Vüqar Bayramov: “2014-cü ildən sonra dərinləşmiş islahatlar ölkəmizin beynəlxalq hesabatlarda mövqeyinin daha da yaxşılaşmasına səbəb olub”
Xəbər verildiyi kimi, Dünya Bankı tərəfindən hazırlanan “Doing Business - 2019” reytinq cədvəlində Azərbaycan 32 pillə irəliləyərək 190 ölkə arasında 57-ci yerdən 25-ə yüksəlib.
Belə ki, Azərbaycan biznes və həyatın 11 sahəsində müxtəlif göstəricilər üzrə 190 ölkə arasında ən yaxşılardan biri seçilib.
Hesabatda xüsusilə qeyd olunub ki, Azərbaycan 190 ölkə sırasında iqtisadiyyatında nəzərəçarpan irəliləyişin olduğu 10 ölkədən biridir. Bu onluğa Azərbaycanla yanaşı, Çin, Türkiyə, Hindistan və digər ölkələr də daxil olublar.
Reytinq cədvəlinə əsasən, Azərbaycan xarici şirkətlərin rahatlıqla və heç bir süni əngəl olmadan biznes qura biləcəkləri ən yaxşı 9-cu ölkədir. Eyni zamanda, Azərbaycan kiçik investorların hüquqlarının müdafiəsini ən yaxşı şəkildə təmin edən ikinci ölkədir.
Qeyd edək ki, bundan əvvəl “Doing Business - 2018” reytinqində Azərbaycan 57-ci yerdə qərarlaşmışdı. Göründüyü kimi, son bir ildə Azərbaycan 32 pillə irəliləyərək 25-ci yerdə qərarlaşıb. Bir il ərzində bu cür yüksəliş ciddi göstərici hesab olunur. Faktiki olaraq Azərbaycan 25-ci yerdə olmaqla MDB ölkələri arasında ən yaxşı göstəriciyə sahib olub. Bütün bunlar da təsadüfi deyil. Məsələ ondadır ki, son illər ölkədə aparılan sistemli islahatlar Azərbaycanın mövqeyinin əhəmiyyətli dərəcədə yüksəlməsinə öz təsirini göstərib.
Maraqlıdır, bəs ekspertlər Azərbaycanın reytinq cədvəlində mühüm yerə sahib olmasını necə şərh edirlər?
Məsələyə münasibət bildirən iqtisadçı-ekspert Vüqar Bayramov bunu bir neçə amillə əlaqələndirdi. Onun sözlərinə görə, Azərbaycan 2017-2018-ci illərdə ən çox islahat aparmış on ölkədən biridir: “Həmin dövrdə aparılan islahatların sayına görə dünyada birinci yerdədir. Azərbaycan 8 islahat aparıb, islahatların sayına görə isə qonşu Türkiyə (7 islahat) ikincidir. Azərbaycanın mövqeyinin güclənməsi məhz 8 islahatla bağlıdır. Bu, həm də Bakı Şəhər İcra Hakimiyyətində inşaat üçün icazələrin verilməsi prosedurlarının sadələşdirilməsi və "Bir pəncərə" sisteminin tətbiq edilməsi ilə bağlıdır. Praktik olaraq "Bir pəncərə" sisteminin tətbiq edilməsi qısa zamanda icazələrin əldə edilməsinə imkan verir ki, bu da lisenziyaların sayının 80 gün, icazə üçün tələb olunan məbləğin isə 12 min 563 manat və ya təxminən 7 min 500 dollar azalmasına gətirib çıxarıb. Digər islahat "ASAN xidmət" vasitəsilə elektron xidmətlərə çıxış imkanlarının artırılması ilə bağlıdır. Bu da Azərbaycanın mövqeyinin sözügedən hesabatda möhkəmlənməsinə təsir göstərən faktorlardan biridir. Daşınmaz əmlakın qeydiyyatı prosesinin asanlaşdırılması, şəffaflığın gücləndirilməsi, daha asan prosedurların tətbiq edilməsi, kreditə çıxış imkanlarının gücləndirilməsi, xüsusən kredit bürolarının yaradılması Azərbaycanın mövqeyinin yaxşılaşdırılmasını şərtləndirən amillərdən biridir. İnvestorların hüquqlarının qorunması ilə bağlı qaydaların təkmilləşdirilməsi, kiçik paya malik olan səhmdarların hüquqlarının qorunması mexanizminin işlənməsi Azərbaycanda aparılan islahatlardandır. Həmçinin, Azərbaycanın xarici ticarət əməliyyatlarında "Yaşıl dəhliz"i tətbiq etməsi mövqeyimizin möhkəmlənməsinə təsir edir. Müflisləşmə ilə bağlı prosedurların sadələşdirilməsi və əmək bazarında yeni qaydalar birbaşa Azərbaycanın mövqeyinin yaxşılaşdırılmasına təsir göstərən faktorlardan hesab olunur. Azərbaycan bu kontekstdən ötən il dünyada ən çox islahat aparan ölkə sırasını qoruyub saxlayıb.
Azərbaycanın hesabatla bağlı mövqelərinə diqqət yetirsək görərik ki, biznesə başlamağa görə dünyada 9-cu yerdədir, ilk onluğa daxildir. “Doing Business – 2019” hesabatı ondan xəbər verir ki, son illər aparılan islahatlar Azərbaycanın dünyanın ən aparıcı hesabatında mövqeyinin kəskin möhkəmlənməsinə gətirib çıxarıb. Bu, ölkədə aparılan islahatlara beynəlxalq qiymət kimi xarakterizə olunur. 2014-cü ildən sonra dərinləşmiş islahatlar ölkəmizin beynəlxalq hesabatlarda mövqeyinin daha da yaxşılaşmasına səbəb olub”.
Vidadi ORDAHALLI
