Rəsul Cahangirli: “Bu da əhalinin aztəminatlı təbəqəsinin yaşayış şəraitinə müsbət təsir göstərir”
Azərbaycanda pensiyaların orta aylıq məbləğində 8,4 faiz artım qeydə alınıb. Bu barədə Əmək və Əhalinin Sosial Müdafiəsi Nazirliyi məlumat yayıb. Nazirlikdən verilən məlumata görə, Prezidenti İlham Əliyevin tapşırıqlarına əsasən həyata keçirilən sosial müdafiə tədbirləri, həmçinin, sığorta-pensiya sisteminin davamlı inkişafı sosial təminat sisteminin mühüm komponenti olan pensiyaların cari ildə də mütəmadi artımına imkan verib.
2018-ci ilin 1 oktyabr tarixinə ölkəmizdə pensiyaların orta aylıq məbləği 2017-ci ilin müvafiq dövrünə nisbətən 8,4 faiz artaraq 221,1 manata çatıb. O cümlədən, yaşa görə pensiyaların orta aylıq məbləği 9 faiz çoxalaraq 249,1 manat təşkil edib. Eyni zamanda, cari ilin 9 ayında pensiyaların maliyyələşməsinə ötən ilin müvafiq dövrünə nisbətən 7,6 faiz (və ya 186,9 milyon manat) çox vəsait yönəldilib.
ƏƏSMN yanında Dövlət Sosial Müdafiə Fonduna daxilolmaların həcmində artım dinamikasının davam etməsi nəticəsində hər bir ay üzrə pensiyaların qrafik əsasında vaxtlı-vaxtında maliyyələşdirilməsi təmin olunur.
Məlumat üçün qeyd edək ki, Azərbaycanda pensiya alanların sayı 1 milyon 309 min nəfərdir ki, bu da ölkə əhalisinin 13,2 faizini təşkil edir. Pensiyaçıların 58,5 faizi yaşa, 11,5 faizi ailə başçısını itirməyə, qalanları isə əlilliyə görə pensiya alanlardır.
Ümumilikdə, bir belə pensiyaçının orta aylıq məbləğinin 8,4 faiz artması müsbət göstəricidir. Proseslərin gedişi göstərir ki, artımların bundan sonra da davam edəcək. O baxımdan pensiyaların orta aylıq məbləğinin artmasını ekspertlər necə dəyərləndirirlər?
Məsələyə münasibət bildirən ekspert Rəsul Cahangirli sözügedən artımı müsbət dəyərləndirdi: “Əvvəla qeyd edim ki, Azərbaycanda pensiya təminatı sistemi yüksək səviyyədə qurulub. Ölkə vətəndaşları vaxtlı-vaxtında pensiya və müavinətlərini alırlar. Bir neçə ildir pensiyaların, ümumiyyətlə, gecikməsi hallarına rast gəlinmir. Bundan başqa, Azərbaycanda iqtisadi artım qeydə alınan kimi, bu, pensiyaların artmasına öz müsbət təsirini göstərir. Ötən illər ərzində ölkədə bir neçə dəfə pensiyalar artıb. Müsbət hal oldur ki, pensiyaların artması davamlı hal alıb. Bu da əhalinin aztəminatlı təbəqəsinin yaşayış şəraitinə müsbət təsir göstərir. Dünya bazarında neftin qiymətinin yüksək olması bu sahədə artımların bundan sonra da olacağından xəbər verir. O baxımdan hesab edirəm ki, gələn il pensiyaların məbləği bir az da artırıla bilər. Çünki bunun üçün yetərincə iqtisadi və maliyyə imkanları var. Bütün bunlar ölkədəki makroiqtisadi sabitliyə müsbət təsir göstərəcək”.
Vidadi ORDAHALLI
