Nicat Nəsirli: “2018-ci ilin təhlili göstərir ki, ölkəmizin aqrar sektoru qarşısında yeni çağırışlar meydana çıxıb”
Azərbaycanda kənd təsərrüfatının inkişafına göstərilən diqqət və dəstək dünya miqyasında ən yüksək səviyyədədir və təqdirəlayiqdir. Xəbər verildiyi kimi, bunu Prezident İlham Əliyev “Ulu Aqro” MMC-nin Qax Aqroparkının açılışında çıxışı zamanı deyib.
Dövlət başçısının sözlərinə görə, kənd təsərrüfatının inkişafı ilə bağlı çox ciddi addımlar atılır: "Bu addımlar göstəricilərdə də özünü büruzə verir. Bu ilin doqquz ayında kənd təsərrüfatında 4,3 faiz artım var. Kənd təsərrüfatının bütün istiqamətləri üzrə planlı şəkildə iş aparılır və beləliklə, ənənəvi kənd təsərrüfatı sahələri – pambıqçılıq, üzümçülük, tütünçülük, fındıqçılıq, baramaçılıq, tərəvəzçilik və digər sahələr bərpa edilir. Biz elə etməliyik ki, Azərbaycan bütün ərzaq məhsulları ilə öz tələbatını özü ödəsin. Biz bu hədəfə yaxınlaşırıq”.
Prezident qeyd edib ki, bir sıra tədbirlərin görülməsi çöx gözəl nəticələrə gətirib çıxaracaq: “Əminəm ki, kənd təsərrüfatının sürətli inkişafı, subsidiyaların verilməsi, fermerlərin texnika ilə təchiz edilməsi, yanacağın, gübrənin güzəştli şərtlərlə verilməsi, kompleks tədbirlər, üstəgəl, ciddi islahatlar yaxın gələcəkdə çox gözəl nəticələrə gətirib çıxaracaq. Artıq biz nəticələri görürük. Hazırda pambıq yığımı mövsümü gedir və biz böyük məhsul gözləyirik, məhsuldarlıq da artacaq. Taxılçılıqda yaxşı nəticələr var. Biz tərəvəz istehsalı və ixracı ilə bağlı çox böyük işlər görmüşük. Dövlət hər zaman fermerlərin yanındadır. Azərbaycanda kənd təsərrüfatının inkişafına göstərilən diqqət və dəstək, hesab edirəm ki, dünya miqyasında ən yüksək səviyyədədir və təqdirəlayiqdir”.
Bütün bu deyilənlərin fonunda, Azərbaycanın kənd təsərrüfatı başqa ölkələrdən nə ilə fərqlənir?
Məsələyə münasibət bildirən “Ərzaq məhsullarının tədarükü və təchizatı” ASC-nin şöbə müdiri, kənd təsərrüfatı məsələləri üzrə ekspert Nicat Nəsirli buna bir neçə aspektdən yanaşdı: “Məlum olduğu kimi, 2013-cü ildən başlayaraq aqrar sektor ölkə iqtisadiyyatının aparıcı sahəsi elan olunaraq birbaşa və dolayı iqtisadi alətlər vasitəsilə dəstəklənir. Birbaşa dəstəyin mahiyyətini subsidiya, kreditləşmə, lizinq xidmətləri təşkil edirsə, dolayı dəstək siyasəti özündə bütün istehsalçıları əhatə edən tədarük sisteminin yaradılması, institusional idarəetmənin şəffaflaşdırılması, vergi-gömrük güzəştlərini ehtiva edir. Aydın məsələdir ki, iqtisadiyyatın ən risqli sahəsi olan kənd təsərrüfatı bütün dünyada dövlət tərəfindən dəstəklənir. Eyni zamanda, Azərbaycanda da mümkün olan himayə ortadadır. Nəticədə aqrar sektorun inkişafında 4 faizdən çox artım əldə olunub və bu proses ardıcıl davam etdirilir. Aqrar sektor ölkəmiz üçün xüsusi əhəmiyyət kəsb edir. Əhalinin əmək vərdişləri bütünlüklə kənd təsərrüfatına əsaslanır, on milyon nəfərə çatan əhalimizin 47 faizi kənd yerlərində yaşayır. Ölkədə məşğul əhalinin 36 faizi aqrar sahənin payına düşür. 863 min ailə təsərrüfatı çörəyini torpaqdan çıxarır. Bunun qarşılığında ÜDM-in cəmi 5,6 faizi aqrar sektorda formalaşır ki, bu çox kiçik göstəricidir. Təbii ki, bu analizlər dövlət orqanları tərəfindən fəal aparılır, həyata keçirilən məqsədyönlü tədbirlər inkişafa xidmət göstərir. 2018-ci ilin təhlili göstərir ki, ölkəmizin aqrar sektoru qarşısında yeni çağırışlar meydana çıxıb. Bu çağırışlara uyğun olaraq istehsalın bütün mərhələlərini özündə birləşdirən aqroparkların yaradılması, əməktutumlu sahələrin bərpası, yaxın və uzaq ixrac bazarlarına inteqrasiya strateji siyasətin aparıcı xətlərini təşkil edir”.
Vidadi ORDAHALLI
