Rüfət Quliyev: “Bu gün Azərbaycan bir sıra nəhəng iqtisadi layihələrin təşəbbüskarı kimi çıxış edir və bu layihələrin gerçəkləşməsində birbaşa rola malikdir”
Məlum olduğu kimi, oktyabrın 19-da Türkiyənin İzmir şəhərində “Star” neft emalı zavodunun açılış mərasimi keçirilib. Azərbaycan Prezidenti İlham Əliyev və Türkiyə Respublikasının Prezidenti Rəcəb Tayyib Ərdoğan mərasimdə iştirak ediblər.
Xatırladaq ki, "Star” zavodunun təməli 2011-ci il oktyabrın 25-də Azərbaycan Prezidenti İlham Əliyev və Türkiyə Prezidenti Rəcəb Tayyib Ərdoğan tərəfindən qoyulub. Zavodu “Técnicas Reunidas” (İspaniya), “Saipem” (İtaliya), “GS Engineering & Construction Corp” (Cənubi Koreya) və “Itochu” (Yaponiya) şirkətlərindən ibarət konsorsium inşa edib. Bununla bağlı müqavilə 2013-cü il mayın 20-də imzalanıb. Ümumi investisiya dəyəri 6,3 mlrd. ABŞ dolları təşkil edən zavodda ildə 10 mln. ton xam neftin emalı nəzərdə tutulur. Zavodda avqustdan etibarən sınaq məqsədilə xam neft emalına başlanıb. Bura ilk neft yükü məhz Azərbaycandan olmaqla 80 min ton "Azeri Light” markalı neft çatdırılıb.
Türkiyənin İzmir şəhərində “Star” zavodunun açılışı Azərbaycanın investor ölkə kimi dünyada nüfuzunu daha da artırır. Bu zavod sayəsində Azərbaycan dünyanın iri investor ölkələrindən biri kimi tanınacaq.
Millət vəkili Rüfət Quliyev “Bakı-Xəbər”ə açıqlamasında qeyd etdi ki, "Star” layihəsi həm Azərbaycan, həm də Türkiyə iqtisadiyyatının inkişafına təkan verəcək: "Bu layihənin həyata keçirilməsi və eyni zamanda, ölkəmizin belə bir layihədə yer alması Azərbaycanın iqtisadi qüdrətinin göstəricisidir. İqtisadiyyatımız fundamental və stabil inkişafa malik olmasa, bu cür layihələrə qatıla bilməzdik. Bu gün Azərbaycan bir sıra nəhəng iqtisadi layihələrin təşəbbüskarı kimi çıxış edir və bu layihələrin gerçəkləşməsində birbaşa rola malikdir. Bütün bunlar ölkə iqtisadiyyatının dinamik inkişafından xəbər verir”.
Millət vəkili hesab edir ki, bu gün Azərbaycan bir sıra ölkələrə investisiya yatırır: “Türkiyədə “Star” zavodunun açılması onu göstərir ki, Azərbaycan dünyanın iri sərmayə yatıran ölkələrindən biridir. Bu, ölkəmizin iqtisadi qüdrətindən xəbər verir.
Bundan əlavə, “Star” neft emalı zavodu Türkiyədə özəl sektorun bir nöqtəyə qoyduğu böyük investisiya layihəsidir. Bu müəssisə Türkiyədə iqtisadiyyatın və sənayenin inkişafına töhfə verməklə, strateji məhsulların istehsalında əhəmiyyətli rola malikdir. Belə ki, o, Türkiyənin idxaldan asılılığını azaltmaqla ölkə iqtisadiyyatına 1,5 milyard dollar əlavə gəlir gətirəcək”.
Həmsöhbətimiz onu da vurğuladı ki, “Star Rafineri”nin yaradılması üçün Azərbaycan 6,3 milyard dollar yatırım edib, növbəti mərhələdə əlavə 700 milyon dollar yatırım edəcək: “Bu, bizim xaricə qoyduğumuz ən böyük yatırımdır. Türkiyədə ən böyük investisiya qoyuluşu olan “Star Rafineri” zavodu Azərbaycanın böyük iqtisadi gəlir əldə etməsinə şərait yaradacaq: “Müəssisənin işə düşməsi SOCAR-ın və Azərbaycan dövlətinin gəlirini artıracaq. Bu gəlirlərdən səmərəli istifadə olunması, onların yenidən gəlirli sahələrə yatırılması ölkəmiz üçün böyük faydalar verəcək”.
Deputatın sözlərinə görə, Azərbaycan və Türkiyənin həyata keçirdiyi nəhəng layihələr həm iki dövlət, xalq, həm də bölgə və dünya üçün çox böyük önəm daşıyır.
Günel CƏLİLOVA
