Günel Fərhadqızı: “Ölkə iqtisadiyyatına investisiyaların cəlbi yeni iş yerlərinin açılmasına, yerli istehsalın artmasına, ölkə büdcəsinə vergi ödəmələrinə səbəb olur ki...”
Prezident İlham Əliyev Araz çayının yeni qol-kanalının açılışına həsr olunmuş mərasimdə çıxışı zamanı Azərbaycan iqtisadiyyatında müşahidə olunan müsbət meyllərdən danışıb.
Prezident bildirib ki, son illər ərzində kənd təsərrüfatı ilə bağlı görülən tədbirlər, bir çox məhsulların alış qiymətinin artımı nəticəsində kəndlilərdə kənd təsərrüfatına maraq böyük dərəcədə artıb: “Bu gün kəndlərdə, demək olar ki, məşğulluqla bağlı ciddi problem yoxdur, işləmək istəyən iş tapar. Biz sadəcə olaraq yeni investisiyalarla, yeni layihələrlə fermerlər üçün, kəndlilər üçün bu imkanları genişləndirməliyik və genişləndirəcəyik. Böyük maliyyə vəsaiti tələb edən beton su kanalının çəkilişi 53 min hektara, - hansılar ki, ya tamamilə suvarılmayıb, ya da ki, qismən suvarılıb, - yeni həyat gətiririk, imkanlar yaradırıq ki, vətəndaşlar əksinlər, becərsinlər, pul qazansınlar, daha yaxşı yaşasınlar, evlər tiksinlər və xalqımızın rifahı yüksəlsin”.
Prezident daha sonra qeyd edib ki, budur bizim əsas məqsədimiz və bu məqsədə çatmaq üçün biz əlimizdən gələni edirik: “Nəticələr də göz qabağındadır. Qeyd etdiyim kimi, məşğulluqla bağlı problemlər həll olunur, sahibkarlara bundan sonra da böyük diqqət göstəriləcək. İki milyard manatdan çox güzəştli kreditlərin verilməsi özlüyündə böyük nailiyyətdir, böyük nəticədir. Biz investisiyaların təşviqi ilə bağlı çox önəmli addımlar atmışıq, yeni mexanizm işlənilib. Təkcə aparılan islahatlar nəticəsində, investisiya təşviqi mexanizmi işə düşəndən sonra yerli sahibkarlar ölkə iqtisadiyyatına 2 milyard manatdan çox sərmayə qoyublar. Yəni imkanlar var, həm kreditləşmə yolu ilə, həm sahibkarların öz vəsaiti hesabına münbit şərait yaradılıb, investisiya iqlimi çox müsbətdir və dövlət dəstəyi də göz qabağındadır. Onu da bildirməliyəm ki, 45 böyük aqroparkın yaradılması nəzərdə tutulur. Onlardan 13-ü bu ilin sonuna qədər artıq fəaliyyətə başlayacaq, bəziləri artıq işləyir, mən onların açılışlarında olmuşam və 45 aqroparkın istifadə etdiyi torpaq sahəsi təqribən 200 min hektara yaxındır. O torpaqlarda heç nə əkilmirdi və o torpaqlar elə boş torpaqlar kimi qalırdı. Biz o torpaqlara həyat qaytardıq”.
Ölkə başçısının çıxışında diqqətçəkən vacib nüanslardan biri də yerli sahibkarların ölkə iqtisadiyyatına qoyduqları investisiyanın həcmi ilə bağlıdır. Bu xüsusda ölkə başçısı qeyd edir ki, investisiya təşviqi mexanizmi işə düşəndən sonra yerli sahibkarlar ölkə iqtisadiyyatına 2 milyard manatdan çox sərmayə qoyublar. Ölkə iqtisadiyyatında müşahidə edilən bu tendensiyanı necə qiymətləndirmək olar?
İqtisadçı Günel Fərhadqızı qəzetimizə açıqlamasında bildirdi ki, ölkə iqtisadiyyatına investisiyanın cəlbi, istənilən halda, yaxşı tendensiya kimi dəyərləndirilir: “Bilirsiniz ki, bu sahədə ölkəmizin əldə etdiyi irəliləyiş və uğurları daha çox xarici investisiyanın cəlbi baxımından dəyərləndirirlər. Qeyd etmək yerinə düşər ki, Azərbaycanda son illər yaradılmış əlverişli biznes mühiti ölkədə iqtisadi fəallığın artmasına, yerli və xarici kapitallı müxtəlif müəssisələrin yaradılmasına, ölkəmizə investisiya qoyuluşunun çoxalmasına şərait yaradıb. Bu uğurların əldə edilməsində dövlət dəstəyi mexanizmlərinin də böyük rolu var. Məlumdur ki, ölkənin ixrac qabiliyyətinin artırılması və investisiyaların cəlb edilməsi məqsədilə xüsusi fond yaradılıb. Azərbaycanda İxracın və İnvestisiyaların Təşviqi Fondunu xüsusi qeyd etmək olar. Həmin fond ölkə iqtisadiyyatının prioritet sahələrinə, xüsusilə qeyri-neft sahəsinə xarici investorların cəlb olunması istiqamətində çoxşaxəli işlər aparır. Azərbaycanın regionda investisiyalar üçün ən cəlbedici məkan kimi təşviq edilməsi, xarici sahibkarlara biznesin qurulması və inkişaf etdirilməsi üzrə xidmətlərin göstərilməsi, investisiyaların cəlb edilməsi üzrə ən qabaqcıl ölkələrin təcrübəsinin öyrənilməsi istər yerli, istərsə də əcnəbi investorların ölkəyə olan marağını artırmış olur. İnvestisiyaların ölkə iqtisadiyyatına cəlb edilməsi Azərbaycan dövlətinin müəyyən etdiyi iqtisadi inkişaf strategiyasının mühüm tərkib hissəsidir. Son dövrlər ölkədəki siyasi sabitlik və iqtisadi inkişaf həm yerli, həm də əcnəbi sahibkarların Azərbaycan iqtisadiyyatına uzunmüddətli sərmayə qoymaq marağını daha da artırmış olur. Prezidentin qeyd etdiyi kimi, investisiya mühitinin təşviqi bu sahədə yerli iş adamlarını da hərəkətə gətirib və bunun nəticəsində onlar ölkə iqtisadiyyatına 2 milyarddan artıq sərməyə qoyublar. Bu, kiçik rəqəm deyil. Ölkə iqtisadiyyatına investisiyaların cəlbi yeni iş yerlərinin açılmasına, yerli istehsalın artmasına, ölkə büdcəsinə vergi ödəmələrinə səbəb olur ki, bunun da milli iqtisadayyata yalnız xeyri var. Əminliklə demək olar ki, bu inkişaf tempi ölkə iqtisadiyyatına həm yerli, həm də xarici investisiyaların qoyulmasında ciddi artıma səbəb olacaq”.
Məhəmmədəli QƏRİBLİ
