Fikrət Yusifov: “Uçot dərəcəsinin 10 faizdən 9,75 faizə endirilməsi o deməkdir ki, Mərkəzi Bank kredit resurslarını müvəkkil banklara daha ucuz təklif edəcək”
Xəbər verildiyi kimi, Azərbaycanda uçot dərəcəsi azaldılıb. Azərbaycan Mərkəzi Bankının (AMB) İdarə Heyəti uçot dərəcəsinin 10%-dən 9,75%-ə endirilməsi, faiz dəhlizinin yuxarı və aşağı həddinin buna müvafiq olaraq+/-2% olması barədə qərar qəbul edib. Bu barədə AMB-nin sədri Elman Rüstəmov ötən gün keçirdiyi mətbuat konfransında məlumat verib.
Xatırladaq ki, qurumun İdarə Heyəti 12 fevral 2018-ci il tarixində uçot dərəcəsinin 15%-dən 13%-ə, faiz dəhlizinin yuxarı həddinin 18%-dən 16%-ə, aşağı həddinin isə 10%-dən 8%-ə endirilməsi, 2018-ci il aprelin 9-da uçot dərəcəsinin 13%-dən 11%-ə endirilməsi, faiz dəhlizinin yuxarı və aşağı həddinin isə +/- 3% səviyyəsində olması, 2018-ci il iyunun 14-də uçot dərəcəsinin 11%-dən 10%-ə endirilməsi, faiz dəhlizinin yuxarı və aşağı həddinin buna simmetrik diapazonda +/-2% səviyyəsində olması, 2018-ci il avqustun 1-də də eyni səviyyədə (uçot dərəcəsinin 10%, faiz dəhlizinin yuxarı həddi 12%, aşağı həddi 8%) saxlanması barədə qərar qəbul etmişdi.
Azərbaycanda uçot dərəcəsinin 10%-dən 9,75%-ə endirilməsi inflyasiyaya necə təsir edəcək?
İqtisadçı-ekspert, professor Fikrət Yusifov “Bakı-Xəbər”ə açıqlamasında qeyd etdi ki, inflyasiya səviyyəsinə uyğun olaraq, uçot dərəcəsinə yenidən baxılıb: “Uçot dərəcəsinin aşağı salınması yaxşı haldır. Uçot dərəcəsinin 10 faizdən 9,75 faizə endirilməsi o deməkdir ki, Mərkəzi Bank kredit resurslarını müvəkkil banklara daha ucuz təklif edəcək. Kreditlərin ucuz təklif olunması banklar tərəfindən iş adamlarına veriləcək kreditlərin daha sərfəli olmasına səbəb olacaq. Bu isə hazırkı şəraitdə real sektorun inkişafı üçün vacibdir”.
Ekspert hesab edir ki, uçot dərəcəsinin endirilməsi ölkə iqtisadiyyatı üçün pozitiv addımdır: “Uçot dərəcəsinin endirilməsi kommersiya bankları tərəfindən də qiymətləndirilməlidir. Banklar kredit resurslarını Mərkəzi Bankdan ucuz alarsa, onlar sahibkarlara veriləcək kreditin faizini aşağı salar”.
Günel CƏLİLOVA
