“Hesab edirəm ki, islahatlar dərinləşdikcə daha çox xarici investor ölkə iqtisadiyyatına yatrımlar edəcək”
Azərbaycan Mikromaliyyə Assosiasiyası (AMFA) ölkənin mikrokredit bazarı üçün vəsait toplamaq məqsədilə xarici investorlarla danışıqlar aparır. Bu barədə mətbuata açıqlamasında AMFA-nın icraçı direktoru Zaliyyə Hacıyeva bildirib.
Onun sözlərinə görə, Assosiasiya Hollandiya, Almaniya, Fransa və ABŞ-dan təxminən 20 investorla danışıqlar aparıb. Azərbaycanın qeyri-bank kredit təşkilatlarından biri (NBCO) təkrar investisiyaların cəlb olunmasına nail olub: "İnşallah, gələcək ildə yenidən investisiyaların sayı artacaq və bu istiqamətdə danışıqlar aparırıq”.
Eyni zamanda Hacıyeva bir sıra xarici investorların mikrokredit bazarında vəziyyətin yaxşılaşmasını gözlədiyini qeyd edib: "Gələn il bazarın vəziyyəti yaxşılaşdıqdan sonra Azərbaycanda öz pullarını yenidən investisiya etməyə maraq göstərə bilərlər”.
Məlumat üçün qeyd edək ki, Azərbaycan Mərkəzi Bankının məlumatına görə, 1 sentyabr 2018-ci il tarixinə bank olmayan kredit təşkilatlarının kredit portfeli 401,1 milyon manat təşkil edib.Bu da ötən ilin analoji dövrü ilə müqayisədə 11,32 faiz azdır.
Hesabat dövründə Azərbaycanın kredit bazarında BOKT-un payı 3,7 faizdən 3,3 faizədək azalıb.
Ümumən bu təşəbbüsü ekspertlər necə dəyərləndirir?
Sözügedən məsələni “Bakı-Xəbər”ə şərh edən iqtisad elmləri doktoru Fikrət Yusifov buna müsbət prizmadan yanaşdı: “Bu gün Azərbaycan xarici investisiyaların cəlb edilə biləcəyi ən münbit ölkələrdən biridir. Bu münbitliyi yaradan başlıca şərtlərdən biri aparılan iqtisadi islahatlar nəticəsində biznes mühitin şəffaflaşdırılmasıdırsa, digəri ölkədə artıq uzun illərdir hökm sürən ictimai-siyasi sabitlikdir. İnvestorlar bu iki amilin vəhdət təşkil etdiyi ölkələrə məmuniyyətlə yatrımlar edirlər. Elə bunun nəticəsidir ki, ötən il Azərbaycan iqtisadiyyatına yatırılan xarici investisiyaların həcmi Ermənistan hökumətinin həmən ildə cəlb etdiyi xarici investisiyalardan 37,5 dəfə, Gürcüstana yatırılan xarici investisiyalardan isə 6,2 dəfə çox olub. Bəzən beynəlxalq reytinq agentlikləri Azərbaycanı biznesin şəffaflığı və bu qəbildən olan digər analoji göstəricilərə görə aşağı yerlərdə sıralasalar da, biznes mühitinin necə olmasına ən yaxşı qiyməti verən investor olduğundan, bu sıralamaların ikili standartlar əsasında müəyyən edildiyinə şübhə qalmır. Hesab edirəm ki, islahatlar dərinləşdikcə daha çox xarici investor Azərbaycan iqtisadiyyatına yatrımlar edəcək. Ən önəmli olan budur ki, indi bu investisiyaların 2/3 hissəsi ölkə iqtisadiyyatının qeyri-neft sektoruna yatırılır. Bu isə iqtisadiyyatımızın daha sürətlə şaxələndirilməsində çox mühüm rol oynayır”.
Vidadi ORDAHALLI
