Vahid Əhmədov: “Azərbaycan sözügedən layihədən ildə təxminən 800-850 milyon dollar mənfəət götürə biləcək”
Məlum olduğu kimi, ötən həftə Türkiyənin İzmir şəhərində “Star” neft emalı zavodunun açılış mərasimi keçirilib. Azərbaycan, Türkiyə prezidentləri İlham Əliyev və Rəcəb Tayyib Ərdoğan mərasimdə iştirak ediblər.
Prezident Rəcəb Tayyib Ərdoğan Türkiyə və Azərbaycanın güclü siyasi iradə ilə Avrasiyanın enerji və nəqliyyat xəritəsini yenidən yaratdığını bildirib.
SOCAR prezidenti Rövnəq Abdullayev deyib ki, bu gün Azərbaycan Dövlət Neft Şirkəti (SOCAR) Türkiyənin ən böyük xarici investoruna çevrilib. Onun fikrincə, STAR neft emalı zavodu müxtəlif çeşidli neftlərin emalını həyata keçirə biləcək ən son texnologiya ilə dizayn edilib: “Bu yatırımlar bizim Aralıq dənizi bazarında mövqelərimizi möhkəmləndirəcək. “Petkim” üçün xammal olan nafta burada istehsal olunacaq və Türkiyənin idxaldan asılılığı xeyli dərəcədə azalacaq. Burada, həmçinin, neft-kimya sənayesi üçün digər aralıq məhsullar da istehsal ediləcək”.
Məlumat üçün qeyd edək ki, “Star”ın istehsal gücü ildə 10 milyon ton (240 min barrel/gün) xam neft təşkil edir. “Star” layihəsinin dəyəri ümumilikdə 6,3 milyard ABŞ dollarıdır. Layihə özünü maliyyələşdirir və borclar zavod işə düşdükdən sonra “Star” tərəfindən ödəniləcək.
Bütövlükdə, fəaliyyətə başlayan sözügedən zavod hər iki ölkənin iqtisadiyyatına nə verəcək?
Sözügedən məsələni dəyərləndirən millət vəkili Vahid Əhmədov buna bir neçə prizmadan yanaşır. Onun fikrincə, “Star” neft emalı zavodu çox böyük bir layihədir və hər iki ölkə bundan qazanacaq: “Azərbaycan müstəqillik dövründə bütün layihələrini Türkiyə vasitəsilə həyata keçirib. Çünki qardaş Türkiyə ilə iqtisadi, siyasi, mədəni, humanitar və hərbi əlaqələrimiz çox yüksək səviyyədədir. Dövlət başçıları da çox mehriban və səmimi münasibətlərə malikdirlər. Məhz bunun sayəsində də Azərbaycan və Türkiyə bu gün hədəflərinə uğurla çatırlar. Bakı-Tiflis-Ceyhan neft, Bakı-Ərzurum qaz kəmərləri, Bakı-Tiflis-Qars dəmir yolu layihələri məhz Türkiyə vasitəsilə həyata keçirilib. Məlum olduğu kimi, Azərbaycan və Türkiyə prezidentlərinin iştirakı ilə “Star” neft emalı zavodunun açılışı oldu. Bu zavodun istifadəyə verilməsi Azərbaycan və Türkiyənin böyük uğurudur. Çünki “Star”Avropada ən iri neft emalı zavodlarından biridir. Layihənin dəyəri 6,3 milyard dollardır. Zavod ildə 10 milyon ton xam neft emal edəcək. “Star” Türkiyənin daxili tələbatının 25 faizini tam ödəyəcək. Hətta Türkiyədə emal ediləcək neftin xarici bazarlara ixrac edilməsi də mümkündür. Bu isə ölkəmiz üçün çox böyük əhəmiyyət kəsb edir. Azərbaycan sözügedən layihədən ildə təxminən 800-850 milyon dollar mənfəət götürə biləcək. Bu isə ölkəmizin iqtisadi inkişafına böyük təkan verəcək. Azərbaycan və Türkiyə münasibətləri elə bir yüksək strateji səviyyəyə çatıb ki, dünyada bu cür iqtisadi və siyasi əlaqələrə malik olan ikinci nümunə yoxdur. Türkiyə harada varsa, orada Azərbaycan, Azərbaycan harada varsa, orada Türkiyə var”.
Vidadi ORDAHALLI
