Pərviz Heydərov: “Ölkədə istehsal olunan kənd təsərrüfatı məhsullarının ümumi həcmi istənilən səviyyədə paya malik olmasa da, kifayət qədər iri aqrar məhsullar istehsal edən təsərrüfat subyektləri, istehsalçılar yaranıb”
Vergi azadolmalarının yüksək rentabelli sahələrdə tədricən aradan qaldırılması zərurəti ilə bağlı təkliflə Hesablama Palatası çıxış edib. Palata kənd təsərrüfatı məhsullarının sənaye üsulu ilə istehsalı seqmentində vergi tətbiqini mümkün sayır.
Qeyd edək ki, bu məsələ Hesablama Palatasının gələn il dövlət büdcə layihəsinə rəyində öz əksini tapıb.
Rəyə əsasən, kənd təsərrüfatı sahəsində fəaliyyət göstərən kiçik təsərrüfatlar (ailə təsərrüfatları və s.) istisna olmaqla, iri təsərrüfat subyektlərinə (kənd təsərrüfatı məhsullarının sənaye üsulu ilə istehsalı seqmentində) investisiyalarının faktiki həcmindən asılı olaraq, iqtisadiyyatın digər sahələrindən fərqli daha aşağı vergi dərəcələrinin tətbiq olunmasına başlanması məqsədəuyğun hesab edilir ki, inkişaf etmiş ölkələrin mütərəqqi təcrübələri də analoji yanaşmaların daha çox səmərə verdiyini göstərir”.
Hesablama Palatasının iri kənd təsərrüfatı subyektlərinin vergiyə cəlb olunması təklifinə münasibət bildirən iqtisadçı-ekspert Pərviz Heydərov “Bakı-Xəbər”ə açıqlamasında qeyd etdi ki, kənd təsərrüfatını inkişaf etdirmək üçün hökumət bir neçə il öncədən aqrar sektorun bir çox sahələrini vergidən azad etdi. Torpaq vergisindən başqa, bütün vergi növləri ləğv olundu: “Azərbaycan dövləti tərəfindən aqrar sektorun inkişafı illər öncə hədəf götürülüb. Kənd təsərrüfatı iqtisadiyyatın yeganə sahəsidir ki, hökumət bu sahəyə kifayət qədər güzəştlər tətbiq edir və etməkdə də davam edir”.
Həmsöhbətimizin sözlərinə görə, ölkədə istehsal olunan kənd təsərrüfatı məhsullarının ümumi həcmi istənilən səviyyədə paya malik olmasa da, kifayət qədər iri aqrar məhsullar istehsal edən təsərrüfat subyektləri, istehsalçılar yaranıb. Onlar bu sahədə müsbət fəaliyyət göstərirlər. Ekspert hesab edir ki, iri təsərrüfat subyektləri vergiyə cəlb olunmalıdırlar: “Nəzərə almaq lazımdır ki, elə iri aqrar təsərrüfat subyektləri mövcuddur ki, onların dövlətin güzəştlərindən istifadə etməsi məqsədəuyğun sayılmır. İri təsərrüfat sahələrinin vergiyə cəlb olunması vacibdir. Ancaq onu da nəzərə almaq lazımdır ki, bu elə bir formada həyata keçirilməlidir ki, aqrar sahədə əldə olunan nəticələrə xələl gətirilməsin. Bu sahədə düşünülmüş siyasət həyata keçirilməlidir”.
Günel CƏLİLOVA
