanmış qərar və sərəncamlar, icra mexanizmlərinin həyata keçirilməsi nəticəsində bu gün müsbət nailiyyətlər əldə olunur. Müsbət nailiyyətlər xarici təşkilatların tərtib etdikləri hesabatlarda özünü göstərir”.
Həmsöhbətimiz onu da vurğuladı ki, iqtisadiyyatın hansısa sahəsində irəliləyiş nəzərəçarpan dərəcədə gözə görünməyə bilər. Ancaq bu sahədə reytinq müəyyən olunan zaman onun qanunvericilik bazasının təkmilləşdirilməsi nəzərə alınıb, hesabatda öz göstəricisini əldə edir: “Beynəlxalq təşkilatlar, ekspertlər ölkədə aparılan iqtisadi islahatların nəticəsinə əsasən Azərbaycan iqtisadiyyatı haqqında müsbət və doğru fikir bildirirlər. Doğrudan da Azərbaycan iqtisadiyyatının uğurları ölkə rəhbərliyinin düşünülmüş siyasətinin nəticəsidir. Vaxtında verilmiş düzgün qərarlar sayəsində Azərbaycan iqtisadiyyatı yüksələn xətt üzrə inkişaf edir”.
Günel CƏLİLOVA
