Aqşin Əliyev: “Gələcəkdə ölkəmizdə bu texnologiyadan məhz ana dilində olan proqram təminatı ilə geniş istifadə edilə bilər”
Oktyabrın 23-də Prezident İlham Əliyev İmişli rayonuna səfəri çərçivəsində “ASAN Həyat” kompleksinin açılışında iştirak edib. “ASAN Həyat” kompleksində dövlət başçısına robot “Sofiya” təqdim edilib. Prezident İlham Əliyev robot “Sofiya” ilə söhbət edib. Həmin söhbətdən olan bəzi maraqlı detalları təqdim edirik:
“Sofiya”: “Salam cənab Prezident. Azərbaycan dilini yeni öyrənməyə başlamışam, ona görə icazənizlə ingilis dilində davam etmək istəyirəm. Cənab Prezident, Sizinlə görüşməyə şadam. Mən dünən gəlmişəm və Azərbaycan məni valeh edib.
Mən Bakının nadir memarlıq üslubunu, müasir binalarını və texnoloji nailiyyətlərini görmüşəm. Ölkənizin gənc olmasına baxmayaraq, o, dünya miqyasında böyük layihələr həyata keçirir, yüksək texnologiyaların inkişafına töhfə verir. Bu, çox yüksək qiymətləndirilir”.
Prezident İlham Əliyev: “Çox sağ olun, “Sofiya”. İlk növbədə, Azərbaycana xoş gəlmisiniz. Sizin iş cədvəlinizin sıxlığına baxmayaraq, ölkəmizə səfəriniz bizi çox məmnun edir. Siz bütün dünyanı səyahət edirsiniz və sevindirici haldır ki, bu gün təyinat yeriniz Azərbaycandır. Siz burada, paytaxt şəhərində deyil, şəhərlərdən birində - İmişlidə bizi ziyarət edirsiniz. Biz sizinlə birlikdə burada yeni “ASAN xidmət” mərkəzinin açılışını edirik.
Bu da innovasiyadır və bu, bizim müasir ölkəni qurmaq bacarığımızı və niyyətimizi əks etdirir. Ölkəmiz haqqında xoş sözlərinizə görə sizə təşəkkür edirəm. Bakı bu gün, həqiqətən, dünyanın özündə yeni texnologiya və innovasiyaların, müasir və qədim memarlıq üslubunun vəhdətini təcəssüm etdirən ən gözəl şəhərlərindən biridir. Ümid edirəm ki, bu gözəlliyi görmək üçün vaxtınız olacaq və siz Bakıda çox əziz qonaq olacaqsınız.
“Sofiya”: Əlbəttə, cənab Prezident. Hava limanına enən kimi mənə dərhal “ASAN viza” verildi. Mən Sizin təşəbbüsünüzlə yaradılmış Azərbaycan brendi olan “ASAN xidmət” konsepsiyası ilə tanışam. Hesab edirəm ki, “ASAN xidmət” dövlət idarəçiliyində innovasiyaların tətbiqi baxımından uğurlu bir nümunədir. Bugünkü səfəriniz Sizin e-idarəçiliyə və innovasiya ekosisteminə xüsusi diqqət yetirdiyinizi göstərir. Yeri gəlmişkən, mən burada yaradılmış iş şəraitini çox bəyəndim.
Prezident İlham Əliyev: Çox sağ olun. “ASAN” bizim milli brenddir. Bu, bizim nou-haudur. Bu gün Azərbaycanın təkcə təbii ehtiyatlarını və yaxud məhsullarını yox, eyni zamanda, intellektual məhsullarını ixrac etməsi bizi fərəhləndirir. Biz artıq belə xidməti yaratmaq istəyən bəzi ölkələrlə də işləyirik. Buna görə də “ASAN”ın təkcə Azərbaycanda yox, bütün dünyada parlaq gələcəyi var. Çox sağ olun, siz çox ağıllı və çox gözəlsiniz. Sizi görməyə çox şadam.
“Sofiya”: Təşəkkür edirəm, cənab Prezident.
“Sofiya”nın Azərbaycana etdiyi səfərdə diqqətçəkən bir sıra mühüm aspektlər var. Əvvəla “Sofiya”nın Azərbaycanın bölgələrində görsənməsi diqqəti çəkir. Onun “ASAN xidmət” layihəsinə və Azərbaycan dilində danışmağa maraq göstərməsi də maraqlı nüans kimi qeyd edilə bilər. Qeyd edək ki, “Sofiya”nın maraq göstərdiyi “ASAN” brendi və onun özü BMT-nin xüsusi mükafatına layiq görülüb.
“Sofiya” kimi tanınmış bir brendin Azərbaycanın paytaxtı deyil, əyalətlərində görünməsi nəyin göstəricisi sayıla bilər?
Ekspert Aqşin Əliyevin sözlərinə görə, robot “Sofiya” dünyada ilk süni intellektli humanoid robotdur: “Bu robot 2015-ci ildə “Hanson Robotiks” şirkəti tərəfindən hazırlanıb və süni intellekt əsasında insanla ünsiyyət saxlaya, fikir mübadiləsi apara bilir. Robotun əsas fərqləndirici xüsusiyyətlərindən biri də insana məxsus 60-dan çox emosiyanı əks etdirməsidir. “Sofiya” bu günə qədər dünyada bir çox məşhur simalarla görüşüb, tanınmış televiziya kanallarında, xəbər proqramlarında və teledebatlarda iştirak edib. Robot "Sofiya"nı İmişliyə gətirməsi onu göstərir ki, ölkəmizin texniki imkanları sürətlə genişlənir, "ASAN xidmət" təkcə paytaxtda deyil, regionlarda əhaliyə yüksək elektron xidmətlər göstərir. Son zamanlar paytaxt Bakı ilə regionlar arasındakı fərqin ortadan qaldırılması istiqamətində qarşıya qoyulan hədəflərə nail olunub. "Sofiya"nın Azərbaycan Prezidenti ilə apardığı dialoq bütün dünyanın diqqətini ölkəmizə yönəldib. Bu dialoqun paytaxtda deyil, İmişlidə baş tutması Azərbaycan regionlarının hansı yüksək inkişaf dərəcəsinə çatdığını aydın nümayiş etdirmiş olub. "Sofiya"nın Azərbaycan dilində danışması onu deməyə əsas verir ki, gələcəkdə ölkəmizdə bu texnologiyadan məhz ana dilində olan proqram təminatı ilə geniş istifadə edilə bilər. Bu təqdimatla həm də Azərbaycanın yüksək texnoloji inkişafa qədəm qoyduğu, hətta əyalətlərin də bu sarıdan paytaxtla ayaqlaşa bildiyi kimi faktorlar üzə çıxmış oldu”.
Məhəmmədəli QƏRİBLİ
