Əli Əlirzayev: “Bütün bunlar bu və ya digər dərəcədə kənd təsərrüfatında səmərəli göstəricilərin əldə olunmasına öz müsbət təsirini göstərir”
“Kompleks tədbirlər nəticəsində kənd təsərrüfatının inkişafına nail oluruq”. Məlum olduğu kimi, bunu Prezident İlham Əliyev İmişli rayonunda Araz çayının yeni qol-kanalının açılış mərasimində çıxış edərkən deyib.
Dövlət başçısı bildirib ki, kənd təsərrüfatı doqquz ayda 4,3 faiz artıb və görüləcək tədbirlər nəticəsində daha da artacaq. Prezident bunu bir sıra arqumentlərlə əsaslandırıb: “Biz suvarma layihələrinin icrası ilə əkin sahələrimizi genişləndiririk və bu istiqamətdə əlavə tədbirlər görüləcək. Eyni zamanda, su olan yerdə məhsuldarlıq da artır. Biz bu artan məhsuldarlığı görürük. Xüsusilə, biz bunu iri fermer təsərrüfatlarının fəaliyyətində görürük. Taxılçılıq üzrə iri fermer təsərrüfatlarında məhsuldarlıq təqribən 50 sentnerə yaxındır, ya da ki, ondan çoxdur”.
Prezidentin fikrincə, həm meliorativ tədbirlər, həm də kənd təsərrüfatı sahəsində aparılan çox ciddi islahatlar, elmi yanaşma, torpaqlarda düzgün analizin aparılması və fermerlərə buna uyğun olaraq tövsiyələrin verilməsi öz nəticəsini verir: “Subsidiyalarda şəffaflığın təmin edilməsi, kənd təsərrüfatı texnikasının dövlət xətti ilə ölkəmizə gətirilməsi, - qeyd etməliyəm ki, bu il 5 mindən çox, keçən il 9 mindən artıq texnika aqrolizinq xətti ilə gətirilib fermerlərə verilmişdir, - gübrələrin, yanacağın güzəştli şərtlərlə fermerlərə verilməsi, fermerlərin vergilərdən tamamilə azad olunması, - torpaq vergisi istisna olmaqla, - bütün bu tədbirlər və üstəgəl, sahibkarlığın inkişafına təkan verən tədbirlər, güzəştli şərtlərlə 2 milyard manatdan çox kreditlərin verilməsi və eyni zamanda, kompleks tədbirlər nəticəsində biz kənd təsərrüfatının inkişafına nail oluruq”.
Ölkə başçısı əminliklə bəyan edib ki, növbəti illərdə bu sahədə daha böyük irəliləyiş qeydə alınacaq.
Maraqlıdır, bəs ekspertlər bütün bunları necə dəyərləndirirlər? Kənd təsərrüfatının inkişafına gətirib çıxaran kompleks tədbirlər nədən ibarətdir?
Sözügedən məsələni “Bakı-Xəbər”ə şərh edən iqtisadçı-alim Əli Əlirzayevin sözlərinə görə, bu bir sıra işlərin həyata keçirilməsindən ibarətdir: “Məsələ ondadır ki, ölkədə kənd təsərrüfatı sahəsində məhsuldarlığı artırmaq üçün bir sıra tədbirlər görülür. İstehsal olunan məhsulun həcmi artır. Bunu təmin etmək üçün bir sıra işlər görülür. İstehsalçılar lazımi vasitələrlə təmin olunur, kənddə məşğulluq təmin edilir, güzəştli şərtlərlə kreditlər verilir. Həmçinin, kənd təsərrüfatında bir sıra məhsulların istehsalı ilə əlaqədar subsidiyalar verilir. Digər tərəfdən, nəzərə almaq lazımdır ki, müasir tələblərə cavab verən anbarların sayı da artmaqdadır. Eyni zamanda, regionlarda kənd təsərrüfatı məhsullarının emalını həyata keçirən müəssisələr tikilir. Bütün bunlar bu və ya digər dərəcədə kənd təsərrüfatında səmərəli göstəricilərin əldə olunmasına öz müsbət təsirini göstərir. Başqa bir tərəfdən, görülən işlər sayəsində son illər kənd təsərrüfatı məhsullarının xaricə çıxarılması əhəmiyyətli dərəcədə yaxşılaşmaqdadır. Azərbaycan bir sıra kənd təsərrüfatı məhsullarını xaricə ixrac edir. Hesab edirəm ki, biz bu istiqamətdə işlərin daha yaxşı təşkil olunması ilə bağlı səylərimizi artırmalıyıq. O zaman Azərbaycanın kənd təsərrüfatı məhsullarının ixracından əldə etdiyi gəlirlərin həcmi daha da artacaq. Kənd təsərrüfatı məhsullarının istehsalı ilə yanaşı, onların emalı daha mühüm əhəmiyyət kəsb edir. Fikrimcə, bununla bağlı güclü emal sektoru qura bilsək, o zaman Azərbaycan daha çox gəlir əldə edəcək. Ölkənin sosial-iqtisadi inkişafında kənd təsərrüfatının rolu böyükdür. Kənd təsərrüfatında çalışanların stimullaşdırılması üçün görülən tədbirlər davamlı olmalıdır”.
Vidadi ORDAHALLI
