Vüqar Bayramov: “Bu, ölkə iqtisadiyyatının dəyərləndirilməsi ilə yanaşı, gələcəkdə iqtisadi artım üçün formalaşmış bazaya pozitiv təsir göstərir”
Avropa Reytinq Agentliyi (ERA) Azərbaycanın uzunmüddətli kredit reytinqini "BB+" səviyyəsində müəyyən edib. Bu barədə ERA-nın yaydığı məlumatda bildirilir. Qurum uzunmüddətli reytinqin proqnozunu isə “Stabil” olaraq təsdiqləyib. Başqa sözlə, agentlik qarşıdakı 12 ayda Azərbaycanın reytinqinin sabit olacağını proqnozlaşdırıb.
ERA-nın qiymətləndirməsinə görə, bu il Azərbaycanda ümumdaxili məhsulun (ÜDM) artımı 1,5%, gələn il isə 2,1% təşkil edəcək. Qurumun mütəxəssisləri 2018-ci ildə nominal ÜDM-in həcmini 44,1 mlrd. ABŞ dolları, 2019-cu ildə isə 47,441 mlrd. dollar səviyyəsində proqnozlaşdırırlar.
Bu proqnozlar 2018-2019-cu illərdə neftin orta qiymətinin 60-70 dollar səviyyəsinə əsaslanaraq tərtib edilib. Agentlikdə hesab edirlər ki, bu qiymət neft sektorunda ümumi iqtisadi effektivliyin daha da yüksəlməsinə imkan verəcək. Agentliyin proqnozlarına görə, 2018-2019-cu illərdə Azərbaycanda neft hasilatı 39,8-40 mln. ton olacaq: “İqtisadiyyatın artımına bu ilin yanvar-avqust aylarında qeyri-neft sənayesində 10%-lik böyümə dəstək verib. Xarici ticarət dövriyyəsində müsbət saldo Azərbaycanın valyuta ehtiyatlarının artmasına səbəb olub. Xarici valyutada ödəmə qabiliyyətinin daha da güclənəcəyi gözlənir. Yanvar-avqust aylarında inflyasiya 2,7% təşkil edib, manatın məzənnəsinin sabitləşməsi milli valyutaya təzyiqin azalacağından xəbər verir”.
Məlumatda o da bildirilir ki, 2018-ci ildə Azərbaycanda orta illik inflyasiya 5,9%, gələn il isə 5,7% təşkil edəcək. Ümumiyyətlə, agentliyin mütəxəssisləri hesab edirlər ki, iqtisadiyyatda islahatlar Azərbaycanda ÜDM-in artımını sürətləndirəcək.
Maraqlıdır, Dünya İqtisadi Forumunun (DIF) Qlobal Rəqabətlilik Hesabatından sonra Azərbaycanla bağlı növbəti müsbət dəyərləndirməni ekspertlər necə qiymətləndirirlər?
Sözügedən məsələ ilə bağlı fikirlərini “Bakı-Xəbər”lə bölüşən iqtisadçı-ekspert Vüqar Bayramov bu tendensiyaya müsbət prizmadan yanaşdı: “Azərbaycan üçün beynəlxalq reytinqlər, o cümlədən qiymətləndirici şirkətlərin reytinqləri çox vacibdir. Məsələ ondadır ki, nəticə etibarilə 2017-ci ildə iqtisadiyyatda stabilliyin bərpa olunması 2018-ci ildə iqtisadi artımın bərpa edilməsinə gətirib çıxardı. Bütün bunların sayəsində 2018, 2019 və növbəti illərdə ölkədə iqtisadi artım davam edəcək. Beynəlxalq maliyyə qurumlarının da hesabatlarında Azərbaycanda iqtisadi artımın daha sürətli olacağı bildirilir. Bu baxımdan beynəlxalq reytinqlərdə, hesabatlarda Azərbaycanın vəziyyətinin yaxşılaşması və pozitiv reytinqə malik olmağımız mühüm əhəmiyyət kəsb edir. Bu həm ölkədəki mövcud iqtisadi vəziyyətin qiymətləndirilməsi baxımından, həm də ölkəyə sərmayələrin cəlb edilməsi baxımından əhəmiyyətlidir. Nəzərə almaq lazımdır ki, ölkənin reytinqi nə qədər yaxşılaşırsa, bu, nəticə etibarilə, ölkəyə böyük həcmdə sərmayənin cəlb edilməsinə imkan verir. Bütün bunlar da iqtisadiyyatın dayanıqlı inkişafı baxımından çox vacibdir. Ona görə də belə reytinqlər sadəcə xarici beynəlxalq qiymətləndirmə deyil, həm də iqtisadiyyatın inkişafı, iqtisadiyyata investisiyanın cəlb olunması baxımından əhəmiyyətli hesab olunduğu üçün, yeni qiymətləndirmə müsbət əhəmiyyətə malikdir. Bu, ölkə iqtisadiyyatının dəyərləndirilməsi ilə yanaşı, gələcəkdə iqtisadi artım üçün formalaşmış bazaya pozitiv təsir göstərir”.
Vidadi ORDAHALLI
