Qadir Bayramlı: “Qeyri-neft sektorunun inkişafı üçün kənd təsərrüfatı məhsullarının istehsalı və ixracının daha da artırılmasına ehtiyac var”
"Görülən işlərin nəticəsində aqrar sektorun davamlı inkişafı təmin olunub, bu ilin 9 ayında istehsal 4,3 faiz, kənd təsərrüfatı istehsalı və emalı məhsullarının ixracı ötən ilin müvafiq dövrü ilə müqayisədə 13 faiz artaraq 540 milyon ABŞ dollarına çatıb”. Bunu iqtisadiyyat naziri Şahin Mustafayev oktyabrın 22-də İmişli rayonunda Araz çayının yeni qol-kanalının açılış mərasimində çıxışı zamanı bildirib.
O qeyd edib ki, ixrac potensialının genişləndirilməsində qeyri-neft sektorunun prioritet istiqamətlərindən olan aqrar sahənin inkişafı xüsusi önəm kəsb edir. Aqrar sektorun inkişafında, regionlarda iqtisadi potensialın artırılmasında, ərzaq təhlükəsizliyinin möhkəmləndirilməsində yeni metod və üsulların tətbiqi, qabaqcıl texnologiyalara əsaslanan aqroparkların və iri fermer təsərrüfatlarının yaradılması mühüm əhəmiyyət kəsb edir.
Ekspertlər ötən ilin analoji dövrü ilə müqayisədə kənd təsərrüfatı istehsalı və emalı məhsullarının ixracının 13 faiz artmasının gözlənilən olduğunu bildirirlər.
Azərbaycan Dövlət İqtisad Universitetinin dosenti Qadir Bayramlı “Bakı-Xəbər”ə açıqlamasında qeyd etdi ki, kənd təsərrüfatı məhsullarının istehsalı və ixracı daha çox ola bilər: “Bunun üçün ekstentiv üsüldan intensiv təsərrüfat üsuluna keçmək lazımdır. Daha sonra aqrar sahəyə yanaşma tərzi tam olaraq dəyişdirilməlidir. Fermerlərin problemi yerindəcə araşdırılmalı və qısa müddət ərzində onların həll yolu tapılmalıdır. Eyni zamanda, təşviqedici proqramlar həyata keçirilməlidir. Fermerləri təmin edən səviyyədə və güzəştli şərtlərlə kredit verilməlidir. Həmçinin, fermerlərin kənd təsərrüfatı texnikası, gübrə təminatı və digər məsələlər tam şəkildə həll olunmalıdır. Fermerlərin sıxıntılarından biri də keyfiyyətli toxumun əldə olunmasıdır. Örüşlərin sayının məhdud səviyyədə olması fermerləri narahat edən problemlərdən biridir. Torpaqların erroziyaya uğraması məhsuldarlığın aşağı düşməsinə səbəb olur”.
Həmsöhbətimizin sözlərinə görə, fermerlərin maarifləndirilməsinə ehtiyac var: “Onların əsas problemlərindən biri bazara çıxmaqdır. Fermerlər maneəsiz bazara çıxış əldə etməlidirlər. Aqrar sığorta tətbiq olunmalıdır. Qeyd etdiyim məsələlər öz həllini taparsa, aqrar məhsulların istehsalında artım daha yüksək səviyyədə olar”.
Q.Bayramlı onu da vurğuladı ki, qeyri-neft sektorunun əsas prioritet sahələrindən biri də kənd təsərrüfatıdır: “Hazırda qeyri-neft sektorunun inkişafında əsas iki sahəyə böyük önəm verilir. Turizm və kənd təsərrüfatı. Onu da bildirim ki, son zamanlar kənd təsərrüfatının inkişafı istiqamətində müəyyən işlər görülür. Görülən işlər qeyd olunan sahəyə müsbət təsirini göstərir”.
Günel CƏLİLOVA
