Robot “Sofiya”nın Azərbaycana gəlişi respublikamızda böyük əks-səda yaradıb. “Sofiya” Azərbaycanın əldə etdiyi uğurlar, həyata keçirdiyi layihələr haqqında təəssüratlarını Prezident İlham Əliyevlə söhbəti zamanı dilə gətirib. Onun “...ölkənizin gənc olmasına baxmayaraq, o, dünya miqyasında böyük layihələr həyata keçirir, yüksək texnologiyaların inkişafına töhfə verir” fikrinin özü də müzakirə predmetinə çevrilib.
“Gündəlik Teleqraf” MMC-nin direktoru, sabiq millət vəkili Aynur Camal bizimlə söhbətində robot “Sofiya”nın Azərbaycan dövlətinin nailiyyətlərini qeyd etməsini təsadüfi saymadığını bildirdi: “Bilirsiniz, “ASAN xidmət” mərkəzində Prezident İlham Əliyevlə robot “Sofiya”nın dialoqu ölkəmizdə çox böyük rezonans yaradıb. Həm sosial şəbəkələrdə, həm də mediada bu, böyük marağa səbəb olub. Bu dialoq zamanı “Sofiya”nın səsləndirdiyi fikirlər onu göstərir ki, Prezident İlham Əliyev dünyada baş verən bütün elmi-texniki yeniliklərin Azərbaycanda tətbiq olunmasına maraq göstərir və onu həyata keçirir. Çünki İlham Əliyev yenilikçi zəkaya malik bir siyasətçi, dövlət başçısıdır. İlham Əliyevin apardığı daxili və xarici siyasət məhz intellektual siyasət hesab olunur. Onun yüksək zəkası, modern düşüncəsi atdığı hər bir addımda özünü göstərir. “...ölkənizin gənc olmasına baxmayaraq, o, dünya miqyasında böyük layihələr həyata keçirir, yüksək texnologiyaların inkişafına töhfə verir” fikrini söyləyərkən “Sofiya” nəyi nəzərdə tuturdu? Azərbaycan gənc dövlət olmasına baxmayaraq, sürətlə inkişaf edir, Azərbaycanın bu gününü dünəni ilə müqayisə etdikdə bütün sahələrdə çox böyük fərq olduğu aydın olur. Bu fərq ölkəmizi gözəlləşdirən, inkişafa aparan fərqdir. Azərbaycanda baş verən müsbət yeniliklər, ölkəmizin bir sıra istiqamətlərdə, o cümlədən də yüksək texnologiyalar sahəsində əldə etdiyi uğurlar intellektual robotun da nəzərindən qaça bilməzdi. Düşünürəm ki, Azərbaycan dövləti Qafqaz bölgəsində artıq öz sözünü demiş bir dövlətdir. Torpaqlarımızı işğal altında saxlayan Ermənistanla müqayisədə Azərbaycanın qısa müddət ərzində necə böyük inkişaf yolu keçdiyi göz önündədir”.
O hesab edir ki, ölkəmizin iştirakı ilə həyata keçirilən bir sıra neft-qaz, infrastruktur, iqtisadi, mədəni layihələr, eləcə də ölkəmizin yüksək texnologiyalar sahəsində əldə etdiyi uğurlar beynəlxalq aləmdə də əks-səda yaratdığından, bu, “Sofiya”nın da diqqətindən yayınmayıb.
İradə SARIYEVA
