Məhərrəm Zülfüqarlı: “Zəhmətkeş əhalisi olan cənub bölgəsinə diqqətin artırılması alqışalayiqdir”
Məlum olduğu kimi, Prezident İlham Əliyev və birinci xanım Mehriban Əliyeva cənub bölgəsində səfərdə olublar. Belə ki, ölkə başçısı Lənkəran, Astara və Lerik rayonlarında görülən işlərlə tanış olub, bir sıra obyektlərin açılış mərasimində iştirak edib.
İctimaiyyət nümayəndələri ilə görüşü zamanı dövlət başçısı bildirib ki, bütün bölgələrdə inkişaf sürətlə gedir: "Ölkəmizin bu uğurlu inkişafı, əlbəttə ki, xalqımızı da sevindirir. Güclü iqtisadiyyat, düşünülmüş iqtisadi siyasət, maliyyə imkanlarımızın genişləndirilməsi imkan verir ki, bütün bölgələrdə, ən ucqar yerlərdə gözəl layihələr icra edilsin”.
Bununla yanaşı, Prezident İlham Əliyev Azərbaycanın cənub bölgəsində bir sıra layihələrin icrası ilə bağlı sərəncamlar imzalayıb. Belə ki, ölkə başçısı Ələt-Astara-İran İslam Respublikası ilə dövlət sərhədi avtomobil yolunun tikintisinə dair əlavə tədbirlər haqqında, Lənkəran-Lerik avtomobil yolunun yenidən qurulması ilə bağlı, Lənkəran rayonunda çoxmənzilli binaların dam örtüklərinin dəyişdirilməsi ilə bağlı, Şıxakəran kəndində yeni ümumtəhsil məktəbi binasının tikintisi ilə bağlı, Astara şəhərində əhalinin mənzil-məişət şəraitinin yaxşılaşdırılmasına dair, rayonun sel və daşqın təhlükəli çayların zərərli təsirinə qarşı mübarizə və qəza vəziyyətinin aradan qaldırılması barədə, Lerik şəhərində əhalinin mənzil-məişət şəraitinin yaxşılaşdırılmasına dair tədbirlər haqqında və digər bu kimi məsələlərlə bağlı sərəncamlar imzalayıb.
Məlum məsələdir ki, cənub bölgəsində bu günə qədər yaradılan və bundan sonra yaradılması nəzərdə tutulan bir sıra infrastruktur, istehsal və xidmət obyektlərinin böyük sosial-iqtisadi əhəmiyyəti var. Maraqlıdır, bütün bu görülən işlərin hansı strateji əhəmiyyəti var?
Məsələyə münasibət bildirən İctimai Problemlərin Tədqiqi Assosiasiyasının rəhbəri Məhərrəm Zülfüqarlı buna bir neçə rakursdan yanaşdı: “Cənub bölgəsinin Lənkəran, Astara, Masallı, Lerik rayonları təbii gözəlliklərlə zəngindir. Həmin rayonlarda zəngin meşə massivləri var. Ancaq çox təəssüf ki, cənub bölgəsi subtropik zona olmasına baxmayaraq, sovet dönəmində Biləsuvar rayonundan o tərəfə Azərbaycan vətəndaşlarını buraxmırdılar. Bunu da onunla əlaqələndirirdilər ki, həmin zona sərhəd bölgəsində yerləşir. Yəni biz öz vətənimizdə istədiyimiz torpağa gedə bilmirdik. O vaxtdan həmin zona bir qədər baxımsız vəziyyətdə qalmışdı. Azərbaycan müstəqillik əldə etdikdən sonra bu istiqamətdə bir sıra işlər görüldü. Artıq Şimal-Cənub dəmir yolunun çəkilməsi, İpək Yolunun işə düşməsi, Azərbaycanın get-gedə inkişaf etməsi, turizmin inkişafı bu cür baxımlı yerlərə diqqəti artırır. Bunun başlıca strateji əhəmiyyəti ondan ibarətdir ki, yeni infrastrukturun qurulması sayəsində əhali bölgədən şəhərə kütləvi axın etmir. Ona görə ki, bütün bu görülən işlər sayəsində bölgədə yeni iş yerləri açılır. Bu da orada yaşayan əhalinin işlə təmin olunması deməkdir. Digər tərəfdən, həyata keçirilən müxtəlif layihələr xarici turistlərin bölgəyə axın etməsini təmin edə bilər. Bu da ümumi inkişafa çox müsbət təsir edəcək. Sovet dönəmində ucqar zona hesab olunan Lerik rayonu daha da inkişaf edə bilər. Ona görə də həmin rayonlarda turizm obyektlərinin tikilməsi məqsədəuyğundur. Həmin ərazilərdə turizm sektoru inkişaf edərsə, həm dövlət büdcəsinə böyük vəsait daxil olacaq, həm də insanların məşğulluq problemi öz həllini tapacaq. Bununla da Azərbaycan dövlətçiliyi daha da inkişaf edəcək. Vətəndaş-dövlət münasibətləri inkişaf edəcək. Vətənə, dövlətə sədaqətli vətəndaşlar iş yeri tapmaqla daha da dövlətə bağlı olacaqlar. O üzdən, zəhmətkeş əhalisi olan cənub bölgəsinə diqqətin artırılması alqışalayiqdir”.
Vidadi ORDAHALLI
