Günel Fərhadqızı: “Bu prosesin davam etməsi ölkəmizin siyasi, iqtisadi gücünün artmasına müsbət təsirini göstərəcək”
Azərbaycan Respublikasının Prezidenti İlham Əliyev “Lerik şəhərinin içməli su təchizatı sisteminin yenidən qurulması və ilk dəfə olaraq kanalizasiya şəbəkəsinin yaradılması” layihəsinin icrasının yekunlaşması münasibətilə keçirilən mərasimdə iştirakı zamanı Azərbaycan iqtisadiyyatında yaşanan müsbət tendensiyadan danışıb.
Ölkə başısı bildirib ki, bütövlükdə, ölkəmizdə - bütün bölgələrdə, bütün rayonlarda inkişaf sürətlə gedir: “Ölkəmizin bu uğurlu inkişafı əlbəttə ki, xalqımızı da sevindirir, Azərbaycanın beynəlxalq nüfuzu, bizim gücümüz artır və iqtisadi sahədə aparılmış düzgün siyasət öz bəhrəsini verir. Azərbaycan iqtisadiyyatı dayanıqlı iqtisadiyyatdır. Biz iqtisadi baxımdan heç kimdən asılı deyilik, biz özümüz öz taleyimizin sahibiyik. Güclü iqtisadiyyat, düşünülmüş iqtisadi siyasət, maliyyə imkanlarımızın genişləndirilməsi imkan verir ki, bütün bölgələrdə, ən ucqar yerlərdə gözəl layihələr icra edilsin. Bu gün Lerikdə açılacaq 16 meqavat gücündə yeni elektrik stansiyası özlüyündə böyük bir infrastruktur layihəsidir. İçməli su, qazlaşdırma – bütün bunları biz öz hesabımıza edirik. Heç kimdən yardım, heç kimdən kredit almadan. İndi kreditlərə də ehtiyac qalmır. Düzdür, biz indi bəzi kreditləri alırıq, ancaq o proses də, demək olar ki, dayandırıldı. Biz özümüz bəzi xarici ölkələrə kreditlər veririk və bundan faiz qazanırıq. Yəni bu gün Azərbaycan, sözün əsl mənasında, öz sürətli inkişaf dövrünü yaşayır və bu inkişaf bütün bölgələrdə özünü büruzə verir, o cümlədən Lerik rayonunda”.
Göründüyü kimi, ölkə başçısı Azərbaycanın xaricdən kredit almağı dayandırdığını bildirib. Eyni zamanda, qeyd edib ki, artıq biz özümüz xarici ölkələrə kredit veririk və bundan faiz qazanırıq. Azərbaycanın kredit alan ölkədən kredit verən ölkəyə çevrilməsi nəyin göstəricisi sayıla bilər?
İqtisadçı Günel Fərhadqızı qəzetimizə açıqlamasında bildirdi ki, belə bir meyil şübhəsiz ki, Azərbaycanın mühüm uğurlarından biri kimi qiymətləndirilməlidir: “Qeyd etdiyimiz kimi, uğurlu sosial-iqtisadi model yaratmaqla Azərbaycan ölkə daxilində sabitliyə və dayanıqlı iqtisadi inkişafa nail olub. Neftdən daxil olan gəlirlər və düşünülmüş büdcə siyasəti ölkənin maliyyə gücünü xeyli artırıb, valyuta ehtiyatlarını yaratmağa imkan verib və inflyasiyanı idarəolunan səviyyədə saxlamağa şərait yaradıb. Azərbaycan zəngin neft resurslarının satışından daxil olan valyuta ehtiyatlarını səmərəli şəkildə xərcləməklə, iqtisadiyyatın bütün sektorlarının dinamik inkişafı üçün əlverişli baza yaratmağa nail olub və hazırda qeyri-neft sektoru valyuta gətirə biləcək strateji bölməyə çevrilib. Yəni milli valyutanın ölkə iqtisadiyyatının sahələrindən birinin istehsal məhsulunun ixracının artması hesabına möhkəmlənməsi, bütövlükdə, iqtisadiyyatda baş verə biləcək böhranın qarşısı alıb.
Son illər nüfuzlu beynəlxalq təşkilatların, maliyyə qurumlarının Azərbaycan haqqında hesabatları və rəyləri də bu faktı təsdiqləyir. Bununla yanaşı, ölkədə əlverişli rəqabət mühitinin yaradılması və daha da inkişaf etdirilməsi istiqamətində atılan addımlar bəhrəsini verir. Ölkədə iqtisadi təhlükəsizliyin müvəffəqiyyətlə təmin olunması beynəlxalq reytinq agentliklərinin də diqqətindən kənarda qalmayıb. Azərbaycan artıq borc alan ölkədən borc verən ölkəyə çevrilib. Bu gün Azərbaycan tərəfindən xaricdə aktiv investisiyalaşdırma prosesi gedir. Azərbaycan Türkiyədə, Rusiyada, Moldovada və başqa ölkələrdə investisiya layihələrini həyata keçirir. Bu gün Azərbaycanın valyuta ehtiyatları bu cür layihələri reallaşdırmağa imkan verir.
Müstəqilliyinin ilk illərində investisiyalara ciddi ehtiyac hiss edən ölkə indi dünyanın bir sıra ölkələrinə kapital yönəldir. Bu prosesin qarşıdakı illərdə də davam etməsi ölkəmizin siyasi, iqtisadi gücünün artmasına müsbət təsirini göstərəcək”.
Məhəmmədəli QƏRİBLİ
